លោកអ្នកដែលរមែងតែតាមដាននូវរឿងភាគឥណ្ឌា ប្រាកដជាបានឃើញថា វប្បធម៌ជនជាតិនេះ ចូលចិត្តប្រើម្មៀតខ្លាំងណាស់ សម្រាប់បំពេញក្នុងតម្រូវរស់នៅប្រចាំថ្ងៃ។ តើអ្នកឆ្ងល់ដែរទេថា ហេតុអ្វីបានជាជនជតិនេះចូលចិត្តប្រើល្មៀតខ្លាំងម្ល៉េះ និងប្រើក្នុងគោលបំណងអ្វីទៅ?
យោងតាមប្រភពចេញផ្សាយរបស់គេហទំព័រ noworriescurries បានបង្ហាញថា បើនិយាយពាក់ព័ន្ធនឹងល្មៀតនៅក្នុងប្រទេសឥណ្ឌា ត្រូវបានគេដឹងថា វាជាគ្រឿងទេសមួយធំប្រចាំប្រទេសដែលឥណ្ឌាបានប្រើវាសម្រាប់បំពេញតម្រូវការប្រចាំថ្ងៃអស់ជាច្រើនពាន់ឆ្នាំមកហើយ។ លើសពីនេះទៅទៀត ល្មៀត ក៏ត្រូវបានជនជាតិឥណ្ឌាកំណត់ថា ជា«គ្រឿងទេសជីវិត» ដោយសារតែពណ៌មាសរបស់វា ដែលត្រូវបានផ្សារភ្ជាប់ជាមួយនឹងព្រះអាទិត្យ។
ជាមួយគ្នានេះទៀតសោត ប្រសិនផ្អែកទៅតាមវេជ្ជសាស្ត្របុរាណឥណ្ឌា ល្មៀតត្រូវបានកំណត់ជាឱសថដែលមានគុណសម្បត្តិជាច្រើនជួយព្យាបាល និងបំប៉នសុខភាពមនុស្សដូចជា៖ ប្រឆាំងនឹងការរលាក និងថ្នាំសំលាប់មេរោគ (ដោយគេអាចលាបវាលើរបួស កន្លែងរលាក ឬរោល ហើយគេក៏អាចទទួលទានធ្វើជាថ្នាំដើម្បីកាត់បន្ថយបញ្ហា ឈឺចាប់ និងសន្លាក់), ជំរុញប្រព័ន្ធភាពស៊ាំ, ប្រឆាំងនឹងមហារីក, ជួយដល់ការរំលាយអាហារ (កាត់បន្ថយរោគសញ្ញានៃការហើមពោះ ឬឆ្អល់)...ជាដើម។
យ៉ាងណាមិញក្នុងទិសដៅប្រើប្រាស់មួយចំនួនរបស់ជនជាតិអាចនឹងទាក់ទិនជាមួយនឹងគុណប្រយោជន៍ផ្ទាល់របស់គ្រឿងទេស១មុខនេះផង និងមានលាយឡំជាមួយអបិយជំនឿផង៖
១. ម្ហូប៖ មុខម្ហូបជនជាតិឥណ្ឌាដែលជាទូទៅប្រើនូវម្សៅល្មៀត ឬល្មៀតស្រស់ធ្វើជាគ្រឿងទេសក្នុងមុខម្ហូបស្ទើរតែគ្រប់មុខ ទិសដៅចម្បងនោះគឺគេជឿទៅលើអត្ថប្រយោជន៍ល្មៀតជួយដល់សុខភាព បន្ទាប់មកគឺពណ៌ និងក្លិនរបស់វា ជួយនឹងបង្កើនសោភ័ណ្ឌភាពក៏ដូចជារសក្លិនដល់មុខម្ហូបរបស់គេ។ ក្រៅពីមុខម្ហូបដែលត្រូវទទួលទានជាប្រចាំ ម្សៅល្មៀតក៏ត្រូវបានយកទៅលាយជាមួយនឹងទឹកដោះគោស្រស់ដើម្បីធ្វើជាភេសជ្ជៈជំនួយសុខភាពបន្ថែមទៀតផងដែរ ញ៉ាំដើម្បីពង្រឹងប្រព័ន្ធភាពស៊ាំ និងព្យាបាលរាល់រោគអាការដូចជា គ្រុនផ្តាសាយ កាត់បន្ថយការឈឺបំពង់ក និងបំបាត់ការក្អកផងដែរ។
២. អាពាហ៍ពិពាហ៍៖ ចំណុចពិសេសដំបូងនៃការប្រើ ម្សៅល្មៀតគឺគេយកទៅលាយជាមួយទឹកផ្កាកុលាប ឬម្សៅឈើក្រអូប និងទឹកដោះគោ រួចយកទៅធ្វើជាម្សៅលាបលើស្បែកកូនកំលោះក្រមុំមុនថ្ងៃចូលពិធី។ ការធ្វើបែបនេះ គេជឿថា រមៀតមានលក្ខណៈសម្បត្តិប្រឆាំងនឹងការរលាក ដែលមិនត្រឹមតែធ្វើឱ្យស្បែកភ្លឺថ្លាប៉ុណ្ណោះទេ ថែមទាំងកាត់បន្ថយស្នាមមុន និងស្នាមផ្សេងៗទៀតផង។
ទន្ទឹមនឹងនេះផងដែរ ក្នុងពិធីដ៏សំខាន់មួយនៅក្នុងពិធីមង្គលការហិណ្ឌូ គឺពិធី haldi ដែលក្រុមគ្រួសារ និងមិត្តភ័ក្តិរបស់កូនក្រមុំ និងកូនកំលោះជួបជុំគ្នានៅផ្ទះដាច់ដោយឡែក ដើម្បីលាបរមៀតលើកូនក្រមុំ និងកូនកំលោះ។ ជាធម្មតា គេលាបវានៅលើមុខ ក ដៃ និងជើង។ ជាងនេះទៀតសោត សម្រាប់អ្នកចូលរួមក្នុងពិធីនេះ មិនថាជាសាច់ញាតិ និងមិត្តភក្តិទេ ត្រូវស្លៀកពាក់ពណ៌ស្រដៀងនឹងពណ៌រមៀត ដើម្បីធ្វើជាសញ្ញានៃការបង្ហាញពីភាពបរិសុទ្ធ ចំពោះគូស្នេហ៍មានទៅលើគ្នា។
៣. សាសនា៖ នៅក្នុងសាសនាហិណ្ឌូ រមៀតគឺជានិមិត្តរូបនៃគុណតម្លៃ និងគុណប្រយោជន៍ជាច្រើន។ វាតំណាងឱ្យភាពមានកូន ភាពរុងរឿង ភាពបរិសុទ្ធ ក៏ដូចជាមោទនភាពពីខាងក្នុង។ ជាក់ស្តែងនៅតាមទីវត្តអារាម ឬ កន្លែងសក្ការៈ គេរមែងមានម្សៅល្មៀតលាយនឹងកំបោរដើម្បីធ្វើពិធីបួងសួង ដោយលាបលើថ្ងាសជាសញ្ញាសម្គាល់សាសនា៕