ហេតុការណ៍គួរឱ្យភ្ញាក់ផ្អើលមួយនៅក្នុងប្រទេសទួរគី ក្មេងប្រុស អាយុ ១០ឆ្នាំម្នាក់ ត្រូវបានគេរកឃើញថាមាន សត្វដង្កូវរស់មិនតិចជាង ១១ក្បាល នៅក្រោមត្របកភ្នែក ខងឆ្វេងរបស់គាត់ ផ្អែកតាមការឱ្យដឹងពីប្រភព thethaiger។ ប្រភពដដែលបានឱ្យដឹងថា ករណីនេះបានកើតឡើងបន្ទាប់ពីក្មេងប្រុសនេះដឹងថាខ្លួនឯង មានការរមាស់ និងរមាស់ក្នុងភ្នែករបស់គាត់។
នៅថ្ងៃទី 5 ខែកក្កដា ឪពុកម្តាយរបស់ក្មេងប្រុសខាងលើ បាននាំកូនទៅជួបក្រុមគ្រូពេទ្យ បន្ទាប់ពីកូនប្រុសរបស់ពួកគេបានត្អូញត្អែរពីភាពមិនស្រួលនៅក្នុងភ្នែក។ ក្រុមគ្រួសាររន្ធត់ចិត្តពេលដឹងមូលហេតុពិតនៅពីក្រោយបញ្ហារបស់ក្មេងប្រុសគឺការឆ្លងមេរោគដង្កូវរស់ក្នុងភ្នែក។ អ្នកជំនាញផ្នែកភ្នែក លោកវេជ្ជបណ្ឌិត Halil Ibrahim Ateşoğlu បាននិយាយថា ក្នុងការពិនិត្យដំបូង បានរកឃើញដង្កូវពងរុយចំនួន៨ នៅក្រោមត្របកភ្នែកខាងឆ្វេងរបស់ក្មេងប្រុស ហើយ ៣ទៀតត្រូវបានរកឃើញនៅថ្ងៃបន្ទាប់។
គាត់បានបន្តថា “យើងបានសង្កេតឃើញដង្កូវទាំងនេះផ្លាស់ទីនៅក្រោមភ្នែករបស់អ្នកជំងឺ យើងត្រូវសម្អាត និងប្រើមីក្រូទស្សន៍ដើម្បីយកដង្កូវចេញពីភ្នែករបស់គាត់”។ ក្រុមគ្រូពេទ្យបានឱ្យដឹងថា ដង្កូវនេះគឺកើតចេញពីសត្វរុយពេញវ័យ ការឆ្លងមេរោគពីដង្កូវរុយនៅក្នុងភ្នែកមនុស្ស ត្រូវបានហៅថា ជាប្រភេទជំងឺ Ophthalmomyiasis ហើយវាមិនមែនជារឿងចម្លែកនោះទេ។ ករណីទាំងនេះត្រូវបានគេឃើញជាទូទៅក្នុងចំណោមបុគ្គលដែលរស់នៅក្បែរកសិដ្ឋាន ក្បែរទន្លេ ឬនៅតំបន់ជនបទ...។ អ្នកជំនាញបានណែនាំថា ប្រសិនបើអ្នកមានការរមាស់ខុសប្រក្រតី ឬឡើងក្រហមភ្នែកបន្ទាប់ពីបានប៉ះនឹងសត្វល្អិតទាំងនេះ សូមទៅពិគ្រោះជាមួយគ្រូពេទ្យជាបន្ទាន់ ដើម្បីទទួលបានការព្យាបាលទាន់ពេល ។
ជាមួយគ្នានេះផងដែរ បើផ្អែកតាមការពន្យល់ពីវេជ្ជបណ្ឌិត អ៊ុក សុលាភី ឯកទេសភ្នែកទារក-កុមារនិងភ្នែកស្រលៀង មកពីគ្លីនិកឯកទេសភ្នែកកុមារមេត្តា បានប្រាប់ក្រុមការងារចាបបៃតងឱ្យដឹងថា ករណីប្រភេទជំងឺខាងលើនេះ អាចនិយាយថាជាប្រភេទដង្កូវដែលវាទៅផ្ញើខ្លួនប្រាណក្នុងភ្នែកមនុស្ស ដែលអាចកើតឡើងតាមរយៈពីសត្វរុយ និងការកង្វះអនាម័យផ្ទាល់ខ្លួន៕
