មជ្ឈមណ្ឌលគ្រប់គ្រងនិងការពារជំងឺរបស់សហរដ្ឋអាមេរិកកំពុងស៊ើបអង្កេត ការផ្ទុះឡើងនៃ ករណីបាក់តេរីSalmonella ដែលត្រូវបានផ្សារភ្ជាប់ទៅនឹងប្រភេទម្សៅ ដែលគេយកមកចំអិនម្ហូប ឬធ្វើនំ ព្រមទាំងជំរុញមនុស្សកុំឱ្យបរិភោគ ឬលេងម្សៅនៅពេលឆៅ ឬមិនទាន់បានចំអិនបានឆ្អិនត្រឹមត្រូវ ផ្អែកតាមការឱ្យដឹងពីCNN។

ជំងឺជាច្រើន រួមទាំងការសម្រាកនៅមន្ទីរពេទ្យចំនួនបី ត្រូវបានរាយការណ៍ទាក់ទងនឹងការផ្ទុះឡើងនៃបាក់តេរីនេះលើរដ្ឋចំនួន១១ នៃសហរដ្ឋអាមេរិក។ CDC អាមេរិកនិយាយផងដែរថាថាទំហំនៃការផ្ទុះឡើងប្រហែលជាធំជាងចំនួនករណីដែលបានរាយការណ៍។ ទោះជាយ៉ាងនេះក្ដី ទីភ្នាក់ងារនេះមិនបានកំណត់អត្តសញ្ញាណ ឬឱ្យដឹងពីម៉ាកជាក់លាក់នៃម្សៅដែលពាក់ព័ន្ធនឹងការផ្ទុះឡើងនោះទេ។

ប្រភពដដែលបានឱ្យដឹងទៀតថា ម្សៅឆៅគឺមិនបានសម្លាប់មេរោគបានត្រឹមត្រូវនោះទេ ហេតុនេះអាចនាំឱ្យមានការពុលអាហារ។ បាក់តេរី Salmonella អាចស្លាប់បានបន្ទាប់ពីត្រូវកម្ដៅ និងចម្អិនតាមឆ្អិនត្រឹមត្រូវ ប៉ុន្តែមនុស្សអាចឆ្លងបាក់តេរីនេះ ពេលនៅឆៅ ដូចជាពេលចម្អិនមានការភ្លក់ទាំងម្សៅនៅឆៅ និងឆ្លងតាមរយៈការលាយម្សៅ ហើយមិនបានសម្អាតដៃ សម្អាតឧបករណ៍ឬសម្ភារៈបានស្អាតល្អ។

គួរឱ្យដឹងផងដែរថា បាក់តេរី salmonella មិនមែនមានតែក្នុងម្សៅប៉ុណ្ណោះទេ វាអាចមាននៅក្នុងសាច់ បន្លែ ផ្លែឈើ បសុបក្សី ស៊ុត អាហារកែច្នៃ បន្លែ ជាដើម។ រោគសញ្ញានៃការឆ្លងបាក់តេរីsalmonella រួមមានរាក គ្រុនក្តៅ និងរមួលក្រពះដែលអាចចាប់ផ្តើមក្នុងរយៈពេលប៉ុន្មានម៉ោង ឬប៉ុន្មានថ្ងៃបន្ទាប់ពីឆ្លងបាក់តេរីនេះ ។ មនុស្សភាគច្រើននឹងជាសះស្បើយជាមួយនឹងការព្យាបាល ប៉ុន្តែគួរតែស្វែងរកការយកចិត្តទុកដាក់ភ្លាមៗពីអ្នកផ្តល់សេវាថែទាំសុខភាព ប្រសិនបើមានរោគសញ្ញាធ្ងន់ធ្ងរ រោគសញ្ញាមិនប្រសើរឡើងបន្ទាប់ពីពីរបីថ្ងៃ ឬសញ្ញានៃការខះជាតិទឹក។

ប្រភពដដែលបានឱ្យដឹងផងដែរថា កន្លងមកមានមនុស្សប្រមាន ១.២លាននាក់បានឈឺដោយសារតែបាក់តេរី salmonella និងមានមនុស្សប្រមាណ៤៥០នាក់ បានស្លាប់។ ហេតុនេះហើយ ជាការណែនាំសូមសម្អាតដៃឱ្យបានស្អាត មុន អំឡុងពេលធ្វើ និងបន្ទាប់ពីចាប់កាន់ចំណីអាហារឆៅរួចរាល់ និងចំអិនឱ្យបានឆ្អិនល្អផងដែរ៕

អត្ថបទដោយ៖ Senghong