១. ចូរកាត់បន្ថយការញ៉ាំអាហារសម្បូរកាបូអ៊ីដ្រាត៖ មធ្យោបាយមួយជួយអ្នកសម្រកគីឡូបានលឿន គឺការកាត់បន្ថយជាតិស្ករ និងម្សៅ ឬប្រភេទកាបូអ៊ីដ្រាតដែលមាននៅក្នុងអាហារកែច្នៃ ធ្វើឱ្យមានការកើនឡើងយ៉ាងឆាប់រហ័សនៃជាតិស្ករក្នុងឈាម មិនតែប៉ុណ្ណោះចំពោះអាហារប្រភេទនេះ គឺមានផ្ទុកទៅដោយសារជាតិខ្លាញ់ដែលប្រមូលផ្តុំនៅក្នុងសរីរាង្គកាយនៅត្រង់បរិវេណដែលងាយឡើងជាងគេ គឺដុះខ្លាញ់ត្រង់ក្បាលពោះ ភ្លៅ និងដើមដៃ។ ហេតុនេះ គួរកាត់បន្ថយញ៉ាំប្រភេទអាហារមួយចំនួនធំដូចជា នំប៉័ង មី ប្រភេទអាហារខ្លាញ់ អាហារនំកញ្ចប់... ប្តូរមកជាប្រភេទ អាហារសម្បូរជាតិសរសៃដូចជាបន្លែ ផ្លែឈើ គ្រាប់ធញ្ញជាតិ... អ្នកនឹងឃើញលទ្ធផលស្រកគីឡូមិនខានទេ។​ នេះជាចេញផ្សាយពីគេហទំព័រ Healthline ។

២. ការគេងគ្រប់ជួយសម្រកជាតិខ្លាញ់៖ ការសម្រកជាតិខ្លាញ់បានល្អ គឺពេលអ្នកគេងឱ្យបានត្រឹមត្រូវគឺគ្រប់៧ទៅ៩ម៉ោង។ សម្រាប់ការអ្នកគេងចាប់ពីម៉ោង ១១យប់ ដល់ម៉ោង៦ព្រឹកក៏មិនសូវជាល្អប៉ុន្មានដែរ។ ការសម្រកជាតិខ្លាញ់បានល្អនោះ អ្នកគួរតែដេកនៅម៉ោង ១០យប់ ដើម្បីរាងកាយសម្រាកបានលឿន ព្រោះរាងកាយត្រូវការសម្រាក ដើម្បីជួយដុតជាតិខ្លាញ់នេះឱ្យស្រកបានលឿន និងគ្មានអារម្មណ៍ស្រ្តេសផងដែរ។​

៣. ហាត់ប្រាណដុតខ្លាញ់៖ តាមអ្នក ធាវ ដាវីន ជាគ្រូហាត់ប្រាណបានលើកឡើងថា អ្នកខ្លះគាត់ហាត់ប្រាណតិចតួចអាចជាការដើរ និងរត់ខ្លះ បានតែ១០ទៅ២០នាទី និងរយៈពេលតែ២ទៅ៣ថ្ងៃ គាត់ឡើងជញ្ជីងថ្លឹង ឃើញថាអត់ស្រកគីឡូគាត់ក៏លែងហាត់ប្រាណទៀត។ យកល្អគាត់ហាត់ប្រាណមានប្រសិទ្ធភាពខ្ពស់អាចជួលគ្រូ មានមិត្តចេះហាត់ប្រាណ និងសួរគេសួរឯងពីរបៀបហាត់ប្រាណ ទើបការហាត់ប្រាណហ្នឹងវាបានលទ្ធផលលឿន។ ព្រោះការហាត់ប្រាណបែបរត់និងដើរមិនទាន់គ្រប់គ្រាន់ទេ គួរបំបែកជាតិខ្លាញ់ដោយហាត់លើកទម្ងន់ខ្លះ។ ពេលគាត់ព្យាយាមហាត់ប្រាណបែបនេះហើយ គួរតែហូបអាហារ​ជួយ​សាច់ដុំ​រឹងមាំមានដូចជា ផ្លែ​ចេក ផ្លែប៉ោម ផ្លែប័រ ហូបត្រី ហូបសាច់គោ ដើមទ្រុងមាន់ និងស៊ុត​។ ចំណែកភេសជ្ជៈវិញ មានទឹកអំពៅ ទឹកក្រូច ទឹកដោះគោស្រស់ និងទឹកដោះគោជូរ។ សម្រាប់ហូបអ្នកអាហារទាំងអស់នេះ ជួយដុតជាតិខ្លាញ់ចេញពីរាងកាយ និងសម្បូរថាមពលក្នុងកើនទ្វេដងផងដែរ៕ អត្ថបទដោយ៖ ទ្រ សុភាព