នៅថ្ងៃទី២៦ ខែសីហា ឆ្នាំ២០២២នេះ ក្រសួងព័ត៌មានជាតិកម្ពុជាបានចុះផ្សាយឱ្យបងប្អូនសាធារណៈជនឱ្យបានដឹងថា ខណៈពេលនេះក្រសួងធនធានទឹក និងឧតុនិយម បានស្ដារស្ទឹងព្រែកត្នោតដោយសម្រេចបានជាង៦០ភាគរយ ហើយ ដែលជាគម្រោងមួយដ៏ល្អក្នុងការកាត់បន្ថយផលប៉ៈពាល់ដែលបណ្តាលមកពីគ្រោះទឹកជំននន់។
ស្ទឹងព្រែកត្នោត គឺជាស្ទឹងដ៏វែងមួយក្នុងប្រទេសកម្ពុជាដោយហូរចេញពីតំបន់ជួរភ្នំឱរ៉ាល់ ខេត្តកំពង់ស្ពឺ ដល់ព្រំប្រទល់ខេត្តកោះកុង ហូរឆ្ពោះទៅ ចូលទន្លេបាសាក់ តាមរយៈព្រែកកំពឹស ដល់ក្រុងតាខ្មៅ ខេត្តកណ្តាល។
ថ្លែងក្នុងសន្និសីទសារព័ត៌មានស្ដីពីសមិទ្ធផលសម្រេចរយៈពេល ៥ ឆ្នាំ របស់ក្រសួងធនធានទឹក និង ឧតុនិយម កាលពីថ្ងៃទី២៥ ខែសីហា ឆ្នាំ២០២២ នាទីស្ដីការគណៈរដ្ឋមន្ត្រី ឯកឧត្តម ម៉ៅ ហាក់ បានមាន ប្រសាសន៍ថា ឆ្នាំនេះទឹកជំនន់ស្ទឹងព្រែកត្នោត នឹងមិនគំរាមកំហែងរាជធានីភ្នំពេញ និងផ្នែកខ្លះនៃខេត្តកណ្ដាល ដូចកាលពីឆ្នាំកន្លងទៅនោះឡើយ ខណៈបច្ចុប្បន្ននេះក្រសួងបាននិងធ្វើការងារយ៉ាងដុតដៃដុតជើង ពាក់ព័ន្ធការស្ដារ និងជួសជុលទំនប់ដ៏សំខាន់មួយនេះឡើងវិញ។ ខណៈពេលនេះ ការស្តារស្ទឹងព្រែកត្នោតបានសម្រេចរហូតដល់ទៅជាង៦០%ទៅហើយ ដែលនឹងអាចជួយរំដោះទឹកជំនន់នៅរាជធានីភ្នំពេញ និងខេត្តកណ្តាល។
សូមបញ្ជាក់ថា គម្រោងស្ដារឡើងវិញនូវស្ទឹងព្រែកត្នោត ក្នុងគោលបំណងកាត់បន្ថយគ្រោះមហន្តរាយ ទឹកជំនន់ ដែលតែងតែយាយីដល់រាជធានីភ្នំពេញ និងបណ្តាខេត្តដែលទទួលឥទ្ធិពលពីរបបទឹក ស្ទឹងព្រែក ត្នោត៕
សូមចូលអាចសេចក្តីលម្អិតរបស់ក្រសួងព័ត៌មាន៖ ការស្តារស្ទឹងព្រែកត្នោតសម្រេចបានជាង៦០ភាគរយ ដើម្បីជួយរំដោះទឹកជំនន់នៅរាជធានីភ្នំពេញ និងខេត្តកណ្តាល