វីតាមីន គឺជាសារធាតុចិញ្ចឹមដ៏សំខាន់និងចាំបាច់បំផុតសម្រាប់រាងកាយរបស់មនុស្សគ្រប់វ័យ។ ជាពិសេសមនុស្សដែលឈានដល់វ័យចាប់ពី១៨ឆ្នាំឡើង ជាវ័យមួយដែលស្បែកត្រូវការវីតាមីនបំផុត ដើម្បីទ្រទ្រង់ និងចិញ្ចឹមកោសិកាស្បែកពីខាងក្នុងការពារស្នាមជ្រួញ។
ជាការពិតណាស់ វេជ្ជបណ្ឌិត សន បូរល័ក្ខណ ឯកទេសផ្នែកសម្រស់នៅគ្លីនិក Ella Dermatology & Aesthetic បានណែនាំថា ថ្វីត្បិតតែនៅក្នុងបន្លែផ្លែឈើ ត្រីសាច់មួយចំនួនមានផ្ទុកទៅដោយជាតិវីតាមីនក៏ពិតមែន ក៏ប៉ុន្តែមានមនុស្សភាគតិចណាស់ដែលញ៉ាំបន្លែផ្លែឈើ ត្រីសាច់ដែលមានផ្ទុកជាតិវីតាមីនបានរាល់ថ្ងៃ។ ពីព្រោះរបបអាហាររបស់មនុស្សយើងរាល់ថ្ងៃមិនដូចគ្នានោះទេ ដូច្នេះហើយការញ៉ាំវីតាមីនជំនួយបន្ថែមគឺជាជម្រើសដ៏ល្អបំផុត។
វីតាមីនដែលអ្នកគួរតែញ៉ាំរាល់ថ្ងៃដើម្បីបំពេញសារធាតុខ្វះខាតរបស់រាងកាយ និងជួយទៅដល់ស្បែក មាន៣ប្រភេទ៖
១. វីតាមីនE៖ វេជ្ជបណ្ឌិត បូរល័ក្ខណ បានប្រាប់ថា វីតាមីនE គឺជាប្រតេសវីតាមីនដែលស្បែកត្រូវការបំផុត វីតាមីន E មានផ្ទុកទៅដោយសារធាតុប្រឆាំងអុកស៊ីតកម្មមានមុខងារចម្បងក្នុងការថែរក្សាស្បែកគឺការពារប្រឆាំងនឹងការបំផ្លាញពីពន្លឺព្រះអាទិត្យ។ មនុស្សពេញវ័យត្រូវការញ៉ាំវីតាមីន E ១ថ្ងៃ១គ្រាប់ព្រឹកឬល្ងាចក្រោយញ៉ាំអាហារ។
២. វីតាមីន D៖ វីតាមីន D វាមានតួនាទីជួយឱ្យឆ្អឹងរបស់យើងរឹងមាំ ជួយការពារស្បែកពីពន្លឺព្រះអាទិត្យ កាត់បន្ថយភាពជ្រីវជ្រួញនៅលើស្បែក និងកាត់បន្ថយភាពចាស់ផងដែរ។ របៀបនៃការញ៉ាំគឺញ៉ាំមួយថ្ងៃ១គ្រាប់ មុនឬក្រោយអាហារពេលព្រឹក ១ ទៅ ២ ម៉ោង។
៣. វីតាមីន C ៖ មនុស្សពេញវ័យនិងមនុស្សចាស់(គ្មានជំងឺ)គឺគេតម្រូវឱ្យញ៉ាំវីតាមីន C 500g មួយថ្ងៃ៣គ្រាប់ ពេលព្រឹក ថ្ងៃ និងល្ងាច ដើម្បីឱ្យជម្រុញប្រព័ន្ធការពារឱ្យខ្លាំង កាត់បន្ថយកុំឱ្យស្បែកជ្រីវជ្រួញ ជួយឱ្យស្បែកភ្លឺថ្លាជួយភ្នែកឱ្យភ្លឺថ្លា មិនងាយស្រវាំង។
ទន្ទឹមនឹងនេះដែរ វេជ្ជបណ្ឌិត បូរល័ក្ខណ បានបញ្ជាក់កាន់តែច្បាស់ថា ប្រជាជនខ្មែរយើងតែងមានទស្សនៈមួយគឺពួកគាត់ខ្លាចថាការញ៉ាំវីតាមីន(ថ្នាំគ្រាប់) គឺធ្វើឱ្យពួកគាត់ខូចសុខភាព ឬខូចតម្រងនោមជាដើម។ ជាក់ស្តែង ពពួកវីតាមីន គឺវាមិនធ្វើឱ្យប៉ះពាល់ទៅដល់សុខភាពឡើយប្រសិនជាអ្នកញ៉ាំត្រូវតាមបរិមាណដែលមានការណែនាំពីគ្រូពេទ្យ។ វីតាមីនគឺជាប្រភេទ Supplements ដែលចូលទៅបំពេញបន្លែមសារធាតុខ្វះខាតនៅក្នុងរាងកាយ និងជំនួយទៅដល់សុខភាពទាំងខាងក្នុងខាងក្រៅជាពិសេសគឺស្បែកតែម្តង។
ជម្រើសល្អបំផុត គ្រូពេទ្យណែនាំថា មុនពេលញ៉ាំវីតាមីនណាមួយ អ្នកត្រូវទៅពិគ្រោះយោបល់សួរគ្រូពេទ្យពីរបៀបប្រើប្រាស់ឱ្យបានច្បាស់ ទើបមានប្រសិទ្ធភាពកាន់ខ្ពស់៕
អត្ថបទដោយ៖ មឿន គន្ធា