អាហារពេលព្រឹក គឺជាអាហារដែលសំខាន់បំផុតសម្រាប់ជួយផ្ដល់ថាមពលដល់រាងកាយ។ ក៏ប៉ុន្តែប្រសិនបើអ្នកញ៉ាំអាហារដែលសម្បូរជាតិខ្លាញ់ ជាតិស្ករច្រើន ឬអាហារដែលផ្ទុកកាឡូរីច្រើននៅពេលព្រឹក ដូចជាបាយស គុយទាវ មី មីសួ គឺមិនល្អចំពោះសុខភាពនោះឡើយ។

ជាការពិតណាស់ យោងតាមការឱ្យដឹងពីគេហទំព័រ healthline បានឱ្យដឹងថា នៅពេលព្រឹកអ្នកគួរជ្រើសអាហារណាដែលជំនួយដល់សុខភាព និងផ្ទុកកាឡូរីទាបទើបល្អ។ ព្រោះអាហារពេលព្រឹកជាអាហារដំបូងគេ និងជាអាហារសំខាន់ជាងគេបំផុត។ ជាពិសេសសម្រាប់អ្នកដែលចង់រក្សាគីឡូកុំឱ្យឡើង និងចង់ថែសម្រស់ស្បែកឱ្យស្រស់ថ្លា អ្នកគួរបង្កើនទម្លាប់ញ៉ាំអាហារទាំង១០មុខខាងក្រោម៖

១.ផ្លែប័រ( Avocado)៖ លោក​ Jaramillo អ្នកជំនាញផ្នែកចំណីអាហារបាននិយាយថា ការញ៉ាំផ្លែប័រ ពេលព្រឹកគឺល្អខ្លាំងណាស់។ ផ្លែប័រមានផ្ទុកដោយសារធាតុខ្លាញ់ អូមេហ្កា៣ ដែលជួយផ្ដល់សំណើមដល់ស្បែក ជួយឱ្យកោសិកាស្បែកលូតលាស់បានល្អ។ ពិសេសជាងនេះ ផ្លែឈើមួយប្រភេទនេះ​ គឺជួយឱ្យអ្នកឆាប់ឆ្អែត ដូចនេះវាក៏អាចជួយទប់ស្កាត់ការឡើងគីឡូរបស់អ្នកផងដែរ។

២.ដំឡូងជ្វា( Sweet potato)៖ លោក Christensen ដែលជាអ្នក​ឯកទេសខាងចំណីអាហារបានឱ្យដឹងថា ដំឡូងជ្វាគឺ មានផ្ទុកសារធាតុ ខារ៉ូទីនច្រើនបំផុតដែលអាចជួយទប់ស្កាត់ និងប្រឆាំងភាពចាស់នៃស្បែករបស់អ្នកដោយសារតែ វាផ្ទុកវីតាមីនអា វីតាមីនសេ ដែលបានដើរតួនាទីយ៉ាងសំខាន់ក្នុងការការពារស្បែកកុំឱ្យចាស់។ លើសពីនេះ ដំឡូងជ្វាមានកាឡូរីទាបជាងបាយស ដូចនេះការបរិភោគដំឡូងជ្វានៅពេលព្រឹក គឺផ្ដល់គុណប្រយោជន៍ច្រើនចំពោះសុខភាព។

៣.នំប៉័ងស្រូវសាឡី៖ នំប៉័ងស្រូវសាឡី គឺជាអាហារដែលមានប្រូតេអ៊ីន និងជាប្រភពជាតិកាកសរសៃច្រើនជាងស្រូវធម្មតា ដែលវាបានដើរតួនាទីជំរុញប្រព័ន្ធកិនរំលាយអាហារបានល្អ។ បន្ថែមពីនេះ វាមានកាឡូរីទាបជាងបាយស ប៉ុន្តែវាអាចធ្វើឱ្យអ្នកឆ្អែតបានយូរ និងមិនសូវឃ្លានអ្វីផ្សេងនោះទេ។ លើសពីនេះ វាក៏សម្បូរទៅដោយជាតិដែក ប៉ូតាស្យូម ម៉ាញេស្យូម កាល់ស្យូម វីតាមីន និងសារធាតុរ៉ែសំខាន់ៗជាច្រើនទៀត។

៤. ស៊ុត៖ ស៊ុតជាអាហារដែលផ្ទុកការឡូរីទាប និងជាអាហារជំនួយសុខភាព សាកសមបំផុតសម្រាប់ធ្វើជាអាហារពេលព្រឹក។

៥.កាហ្វេក្ដៅៗ៖ យោងតាមការសិក្សាជ្រាវបានឱ្យដឹងថា ការផឹកកាហ្វេក្ដៅៗនៅពេលព្រឹក គឺជួយផ្ដល់នូវអារម្មណ៍ស្រស់ស្រាយ ជួយកាត់បន្ថយភាពនឿយហត់ និងជួយប្រឆាំងភាពនឹងជំងឺកាចសាហាវមួយចំនួនដូចជាជំងឺមហារីក។ លើសពីនេះ កាហ្វេជួយកាត់បន្ថយភាពតានតឹងស្ត្រេសតប់ប្រមល់ ជួយជំរុញថាមពលរាងកាយ ហើយចំណុចពិសេស គឺកាហ្វេជួយបង្កើតមេតាប៉ូលីសក្នុងរាងកាយ ក្នុងដុតរំលាយជាតិខ្លាញ់ ធ្វើឱ្យអ្នកស្រកគីឡូផងដែរ។

៦.តែបៃតងក្ដៅៗ៖ ការផឹកតែបៃតងក្ដៅៗនៅពេលព្រឹកមួយកែវ នឹងជួយប្រឆាំងជំងឺមហារីក ជួយពង្រឹងប្រព័ន្ធប្រសាទខួរក្បាល ជួយកាត់បន្ថយបញ្ហាផ្លូវដង្ហើមមិនល្អ និងជួយទប់ស្កាត់ជំងឺទឹកនោមផ្អែមថែមទៀតផង។ បន្ថែមពីនេះ តែបៃតងបានដើរតួនាទីជួយសម្រកគីឡូថែរក្សារាងរបស់អ្នក ដោយសារតែសារធាតុរបស់តែបៃតងបានជួយដុតរំលាយជាតិកាឡូរីលើស និងទប់ស្កាត់ភាពធាត់(កាត់បន្ថយចំណង់អាហារ)។

៧.តែទឹកឃ្មុំក្រូចឆ្មារ៖ ការផឹកទឹកក្រូចឆ្មារទឹកឃ្មុំក្ដៅៗមួយកែវពេលព្រឹក គឺជួយជំរុញប្រព័ន្ធភាពស៊ាំនៃរាងកាយឱ្យរឹងមាំ,ជួយលាងសម្អាតជាតិពុលក្នុងក្រពះ ជួយកម្ចាត់ជាតិពុល,ជួយផ្ដល់សំណើមដល់ស្បែក ធ្វើឱ្យស្បែកមានភាពភ្លឺរលោង។ លើសពីនេះ តែទឹកឃ្មុំក្រូចឆ្មារ​ បានដើរតួនាទីក្នុងការទប់ស្កាត់ភាពឃ្លាន ជួយដុតរំលាយជាតិខ្លាញ់ក្បាលពោះ ធ្វើឱ្យអ្នកមានរាងស្លីមស្អាត។

៨.តែខ្ញី៖ អ្នកជំនាញផ្នែកអាហារនិយាយថា ការផឹកទឹកខ្ញីក្ដៅឧណ្ហៗជាមួយក្រូចឆ្មានៅពេលព្រឹកនឹងជួយជំរុញប្រព័ន្ធភាពស៊ាំនៃរាងកាយរបស់អ្នកឱ្យមានភាពរឹងមាំ។ ជាមួយគ្នានេះ វាបានដើរតួនាទីទប់ស្កាត់និង រារាំងចំណង់អាហារបានល្អដែលធ្វើឱ្យអ្នកស្រកគីឡូទៀតផង។ បន្ថែមពីនេះ ខ្ញីនិង ទឹកក្ដៅនឹងជួយដុតរំលាយជាតិខ្លាញ់ក្បាលពោះ ជួយសម្រួលការបន្ទរបង់ បណ្ដេញជាតិពុលចេញពីរាងកាយ ធ្វើឱ្យអារម្មណ៍ស្រលះស្រស់ថ្លាពេញមួយថ្ងៃ។

៩.ផឹកគ្រាប់ជីពេលព្រឹក៖ គ្រាប់ជី គឺសម្បូរប្រូតេអ៊ីន អាស៊ីតអាមីណូ និងជាប្រភពកាល់ស្យូមដ៏ល្អបំផុត។ វេជ្ជបណ្ឌិតបន្ដថា ក្នុងមួយថ្ងៃអ្នកគួរតែញ៉ាំគ្រាប់ជីឱ្យបាន២ស្លាបព្រាជារៀងរាល់ថ្ងៃ ឬអាចដាក់គ្រាប់ជីចូលក្នុងរបបអាហារដូចជា សាឡាដ, ភេសជ្ជៈ,បង្អែម,ឬជាមួយសាន់វិចជាដើម គឺវាធ្វើឱ្យអ្នកឆាប់ឆ្អែត រក្សាលំនឹងចំណង់អាហារ និងជួយសម្រកគីឡូ។

១០.កិនទឹកផ្លែឈើស្រស់ៗ៖ ការកិនភេសជ្ជៈទឹកផ្លែឈើ ញ៉ាំមួយកែវនៅពេលព្រឹក វាផ្ដល់អត្ថប្រយោជន៍ជាច្រើនដូចជា ជួយសម្រួលប្រព័ន្ធរំលាយអាហារបានល្អ ជួយលាងសម្អាតជាតិពុល ហើយជាពិសេសនៅក្នុងផ្លែឈើមានផ្ទុកវីតាមីននិងជាតិកាកសរសៃល្អជាច្រើន វានឹងដឹកនាំសារធាតុចិញ្ចឹម ជួយឱ្យស្បែករបស់អ្នកភ្លឺរលោង ស្រស់ថ្លា និងកាត់បន្ថយស្នាមជ្រួញ។

អត្ថបទដោយ៖ មឿន គន្ធា