បច្ចុប្បន្ននេះយើងសង្កេតឃើញថាបងៗស្រ្ដីយើងមួយចំនួនធំមានការយល់ដឹងច្រើនពាក់ព័ន្ធនឹងអនាម័យ សុខភាពស្បូន ដែលជារឿងនេះមួយក្នុងការចៀសផុតពីជំងឺកាចផ្សេងពាក់ព័ន្ធនឹងស្បូន។ ប៉ុន្តែនៅក្នុងថ្ងៃនេះ Admin មានចំណេះដឹងថ្មីមួយទៀតយកមកចែកជូនបងៗស្រ្ដីពាក់ព័ន្ធនឹងគន្លឹះថែរក្សាស្បូនកុំឲ្យដុះដុំសាច់ ការពារជំងឺមហារីកមាត់ស្បូន ព្រមទាំងបង្កើនឪកាសក្នុងការមានផ្ទៃពោះ។
ស្បូនគឺជាសរីរាង្គសំខាន់របស់ស្ត្រី។ កាលណាយើងមានស្បូនសុខភាពល្អ សុខភាពបន្តពូជរបស់យើងក៏ល្អដែរ។ លើសពីនេះទៅទៀតស្បូនសុខភាពល្អជួយការពារយើងពីការមករដូវមិនទៀងទាត់ កាត់បន្ថយការឈឺចាប់ពេលមករដូវ កាត់បន្ថយការបង្ករោគក្នុងស្បូន ការពារកើតដុំសាច់ក្នុងស្បូន ឈឺស្បូន និងឈឺអាងត្រគាក។ ហើយដើម្បីទទួលបានស្បូនសុខភាពល្អយើងក៏ត្រូវមានទម្លាប់រស់នៅល្អដូចគ្នាដោយផ្អែកតាមប្រភពវែបសាយ Vinmec អ្នកស្រីវេជ្ជបណ្ឌិត Ashly បានចែករំលែកវិធីចំនួន៦ ក្នុងការថែទាំស្បូន ដែលវិធីទាំងនោះរួមមាន
ទី១. ញ៉ាំអាហារមានតុល្យភាពជាងមុន៖ យោងតាមការសិក្សាដែលបានចេញផ្សាយនៅផ្នែកសម្ភព និងរោគស្ត្រីប្រទេសអាមេរិកបានអះអាងថា ការញ៉ាំសាច់ក្រហមអាចបង្កើនហានិភ័យនៃការវិវត្តទៅជាដុំសាច់ក្នុងស្បូនទ្វេដង ខណៈការញ៉ាំបន្លែច្រើនដែលមានដូចជា ប្រូខូលី ស្ពៃក្ដោប ខាត់ណា ពន្លកស្ពៃ គឺបានកាត់បន្ថយហានិភ័យដុះដុំសាច់ក្នុងស្បូនបានរហូតដល់៥០%។
ទី២. កាត់បន្ថយការទទួលទានជាតិកាហ្វេអ៊ីន៖ ការទទួលទានជាតិកាហ្វេអ៊ីនក្នុងបរិមាណច្រើនអាចបង្កឲ្យមានករណីដុះដុំសាច់នៅក្នុងស្បូនព្រោះតែវាបានកាត់បន្ថយកម្រិតអ័រម៉ូនតេស្តូស្តេរ៉ូន និងបង្កើនកម្រិតអ័រម៉ូនអឺស្ត្រូសែន។ យោងតាមការសិក្សាដែលបានចេញផ្សាយនៅក្នុង Fertility and Sterility ស្ត្រីដែលទទួលទានជាតិកាហ្វេអ៊ីន៥០០មីលីក្រាមជារៀងរាល់ថ្ងៃ (ស្មើនឹងកាហ្វេ៤ទៅ 5 ពែង) នឹងផលិតអ័រម៉ូនអឺស្ត្រូសែនច្រើនជាង៧០% ។
ទី៣. ធ្វើលំហាត់ប្រាណ៖ ការសិក្សាមួយនៅក្នុង American Journal of Epidemiology បានរកឃើញថា សកម្មភាពរាងកាយអាចកាត់បន្ថយការវិវត្តនៃដុំសាច់ក្នុងស្បូន ជាពិសេសមនុស្សស្រីដែលហាត់ប្រាណរយៈពេល៤ម៉ោងក្នុង១សប្តាហ៍។ ការដើរ ការរត់ ការរត់ជិះកង់ ឬការរាំ មិនត្រឹមតែល្អចំពោះសុខភាពយើងប៉ុណ្ណោះទេ ថែមទាំងបង្កើនចលនាឈាមរត់នៅតំបន់អាងត្រគាកទៀតផង។ ការធ្វើលំហាត់ប្រាណពង្រឹងសាច់ដុំអាងត្រគាកអាចជួយទប់ស្បូនមិនឱ្យធ្លាក់ចុះក្រោម។ អ្នកជំនាញបានលើកឡើងថា ការហែលទឹក ២ ម៉ោងក្នុងមួយសប្តាហ៍អាចកាត់បន្ថយការឈឺខ្នង បន្ថយការឈឺចាប់ពេលមករដូវ និងជួយក្នុងការសម្រាលកូន។
ទី៤. ស្នើដៃគូសម្អាតប្រដាប់ភេទមុនពេលរួមភេទ៖ គ្រូពេទ្យជំនាញបានលើកឡើងថា នៅលើប្រដាប់ភេទបុរសគឺមានផ្ទុកទៅដោយបាក់តេរីជាច្រើន ដែលបណ្តាលឱ្យឆ្លងមេរោគចូលក្នុងអាងត្រគាកក្នុងពេលរួមភេទ ហើយក្នុងករណីដៃគូខ្វះអនាម័យរឿងសម្អាតប្រដាប់ភេទទៀតនោះ ភាគរយខ្ពស់ស្រ្ដីងាយឆ្លងមេរោគផ្សេងៗដែលនាំកើតជំងឺកាមរោគ។
ទី៥. កុំទប់នោម៖ ការទប់នោមអាចបង្កឱ្យមានកាកសំណល់ក្នុងប្លោកនោមដែលបណ្តាលឱ្យឆ្លងមេរោគក្នុងប្លោកនោម។ ការឆ្លងមេរោគក្នុងប្លោកនោមអាចឆ្លងចូលដល់ស្បូនបានព្រោះសរីរាង្គទាំងពីរនេះនៅជិតគ្នា។ លើសពីនេះទៅទៀតការទប់នោមធ្វើឱ្យប្លោកនោមរីកធំដែលអាចបន្ថែមសម្ពាធដល់ស្បូន។
ទី៦៖ ពិភាក្សាជាមួយវេជ្ជបណ្ឌិតអំពីអាហារបំប៉ន៖ នៅក្នុងការសិក្សារបស់វិទ្យាស្ថានជាតិសុខភាពសហរដ្ឋអាមេរិកបានបង្ហាញថា បរិមាណវីតាមីន D សមស្របនៅក្នុងរាងកាយអាចកាត់បន្ថយការដុះដុំសាច់ក្នុងស្បូន។ ដូច្នេះហើយកង្វះសារធាតុចិញ្ចឹមមួយចំនួនអាចកាត់បន្ថយសុខភាពស្បូនទាំងមូលរបស់យើង។ ជាការល្អបងៗស្រ្ដីគួរតែពិគ្រោះជាមួយវេជ្ជបណ្ឌិតអំពី អាហារបំប៉នដែលសមស្របសុខភាពរបស់យើង ដោយមានការបន្ថែមពីលើវីតាមីន D និងអាស៊ីតហ្វូលិក អាចរួមបញ្ចូលអាស៊ីតខ្លាញ់អូមេហ្គា 3 វីតាមីន B12 វីតាមីន E វីតាមីន C ជាតិដែក និងស័ង្កសី។
ចូលមកដល់ចុងវីដេអូនេះវិញ Admin ចង់រំលឹកប្រាប់ដល់ស្រ្ដីគ្រប់រូបគួរតែមានទម្លាប់ល្អនៅក្នុងរស់នៅប្រចាំជាថ្ងៃ ជាពិសេសទៀតនោះគួរតែបង្កើនទម្លាប់អនាម័យឲ្យបានជាប្រចាំក្នុងការថែទាំសុខភាពស្បូន កាលណាស្បូនយើងល្អ ពិតណាស់ស្បូនគ្មានថ្ងៃដុះដុំសាច់ ហើយរឹតតែស្រួលក្នុងការមានផ្ទៃពោះ ៕
អត្ថបទដោយ៖ ស្រីណុច