ជំងឺលើសសម្ពាធឈាម ត្រូវបានចាត់ទុកជាប្រភេទជំងឺដ៏គ្រោះថ្នាក់ ព្រោះវាអាចកើតឡើង ដោយមិនចេញសញ្ញានោះទេ រហូតមានសភាពធ្ងន់ធ្ងរទៅហើយ ទើបអ្នកជំងឺចាប់អារម្មណ៍ ។ ម៉្យាងវិញទៀត នៅពេលសម្ពាធឈាមឡើងដល់កម្រិតមួយ វាអាចធ្វើឲ្យដាច់សរសៃឈាមនៅក្នុងខួរក្បាល បង្កឲ្យអ្នកជំងឺស្លាប់ និងបង្កផលវិបាកធ្ងន់ធ្ងរមួយចំនួនទៀត ។

មធ្យោបាយដ៏ល្អបំផុត ដើម្បីដឹងថាលោកអ្នក កំពុងកើតជំងឺលើសសម្ពាធឈាមឬទេ គឺការវាស់សម្ពាធឈាមជាប្រចាំ ជាពិសេសប្រសិនបើ លោកអ្នកមានឪពុកម្ដាយ ឬបងប្អូនកំពុងកើតមានជំងឺលើសសម្ពាធឈាម។ យោងតាមគេហទំព័រ webmd.com មានរោគសញ្ញាសំខាន់ៗមួយចំនួន ដែលអាចបញ្ជាក់ថា លោកអ្នកកំពុងមានសម្ពាធឈាមខ្ពស់ហើយ។

រោគសញ្ញាសំខាន់ៗរួមមាន៖ អ្នកជំងឺអាការឈឺក្បាលខ្លាំង ស្រវាំងភ្នែក ចុករោយត្រង់កញ្ចឹងក មានអារម្មណ៍ថប់ៗ ពិបាកដកដង្ហើម ចង្វាក់បេះដូងញាប់ជាងធម្មតា ចុកទ្រូង វិលមុខធេងធោង និងអាចចេញឈាមតាមច្រមុះជាដើម ។

ករណីមានរោគសញ្ញាគួរឲ្យសង្ស័យ សូមលោកអ្នកដេកសម្រាកនៅឲ្យស្ងៀម ដោយរក្សាស្ថានភាពក្បាលឲ្យខ្ពស់ជាងដងខ្លួន គ្រប់គ្រងអារម្មណ៍ឲ្យបានល្អ ចៀសវាងកុំឲ្យមានអារម្មណ៍ភ័យខ្លាំងពេក បើអាចត្រូវធ្វើការវាស់សម្ពាធឈាម ដើម្បីដឹងពីកម្រិតសម្ពាធឈាម ហើយករណីចាំបាច់ត្រូវបញ្ជូនអ្នកជំងឺទៅមន្ទីរពេទ្យភ្លាមៗ ។

ត្រូវចាំថាជំងឺលើសសម្ពាធឈាម កម្រចេញសញ្ញា និងរោគសញ្ញាច្បាស់លាស់ណាស់ មានន័យថា លោកអ្នកអាចកើតជំងឺនេះទាំងមិនដឹងខ្លួនបាន។ ជំងឺលើសសម្ពាធឈាម ដែលមិនបានព្យាបាលត្រឹមត្រូវ នឹងបង្កឲ្យមានផលវិបាកធ្ងន់ធ្ងរដូចជា៖ ការដាច់សរសៃឈាម នៅក្នុងខួរក្បាល កើតជំងឺបេះដូង កើតជំងឺខ្សោយតម្រងនោមរ៉ាំរ៉ៃ និងបញ្ហាដល់ភ្នែក -ល-។

អ្នកងាយប្រឈមកើតជំងឺលើសសម្ពាធឈាម ច្រើនកើតលើអ្នកដែលមានទម្លាប់ញ៉ាំអាហារដែលមានរសជាតិប្រៃខ្លាំង អ្នកធាត់លើសទម្ងន់ មានដុះខ្លាញ់ក្បាលពោះ អ្នកមានលើសជាតិខ្លាញ់នៅក្នុងសរសៃឈាម និងអ្នកកង្វះសកម្មភាពរាងកាយជាដើម ៕

អត្ថបទដោយ៖ ហួ ភារ៉ា