រដ្ឋមន្ត្រីក្រសួងសុខាភិបាលសិង្ហបុរី លោក Ong Ye Kung បានឱ្យដឹងកាលថ្ងៃទី០៥ ខែមេសា កន្លងមកថា តាមទិន្នន័យនៃការសិក្សាកន្លងមកប្រទេសរបស់លោកក្នុងរយៈពេល៥ខែ មានអ្នកជំងឺដែលបានឆ្លងកូវីដម្ដងហើយបានឆ្លងឡើងវិញម្ដងទៀតជាង ៨,៨០០ករណី ខណៈករណីខ្លះត្រូវស្លាប់បាត់បង់ជីវិត។

លោកបានបន្ថែមទៀតថា អ្នកដែលឆ្លងឡើងវិញម្ដងទៀតភាគច្រើនជា អ្នកជំងឺដែលមានអាយុក្រោម ៦០ឆ្នាំ ហើយមិនមានអាការៈធ្ងន់ធ្ងរនោះទេ។ ប៉ុន្តែមានអ្នកជំងឺម្នាក់ឆ្លងបានរងប៉ះពាល់ធ្ងន់ធ្ងរត្រូវបានបញ្ជូនទៅអង្គភាពមើលថែយ៉ាងម៉ត់ចត់ ព្រមទាំងមនុស្ស២នាក់ផ្សេងទៀតបានស្លាប់បន្ទាប់ពីបានឆ្លងកូវីដជាលើកទី២។

ទន្ទឹមនឹងនេះ សារព័ត៌មានអន្តរជាតិ Cna បានឱ្យដឹងថា រាប់ចាប់ពីថ្ងៃទី០១ វិច្ឆិកា ឆ្នាំ២០២១ មកដល់ ថ្ងៃទី២៥ ខែមីនា ឆ្នា២០២២ ប្រទេសសិង្ហបុរី មានចំនួនអ្នកឆ្លងកូវីដជាលើកទី២ ចំនួន​ ៨,៨៨៤ករណី។ ព្រមទាំងមានចំនួនឆ្លងសរុបជាង ១,១២៣,០០០ ករណី និងស្លាប់សរុប ១,២៨៧ករណី។

គួរបញ្ជាក់ផងដែរថា ត្បិតតែប្រទេសកម្ពុជាមានសភាពចម្លងថយចុះ ដោយសារប្រជាជនភាគច្រើនបានទទួលវ៉ាក់ស៊ាំងពេញលេញ ប៉ុន្តែកូវីដនៅមិនទាន់បាត់ពីពិភពលោកទេ សូមបងប្អូនបន្តការពារខ្លួនឱ្យបានគ្រប់ៗគ្នា៕

អត្ថបទដោយ៖ Senghong