កើតជាមនុស្សស្រីមិនស្រួលនោះទេ បងប្អូនយើងធ្លាប់លឺជំងឺដុំដាច់ក្នុងស្បូនដែរទេ?ហើយដឹងអត់ជំងឺនេះកើតឡើងលើស្រ្តីនៅអាយុណាខ្លះ ហើយមានរោគសញ្ញាក៏ដូចជាគ្រោះថ្នាក់អ្វីខ្លះ? ដូច្នេះហើយនៅក្នុងអត្ថបទនេះ ខ្ញុំនឹងលើកយកការចែករំលែករបស់មន្ទីរពេទ្យកាល់ម៉ែត ទាក់ទងនឹងជំងឺដុំសាច់ក្នុងភ្នាស់ស្បូនរបស់មនុស្សស្រី។

នេះបើយោងតាមរយៈខាងមន្ទីរពេទ្យបានចែករំលែកឱ្យដឹងថា ជំងឺដុំសាច់នៅភ្នាសក្នុងនៃស្បូន គឺជាដុំសាច់ដែលកើតឡើងនៅក្នុងស្រទាប់សាច់ដុំស្បូន ដែលដុះចូលទៅក្នុងប្រហោងស្បូន ដែលចែកចេញជា៣កម្រិត៖

- ទី១(Grade 0): ដុំសាច់ដែលដុះនៅភ្នាសក្នុងនៃស្បូន (Endometrial fibroma pedunculated) មានទងច្បាស់លាស់ មានទំហំមិនលើសពី ៣សង់ទីម៉ែត្រ

- ទី២(Grade 1): ដុំសាច់ដែលដុះនៅភ្នាសក្នុងនៃស្បូន (Partial intramural endocavity angle of protrusion < 90o) ដែលមានទងធំ ស៊ីចូលទៅដល់សាច់ដុំស្បូន

- ទី៣(Grade 2): ដុំសាច់ដែលដុះនៅភ្នាសក្នុងនៃស្បូន (Predominantly intramural endocavity angle of protrusion > 90o) ដែលមានទំហំធំស៊ីចូលទាំងភ្នាសក្នុង និងសាច់ដុំនៃស្បូន មិនមានទងច្បាស់លាស់ហើយទំហំធំលើសពី៥សង់ទីម៉ែត្រ។

ចំពោះមូលហេតុបង្កជំងឺនេះបានដូចជា៖

   - ជំងឺនេះកើតមានតែលើស្រ្តីក្នុងវ័យបន្តពូជ

   - ជំងឺនេះកើតលើស្ត្រីដែលលើសជាតិអ័រមូនអ៊ឺស្រ្តូហ្សែន

   - ជំងឺនេះកើតលើស្ត្រីដែលមានវិបត្តិអ័រមូន

   - ជំងឺនេះកើតលើស្ត្រីដែលមានវដ្តរដូវមិនទៀងទាត់

   - កត្តាចំណីអាហារ បរិយាកាស និងកត្តាសង្គម។ បញ្ជាក់ ជំងឺនេះមិនអាចកើតមានចំពោះស្រ្តីមិនទាន់ពេញវ័យ ហើយជំងឺនេះនឹងអាចបាត់ទៅវិញនៅពេលដែលស្រ្តីមានវ័យចំណាស់ (ស្ត្រីអត់រដូវ)។

ស្រ្តីដែលមានជំងឺនេះធ្វើឲ្យមានរោគសញ្ញាដូចតទៅ

   - ធ្លាក់ឈាមរដូវច្រើន

   - រយៈពេលមានរដូវអូសបន្លាយយូរខុសធម្មតា

   - ធ្លាក់ឈាមតាមទ្វារមាសខុសធម្មតា ក្រៅពីពេលមានរដូវ

   - មានការឈឺចុកចាប់ពេលមានរដូវ

   - អាចបណ្តាលឲ្យធ្លាក់ឈាមពេលមានផ្ទៃពោះ

   - អាចបណ្តាលឲ្យរលូតកូននៅត្រីមាសដំបូង

   - បង្កឲ្យមានវិបត្តិអត់កូន

ចូលដល់ការព្យាបាលជំងឺដុំសាច់ក្នុងភ្នាស់ស្បូននេះវិញម្ដង មន្ទីរពេទ្យកាលម៉ែតបានបញ្ជាក់ថា ក្នុងករណីពុំមានបង្កឲ្យមានផលវិបាកធ្លាក់ឈាម ឬក៏មានវិបត្តិផ្សេងៗ គេពុំធ្វើការវះកាត់ទេ ដោយគ្រាន់តែធ្វើការតាមដានឲ្យបានទៀងទាត់ជាមួយគ្រូពេទ្យឯកទេសរោគស្ត្រីជាប្រចាំ។

ប៉ុន្តែក្នុងករណីមានធ្លាក់ឈាមច្រើនខុសធម្មតា និងបង្កឲ្យមានវិបត្តិអត់កូន យើងត្រូវធ្វើការវះកាត់ដុំសាច់នេះចេញ ដោយគ្រូពេទ្យឯកទេសរោគស្ត្រីតាមរយៈម៉ាស៊ីនឆ្លុះប្រហោងក្នុងនៃស្បូនបច្ចេកវិទ្យាចុងក្រោយ (Modern hysteroscopy of diagnosis and operative procedure) នៅមន្ទីរពេទ្យកាល់ម៉ែត។

ជាចុងក្រោយបើសិនបងប្អូនស្រីៗយើងបានរោគសញ្ញាដូចបានរៀបរាប់ខាងលើ ហើយត្រូវជាមួយអាយុដែលកើតទៀត បងប្អូនអាចពិគ្រោះជាមួយវេជ្ជបណ្ឌិត​​នៅមន្ទីរពេទ្យម៉ែតបាន៕