បងប្អូនដឹងហើយថារដូវធ្លាក់ខ្យល់ គឺសម្បូរអ្នកឈឺណាស់ ហើយឆ្លងគ្នាបន្តកន្ទុយពេញផ្ទះពេញភូមិស្រុក នេះគឺអាចមកពីប្រព័ន្ធរាងកាយចុះខ្សោយ ឬបងប្អូនខ្វះការការពារខ្លួនប្រាណ និងជួនកាលមានទម្លាប់ដែលខុសក្នុងរដូវធ្លាក់ខ្យល់នេះផងដែរ។

តាមការឱ្យដឹងពីគេហទំព័រkokilabenhospital បានបង្ហាញទម្លាប់ដែលបងប្អូនមានក្នុងរដូវរងារហើយបង្កជាបញ្ហាសុខភាពដូចជា៖

-មិនញុំាទឹកគ្រប់គ្រាន់ ព្រោះអំឡុងពេលធ្លាក់ខ្យល់ត្រជាក់គ្រប់គ្នាអាចនឹងមិនសូវមានអារម្មណ៍ស្រែកទឹកឡើយ ជាហេតុធ្វើឱ្យការញុំាទឹកមិនបានគ្រប់។ ហេតុនេះអ្នកគួរព្យាយាមញុំាទឹកឱ្យបានយ៉ាងតិចណាស់២លីត្រដើម្បីបំពេញជាតិទឹកក្នុងខ្លួនឱ្យបានល្អ និងការពារកុំឱ្យមានការខូចខាតសុខភាព។ហើយអ្នកក៏មិនគួរញុំាជាតិកាហ្វេអ៊ីនលើសដែរក្នុងរដូវត្រជាក់ព្រោះអាចប៉ះពាល់ដល់សុខភាពបាន។

-ងូតទឹកក្ដៅក្នុងរយៈពេលយូរ នៅពេលត្រជាក់ហើយបានងូតទឹកក្ដៅឧណ្ហៗអ្នកប្រហែលជាមានអារម្មណ៍ល្អ ហើយមិនចង់ឱ្យដំណក់ទឹកក្ដៅនោះឈប់ឡើយ នេះហើយជាហេតុធ្វើឱ្យស្បែកអ្នកស្ងួត រមាស់ និងអាចបែកស្រកា កើតបញ្ហាស្បែកផ្សេងៗបាន។ជាការល្អអ្នកគួរងូតទឹកដែលមិនក្ដៅពេក ហើយបន្ទាប់ពីងូតទឹកប្រើឡេផ្ដល់សំណើមឱ្យស្បែកដែលមានគុណភាពល្អ។

-មិនចង់ចេញពីផ្ទះ  អាកាសធាតុត្រជាក់ការគេងយូរ ការស្នាក់ក្នុងផ្ទះ ជាកន្លែងដែលអ្នកគិតថាមានក្ដីសុខ ហើយមិនចង់ចេញទៅក្រៅផ្ទះ នេះក៏ជាចំណុចតូចខ្វះខាតមួយដែលអ្នកត្រូវចាប់អារម្មណ៍ដែរ។ជាហេតុធ្វើឱ្យអ្នកមិនអាចទទួលបានគ្រប់គ្រាន់នូវវីតាមីនឌីពីបន្លឺព្រះអាទិត្យ ជួនកាលនាំឱ្យមានភាពតានតឹង ឃ្លាតពីសង្គម ដាច់ទំនាក់ទំនងផ្សេងៗ និងអាក់ខានធ្វើសកម្មភាពដែលខ្លួនធ្លាប់ចូលចិត្តពីមុនថែមទៀត ដែលអាចឱ្យផ្លូវចិត្តអ្នកធ្លាក់ចុះបាន។

-ផ្ដើមញុំាស្រា គិតថាដើម្បីកម្ដៅសាច់ក្នុងរដូចត្រជាក់ ការធ្វើនិងគិតបែបនេះជារឿងខុសមួយដែលអ្នកជំនាញមិនណែនាំឡើយ។ហើយការញុំាស្រាក្នុងរដូវត្រជាក់នេះក៏អាចធ្វើឱ្យសីតុណ្ហភាពរាងកាយចុះទាប ហើយសុខភាពមិនមាំមួនផងដែរ។ស្រា ក៏ជាគ្រឿងនាំឱ្យប្រព័ន្ធភាពសុំាងាយចុះខ្សោយផងដែរ ហេតុនេះសូមតមតាមដែលអាចធ្វើទៅបាន បើមិនចង់គេងឈឺ ខាតពេលរក លុយ ខាតពេលរៀន។

-គេងយូរៗពេក ពិតណាស់ថាការគេងគឺល្អសម្រាប់សុខភាព មានថាមពលស្មារតីពេញលេញ តែនៅពេលអ្នកគេងលើសម៉ោងពេកក៏មិនល្អដល់សុខភាពរាងកាយទូទៅផងដែរ។ហេតុនេះសូមព្យាយាមគេងត្រឹម៧ទៅ៨ម៉ោង ហើយព្យាយាមទាញខ្លួនឯងចេញពីកន្លែងគេងឱ្យបាននៅពេលដល់ម៉ោងត្រូវក្រោក។

ទម្លាប់ទាំងនេះបងប្អូនត្រូវចាប់អារម្មណ៍និងកែតម្រូវ ដូចដែលការណែនាំខាងលើមកវិញ ដើម្បីឱ្យរដូវត្រជាក់នេះ ក្លាយជាពេលវេលាដ៏មានន័យ និងរស់នៅដោយមិនបាច់ឈឺឬឈឺតិចតួច តាមរយៈការកត់បន្ថយទម្លាប់ខុសៗដែលបានរៀបរាប់ខាងលើនេះ។

“សូមឱ្យរដូវរងារនេះក្លាយជាវេលាដ៏សប្បាយរីករាយសម្រាប់បងប្អូនពលរដ្ឋខ្មែរយើងនៅគ្រប់ទិសទីទាំងអស់”