១. ចង់ឱ្យយប៉ា/ម៉ាក់សុំទោស៖ អ្នកស្រី Arielle Dualan អ្នកប្រឹក្សាផ្នែកសុខភាពអាពាហ៍ពិពាហ៍ បានលើកឡើងថា វាពិតជាសំខាន់ៗណាស់ដែលឪពុកម្តាយត្រូវចេះ ឬហ៊ានពោលពាក្យសុំទោសទៅកាន់កូនៗ រាល់កំហុសដែលខ្លួនបានបង្កឡើង ហើយធ្វើឲ្យកូនៗរងភាពឈឺចាប់ មិនថាដោយចេតនា ឬអចេតនាក្តី។ អ្នកស្រីបាននិយាយថា៖ «ឪពុកម្តាយខ្លះពុំព្រមទទួលស្គាល់កំហុសរបស់ខ្លួនទេ យល់ថាខ្លួនត្រូវគ្រប់រឿង ដឹងគ្រប់យ៉ាង ខណៈយុវជនភាគច្រើនយល់ថា ឪពុកម្តាយរបស់ពួកគេមិនល្អឥតខ្ចោះឡើយ»។

២.ប៉ា/ម៉ាក់ពិតជាមានមោទកភាពចំពោះកូនណាស់៖ មិនថាកូនៗមានអាយុប៉ុន្មាន ពួកគេតែងចង់ដឹងថា ឪពុកម្តាយមានមោទកភាពចំពោះបុគ្គលដែលខ្លួនក្លាយទៅជា និងអ្វីដែលពួកគេសម្រេចបានឬអត់។ អ្នកនិពន្ធ Jor-El Caraballo បានលើកឡើងថា៖ «ឪពុកម្តាយដែលមានវ័យចំណាស់ជាច្រើន ប្រាថ្នាចង់ឲ្យកូន មានការខិតខំប្រឹងប្រែង និងអាចកសាងសមិទ្ធផលច្រើនជាងអ្វីដែលខ្លួនផ្តល់ឲ្យកូនៗ»។ ពាក្យថា “ខ្ញុំមានមោទកភាពចំពោះអ្វីដែលអ្នកបានធ្វើ ឬអ្នកជានរណាក្នុងថ្ងៃនេះ” ជាថាមពលនៃពន្លឺ និងភាពជឿជាក់សម្រាប់កូនៗ។

៣. ប៉ា/ម៉ាក់នឹងឈរនៅទីនេះសម្រាប់កូនជានិច្ចណា៖ គ្មានអ្វីដែលអាចផ្តល់ភាពកក់ក្តៅ និងក្តីសុខ ដូចនៅពេលដឹងថា បើទោះបីខ្លួនឈានចូលដល់វ័យឯករាជ្យក្តី តែនៅមានឪពុកម្តាយឈរពីក្រោយ ចាំលើកទឹកចិត្ត និងផ្តល់ស្មាឲ្យកូនផ្អែកពេលជួបទុក្ខលំបាកឡើយ។ នេះគឺជាចំណងដ៏រឹងមាំ ដែលធ្វើឲ្យកូនៗកាន់តែគោរព ស្រលាញ់ និងដឹងគុណ ឪពុកម្តាយទ្វេដង។

យ៉ាងណាមិញ មេរៀនសម្រាប់អ្នកដែលក្លាយទៅជា ឪពុកម្ដាយគួរតែដឹងអំពីឥទ្ធិពលរបស់ខ្លួនមកលើកូនៗ ព្រោះពួកគេមើលមកអ្នកមុននរណាទាំងអស់។ អ្នកអាចធ្វើឲ្យកូនៗរបស់ខ្លួនក្លាយទៅជាអ្វីមួយក៏បានតាមតែចិត្តចង់ ចង់ឲ្យពួកគេជោគជ័យ ឬក្លាយទៅជាជនឥតបានការក៏បាន វាអាស្រ័យទៅនឹងពាក្យសម្តី និងសកម្មភាពប្រចាំរបស់អ្នកនេះឯង៕