ទាក់ទិនទៅនឹងរបបអាហារ ប្រសិននិយាយចំពោះអ្នកមានបញ្ហាជំងឺទឹកនោមផ្អែមពិតជា ពិបាកខ្លាំងណាស់ក្នុងការជ្រើសយករបបអាហារដែលសមស្រប ដើម្បីគ្រប់គ្រងជាតិគ្លុយកូសក្នុងឈាម បំពេញថាមពល និងបំប៉នទៅដល់សរីរាង្គកាយទាំងមូល។

ដោយហេតុថា អ្នកជំងឺទឹកនោមផ្អែម ប្រសិនណាបើពុំញុំាអាហារបានគ្រប់គ្រាន់ទេ បញ្ហាទី១ដែលត្រូវប្រឈម គឺបាត់បង់ថាមពលក្នុងខ្លួន ជាតិស្ករក្នុងឈាមធ្លាក់ចុះ ឬមិនអតុល្យភាព ប៉ុន្តែប្រសិនបើញុំាខុសវិញនោះ អាចនឹងធ្វើឱ្យជាតិស្ករក្នុងឈាមកើនឡើង ធ្វើឱ្យជំងឺវិវត្តន៍កាន់តែងាយធ្ងន់។

អាស្រ័យហេតុនេះ ដើម្បីបង្ហាញនូវគន្លឹះក្នុងការបរិភោគអាហារដែលត្រឹមត្រូវ និងសមស្របទៅនឹងសុខភាពសរីរាង្គកាយ ប្រភព niddk.nih.gov បានលើកបង្ហាញថា ចំពោះអ្នកជំងឺទឹកនោមផ្អែម គួរតែយកចិត្តទុកដាក់ទៅលើការកែប្រែទម្លាប់ និងផ្លាស់ប្តូររបបអាហារមួយចំនួន ដោយងាកមកញុំានូវប្រភេទអាហារល្អវិញដូចជា៖

១. បន្លែ៖ ជាទូទៅក្រុមបន្លែសម្រាប់អ្នកទឹកនោមផ្អែមទទួលទានត្រូវបានគេបែងចែកចេញជា២ ដែលល្អសម្រាប់ទទួលទានជាប្រចាំថ្ងៃរួមមាន បន្លែគ្មានម្សៅ (ប្រូខូលី ការ៉ុត បៃតង ម្ទេស និងប៉េងប៉ោះ) និងបន្លែមានជាតិម្សៅ ( ដំឡូង ពោត និងសណ្តែកបៃតង...)។

២. ផ្លែឈើ៖ ផ្លែឈើជាប្រភពស្ករធម្មជាតិដែលអាចផ្តល់ជូននូវជាតិស្ករដ៏ល្អសម្រាប់បំពេញសរីរាង្គកាយរបស់អ្នកទទួលទាន ដោយឡែកក្នុងចំណោមផ្លែឈើទាំងអស់ត្រូវបានគេរកឃើញថា ផ្លែក្រូច ឪឡឹក ប៊ឺរី ប៉ោម ចេក និងប៊ឺរ គឺល្អជាងគេសម្រាប់អ្នកជំងឺទឹកនោមផ្អែម។ ក្នុងនោះក៏មានប្រភេទដែលមានរសជាតិផ្អែមខ្លាំងមួយចំនួនត្រូវបានគេណែនាំឱ្យអ្នកជំងឺទឹកនោមផ្អែមញុំានៅក្នុងកម្រិតមួយតិចតួចផងដែរដូចជា ផ្លែធុរេន មៀន...ជាដើម។

៣. គ្រាប់ធញ្ញជាតិ៖ គ្រាប់ធញ្ញជាតិ មានផ្ទុកទៅដោយសារជាតិសរសៃដ៏សម្បូរបែបដែលមានគុណប្រយោជន៍ចំពោះអ្នកជំងឺទឹកនោមផ្អែម និងជួយសម្រួលដល់ប្រព័ន្ធរំលាយអាហារអ្នកជំងឺផងដែរ ដោយគ្រាប់ធញ្ញជាតិទាំងនោះរួមមានដូចជា៖ ស្រូវសាលី អង្ករសម្រូប គ្រាប់អាល់មុន គ្រាប់ជី....ជាដើម។

៤. សាច់គ្មានខ្លាញ់៖ ក្រុមសាច់គ្មានខ្លាញ់ អាចផ្តល់ប្រូតេអ៊ីនដល់ល្អសម្រាប់បំប៉នសរីរាង្គកាយអ្នកជំងឺទឹកនោមផ្អែមរួមមាន ត្រីសាលម៉ុន ធូណា សាច់ទ្រូងមាន់ សាច់មាន់ទួគី ស៊ុត ....។

៥. ផលិតផលទឹកដោះគោ៖ ទឹកដោះគោគ្មានជាតិខ្លាញ់ ឬខ្លាញ់ទាប ទឹកដោះគោជូរ យ៉ាអួ និងប្រភេទទឹកដោះគោធ្វើចេញពីគ្រាប់ធញ្ញជាតិ មានប្រយោជន៍មួយផ្នែកទៀតថែរក្សាបន្ថែមដល់សរីរាង្គកាយ។

៦. ប្រេងរុក្ខជាតិ៖ ប្រេងអូលីវ ប្រេងផ្កាឈូករ័ត្ន ប្រេងផ្លែប៊ឺរ ត្រូវបានគេរកឃើញនូវសារជាតិល្អៗជំនួយដល់សរីរាង្គកាយអ្នកទទួលទាន ជាពិសេសអូមេហ្គា៣ និងសារជាតិវីតាមីន ដោយសារជាតិទាំងនេះ នឹងចូលទៅថែរក្សាសរីរាង្គកាយតាមផ្នែក និងជួយសម្រួលទៅដល់សុខភាពផ្លូវចិត្តបានថែមទៀត។

ដោយឡែក នៅក្នុងលក្ខខណ្ឌថែរក្សាសុខភាពបន្ថែមចំពោះអ្នកជំងឺទឹកនោមផ្អែម គួរយកចិត្តទុកដាក់កាត់បន្ថយទៅលើរបបអាហារដែលបង្កឱ្យជាតិស្ករក្នុងឈាមកើនឡើង ឬដំណើរការខុសប្រក្រតីផងដែររួមមាន៖

- អាហារចៀន និងអាហារផ្សេងទៀតដែលមានជាតិខ្លាញ់ឆ្អែត

- អាហារដែលមានជាតិអំបិលខ្ពស់ ត្រូវបានគេហៅថា សូដ្យូម

- បង្អែម រាប់បញ្ជូលទាំងនំដុត នំខេក ស្ករគ្រាប់ និងការ៉េម

- ភេសជ្ជៈដែលមានជាតិស្ករបន្ថែម ដូចជាទឹកផ្លែឈើ សូដា ភេសជ្ជៈអ្នកកីឡា ឬភេសជ្ជៈប៉ូវកម្លាំង...។

ក្រៅពីរបបអាហារគួរចិត្តទុកដាក់កាត់បន្ថយខាង អ្នកជំងឺទឹកនោមផ្អែមក៏ត្រូវព្យាយាមកាត់បន្ថយបន្ថែមនូវសារជាតិអាកុលដូចគ្នា។ ដោយអ្នកជំនាញណែនាំឱ្យអ្នកញៀនស្រា ចំពោះស្រ្តីផឹកក្នុងកម្រិតមធ្យម មិនលើសពីមួយកែវក្នុងមួយថ្ងៃ ប្រសិនបើជាបុរសអាចទទួលទានបានយ៉ាងច្រើនត្រឹមពីរកែវក្នុងមួយថ្ងៃ៕

អត្ថបទដោយ៖ ប៉ាវ ភក្តី