បញ្ហាផ្លូវចិត្តជាបញ្ហាចម្បងសម្រាប់ជីវិតមនុស្សម្នាក់ៗ ហេតុនេះគ្រប់គ្នាត្រូវទាមទារឱ្យមានផ្លូវចិត្តរឹងមាំ ផ្លូវចិត្តដែលជួបបញ្ហាហើយនៅតែអាចប្រឈមមុខដោះស្រាយបាន។ហើយវាជាបញ្ហាចោទមួយដែល ដែលគ្រប់គ្នាជៀសមិនរួចឡើយនូវការមានលាក់រឿងទុក្ខលំបាកក្នុងចិត្ត ហើយប្រសិនបើអ្នកកំពុងមានមែន អ្នកចិត្តសាស្រ្តបានណែនាំមិនឱ្យធ្វើរឿងនេះឡើយព្រោះអាចបណ្ដាលឱ្យមានបញ្ហាកាន់តែធំ។

តាមក្បួនចិត្តសាស្រ្តអ្នកដែលមានបញ្ហាដែលបណ្ដាលឱ្យផ្លូវចិត្តមានទុក្ខ ពិបាកក្នុងការដោះស្រាយឫប្រឈមមុខ គឺអាចធ្វើឱ្យមនុស្សមានការវិវត្តន៍ទៅជំងឺផ្លូវចិត្តធ្ងន់ធ្ងរ បើមិនមានការដោះស្រាយ ឱ្យបានទាន់ពេលទេនោះ។

យោងតាមការមានប្រសាសន៍របស់លោកគ្រូ ហឿ សេធុលអ្នកប្រឹក្សាបញ្ហាផ្លូវចិត្ត​ ដែលបញ្ចប់ការសិក្សាមកពីហ្វីលីពីន និងលោកគ្រូ ពេជ ពុតដែលជាគ្រូពេទ្យផ្នែកចិត្តសាស្រ្តផងនោះបានលើកឡើងដូចគ្នាថា ចំពោះបុគ្គលដែលមានបញ្ហាមិនអាចដោះស្រាយបាន ឫមានទុក្ខលំបាកផ្នែកណាមួយក្នុងដំណើរជីវិតគឺ មិនត្រូវលាក់ទុកក្នុងចិត្តទេ ពោលគឺត្រូវបង្ហាញចេញមកក្រៅ ដើម្បីទទួលបានដំណោះស្រាយ។

លោកគ្រូ ពេជ ពុត បានលើឡើងថា ពេលមានវិបត្តិផ្លូវចិត្តអ្នកត្រូវ និយាយចេញពីបញ្ហារបស់ខ្លួន និងពិភាក្សាជាមួយបុគ្គលដែលអ្នកជឿទុកចិត្ត។ពិសេស ការចូលរួមជួយសង្គមនិងអ្នកដទៃ ការសេពគប់មិត្តល្អ មនុស្សល្អ ថ្នាក់ដឹកនាំល្អ ការសរសេរ គោលបំណង ក្ដីស្រមៃជីវិត និងចក្ខុវិស័យរបស់ខ្លួនច្បាស់លាស់ ក៏ជាកត្តាជួយឱ្យផ្លូវចិត្តរឹងមាំ បង្កាការកើតជំងឺធ្លាក់ទឹកចិត្តផងដែរ។

បន្ថែមពីលើនេះ លោកគ្រូ សេធុល ក៏បានលើកឡើងដែរថា ការគិតវិជ្ជមានក៏ជាចំណុចខ្លឹមមួយជួយឱ្យជីវិត មានភាពល្អប្រសើរផងដែរពិសេស លើចំណងទំនាក់ទំនាងរវាងគ្នានិងគ្នា ហើយក៏ជួយឱ្យផ្លូវចិត្តមានភាពរីករាយច្រើនផងដែរ។

ហេតុដូចនេះនៅពេលមានបញ្ហាពិបាកចិត្តខ្លួនឯងដោះស្រាយមិនបាន អ្នកត្រូវជជែកពិភាក្សាជមួយបុគ្គលដែលអ្នកអាចទុកចិត្ត កុំឱបទុកមម្នាក់ឯង ពោលមិនត្រូវលាក់ទុករហូតដល់អ្វីៗហួសពេលឡើយ ព្រោះវាអាចជាកត្តាដ៏ធំមួយជំរុញឱ្យអ្នកមានវិបត្តិផ្លូវចិត្តកាន់តែធ្ងន់ធ្ងរ។

អត្ថបទដោយ៖ ភោគ ម៉ារី

ផេកផ្ទាល់ខ្លយនរបស់ខ្ញុំ៖ Mary Phoak