ប្រទេសកូរ៉េខាងត្បូងបានកំពុងប្រញាប់ប្រញាល់ធ្វើសកម្មភាពដើម្បីទប់ស្កាត់រលកនៃការផ្ទុះឆ្លងរីករាលដាលរបស់វីរុសCovid-19​ជាលើកទីពីរ ដោយការបន្ថែមគ្រែសម្រាប់ទទួលអ្នកជម្ងឺCovid-19

ដើម្បីសម្រាកព្យាបាល ។ កិច្ចការនេះត្រូវបានធ្វើឡើងក្រោយពេល ស្ថានភាពអ្នកជម្ងឺCovid-19មានលក្ខណៈធ្ង​ន់ធ្ងរជាងមុន និងចំនួនអ្នកជម្ងឺដែលជាមនុស្សចាស់ក៏មានច្រើនជាងមុនផងដែរ ។

នៅផ្នែកសង្គ្រោះបន្ទាន់មានគ្រែមិនគ្រប់គ្រាន់ សម្រាប់អ្នកជម្ងឺសម្រាកព្យាបាលនោះទេនៅខណៈពេលក្រសួងសុខាភិបាលប្រទេសមួយនេះ គ្រោងចំណាយទឹកប្រាក់៨៤លានដុល្លារអាមេរិកដើម្បីទិញគ្រែចំនួន៥០០បន្ថែមទៀតសម្រាប់ទទួលអ្នកជម្ងឺកំរិតធ្ងន់ធ្ងរនៅទូទាំងប្រទេសឲ្យបានមុនពាក់កណ្ដាលឆ្នាំ២០២១។

គ្រែសម្រាប់អ្នកជម្ងឺកំរិតធ្ងន់នៅមន្ទីរពេទ្យក្នុងទីក្រុងសេអ៊ូ និងតំបន់ជុំវិញមានប្រហែល៥១១គ្រែប៉ុន្តែភាគច្រើនត្រូវបានប្រើប្រាស់សម្រាប់អ្នកជម្ងឺកំរិតស្រាលនិងអ្នកជម្ងឺធ្ងន់ធ្ងរផ្សេងៗទៀតដែលមិនមែនជាអ្នកជម្ងឺCovid-19 ។គិតត្រឹមថ្ងៃព្រហស្បតិ៍ម្សិលមិញ មានអ្នកជម្ងឺCovid-19ក្នុងកំរិតធ្ងន់ធ្ងររហូតដល់ ១៥៤នាក់នៅខណៈពេលកាលពីមួយថ្ងៃមុនមានត្រឹមតែ ១២៣នាក់ប៉ុណ្ណោះ ។ប្រទេសកូរ៉េខាងត្បូងបានរកឃើញអ្នកជម្ងឺCovid-19ដែលមានស្ថានភាពធ្ងន់ធ្ងរកាន់តែច្រើនឡើងដោយកាលពីដើមដំបូងមុនការផ្ទុះឆ្លងរីករាលដាលលើកទីពីរ មានត្រឹមតែ១២ករណី។

កូរ៉េខាងត្បូងត្រូវបានគេមើលឃើញថា​ មានការប្រហែសមិនបានត្រៀមរៀបចំទុកជាមុនដើម្បីឆ្លើយតបចំពោះការឆ្លងរីករាលដាលជាលើកទីពីរក្រោយពេលប្រទេសមួយនេះទទួលបានជោគជ័យសម្រាប់ការប្រយុទ្ធប្រឆាំងវីរុសCovid-19ក្នុងដំណាក់កាលដំបូង ។

ប្រទេសកូរ៉េខាងត្បូង បានរកឃើញករណីឆ្លងវីរុសCovid-19ប្រចាំថ្ងៃក្រោម២០០ករណីក្នុងរយៈពេលច្រើនជាងពីរសប្ដាហ៍កន្លងទៅមុនពេលករណីឆ្លងដែលមានស្ថានភាពធ្ងន់ធ្ងរបន្តកើនឡើងយ៉ាងឆាប់រហ័សនេះ។គិតត្រឹមថ្ងៃព្រហស្បតិ៍ម្សិលមិញ ប្រទេសកូរ៉ខាងត្បូងបានរកឃើញករណីឆ្លងសរុបចំនួន ២០,៦៦៤នាក់ស្របពេលអ្នកស្លាប់មាន ៣២៩នាក់ហើយ ៕

ប្រភព www.channelnewsasian

ប្រែលសម្រួលដោយ ហួ​ ភារ៉ា​