អ្នកមានកម្រិតមធ្យម និងសេដ្ឋីច្រើនណាស់ ពេលចង់ពិនិត្យជំងឺ ឬត្រូវព្យាបាលគេតែងធ្វើដំណើរទៅព្យាបាលនៅបរទេសមានវៀតណាម ថៃ សិង្ហបុរី និងប្រទេសផ្សេងទៀត ដែលគេយល់ថាពេទ្យប្រទេសទាំងនោះខ្លាំងពូកែ និងមានឧបករណ៍ទំនើបៗអាចព្យាបាលជំងឺពួកគេឱ្យជាសះស្បើយ ទោះត្រូវចំណាយអស់ប៉ុន្មានក៏ដោយ។
ផ្ទុយស្រលះ រឿងដែលនឹកស្មានមិនដល់ថ្មីៗនេះ ឧកញ៉ា ម៉ុង ឫទ្ធី សេដ្ឋីកសិកម្មមានលុយចាយមិនអស់ មានឈ្មោះល្បីនៅស្រុកខ្មែរ ពេលធ្លាក់ខ្លួនឈឺធ្ងន់ បែរជានៅសំរាកព្យាបាលនៅពេទ្យខ្មែរយើង មិនព្រមទៅព្យាបាលនៅមន្ទីរពេទ្យបរទេសថ្លៃៗទៅវិញ ហើយបានសរសើរពេទ្យខ្មែរយើងថា មានសមត្ថភាព និងឧបករណ៍ព្យាបាល និងតម្លៃសមរម្យមិនចាញ់មន្ទីរពេទ្យបរទេសឡើយ។ ខណៈពេលនេះ លោកឧកញ៉ាកំពុងសម្រាកព្យាបាលជំងឺនៅមន្ទីរពហុព្យាបាល សំពៅមាស ស្ថិតនៅផ្លូវ១៤៣ សង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ។
យោងតាមសម្តីរបស់ឧកញ៉ាម៉ុង ឫទ្ធី ក្រោយចូលមន្ទីរពេទ្យសង្គ្រោះបន្ទាន់បានមានប្រសាសន៍ថា «អរគុណច្រើនខ្លាំងណាស់ចំពោះសាស្ត្រាចារ្យមហាបរិញ្ញាគួច ហាច ព្រមទាំងសហការីមន្ទីរពហុព្យាបាល សំពៅមាស ដែលបានជួយសង្គ្រោះជីវិតរបស់ខ្ញុំអោយរួចចាកផុត ពីសេចក្តីស្លាប់ក្នុងថ្ងៃសុក្រទី០២ ខែតុលា ឆ្នាំ២០២០នេះ»។
«លោកមហាបរិញ្ញាមានប្រសាសន៍ថាពេទ្យគាត់សាងសង់ឡើង សម្រាប់ទទួលប្រជាជនក្រនិងមធ្យមដែលជិះម៉ូតូឬឡានជជុសទេ អ្នកធំជាងគេដែលមកសម្រាកព្យាបាលនៅមន្ទីរពេទ្យរបស់គាត់មានតែឯកឧត្តមហ្នឹងហើយ ខ្ញុំសូមវាយតម្លៃខ្ពស់ដល់សេវាកម្មក៏ដូចជាសម្ភារៈឧបករណ៍ពេទ្យមិនចាញ់បរទេសប៉ុន្មានទេ»។
ទង្វើទាំងនេះ គឺជាការផ្តល់តម្លៃខ្ពស់ដល់ពេទ្យខ្មែរយើងដែលមានសមត្ថភាពខ្លាំងមិនចាញ់បរទេសនោះទេ ទោះប្រទេសយើងមិនទាន់រីកចម្រើនខ្លាំងក្តី។ ហើយក៏ជាគំរូដល់អ្នកជំងឺឯទៀតមិនថាអ្នកមាន អ្នកក្រ ឬសេដ្ឋីនោះទេ ក៏អាចព្យាបាលនៅស្រុកខ្មែរយើងបានដែរ មិនចាំតែទៅបរទេសនោះទេ ព្រោះពេទ្យស្រុកខ្មែរយើងសព្វថ្ងៃក៏មានអ្នកពូកែៗ ឧបករណ៍សម្រាប់ព្យាបាលមិនចាញ់បរទេសនោះទេ ហើយតម្លៃសមរម្យ និងមិនសូវចំណាយច្រើនជាងទៅព្យាបាលនៅបរទេស៕
អត្ថបទដោយ៖ម៉ន វុទ្ធា