ជាការពិតណាស់ យោងតាមការចុះផ្សាយនៅលើគេហទំព័រ vinmec វេជ្ជបណ្ឌិត Le Hong Lien ឯកទេសផ្នែកសម្ភពនិងរោគស្រ្តីនៅមន្ទីរពេទ្យ Vinmec Central Park International General Hospital ល្បីនៅប្រទេសវៀតណាមបានបញ្ជាក់ច្បាស់ៗថា ស្រ្តីមានផ្ទៃពោះញ៉ាំស៊ុតក្ងានធ្វើឱ្យខួរក្បាលកូនឆ្លាត QIកូនខ្ពស់ ទាំងនេះគ្រាន់តែជាពាក្យចចាមអារ៉ាមប៉ុណ្ណោះ។ មិនទាន់មានការពិសោធន៍ ឬការសិក្សាស្រាវជ្រាវបែបវិទ្យាសាស្រ្តណាមួយដែលបញ្ជាក់ថា ការញ៉ាំស៊ុតក្ងានអំឡុងពេលមានផ្ទៃពោះធ្វើឱ្យកូនឆ្លាតនោះទេ។

ការពិត បើតាមការពិសោធន៍ជាក់ស្តែង នៅក្នុងស៊ុតក្ងាន១គ្រាប់មានផ្ទុក ប្រូតេអ៊ីន១៣ក្រាម ជាតិខ្លាញ់១៤.២ក្រាម វីតាមីនA ៣៦០mcg ជាតិកាល់ស្យូម៧២មីលីក្រាម ផូស្វ័រ២១០មីលីក្រាម ជាតិដែក៣.២មីលីក្រាម វីតាមីនB ០,១៥មីលីក្រាម វីតាមីនB2 ០,៣មីលីក្រាម បើប្រៀបធៀបជាមួយនឹងស៊ុតមាន់ ស៊ុតក្ងាន មានសារធាតុចិញ្ចឹមទាបជាង។ មិនតែប៉ុណ្ណោះ សមាសធាតុដែលមាននៅក្នុងស៊ុតក្ងានមានជាតិកូលេស្តេរ៉ុល និងខ្លាញ់ដែលមិនល្អសម្រាប់សុខភាព និងប្រព័ន្ធសរសៃឈាមបេះដូង។ បើ​​ស្ត្រី​មាន​ផ្ទៃពោះព្យាយាមញ៉ាំច្រើន គឺអាច​ប្រឈម​នឹង​ជំងឺ​លើស​ទម្ងន់ ធាត់ លើស​ខ្លាញ់ ទឹកនោមផ្អែម លើស​ឈាម​...ជាដើម។ ដូច្នេះបើសួរថា អំឡុងពេលមានផ្ទៃពោះគួរញ៉ាំស៊ុតក្ងាន ឬស៊ុតមាន់ ជម្រើសល្អគួរញ៉ាំស៊ុតមាន់ល្អជាង ព្រោះវាផ្ទុកសារធាតុចិញ្ចឹមច្រើន ហើយមិនធ្វើឱ្យស្រ្តីមានផ្ទៃពោះលើសគីឡូទៀតផង។

បើតាមការណែនាំពីគ្រូពេទ្យ ស្រ្តីមានផ្ទៃពោះគួរញ៉ាំស៊ុតមាន់ស្រែឱ្យបាន១គ្រាប់ក្នុង១ថ្ងៃ ៧គ្រាប់ក្នុង១សប្តាហ៍ ដើម្បីឱ្យទារកក្នុងផ្ទៃមានការលូតលាស់ខួរក្បាលបានលឿន កើតIQ ឆ្អឹងរឹងមាំ ទាំងម៉ាក់និងកូន។ មិនតែប៉ុណ្ណោះ ជាតិកាល់ស្យូមនៅក្នុងស៊ុតមាន់ ជួយបញ្ចៀសការឈឺចុករោយឆ្អឹង ការពារកុំឱ្យស្រ្តីមានផ្ទៃពោះឈឺចង្កេះបានថែមទៀតផង។ របៀបក្នុងការញ៉ាំ ស្រ្តីអាចយកទៅចម្អិនជាម្ហូបផ្សេងៗតាមចំណង់ចំណូលចិត្តដូចជា ស្ងោរ ចៀន គន្លឹះពិសេសគឺញ៉ាំពងមាន់ស្ងោរជាមួយផ្លែប៊័រគឺទទួលបានអត្ថប្រយោជន៍ខ្ពស់បំផុត។ បញ្ចាក់៖ ស៊ុតមាន់អាចយកទៅចម្អិនជាម្ហូបផ្សេងៗតាមចំណូលចិត្តបាន ប៉ុន្តែត្រូវចម្អិនស៊ុតឱ្យឆ្អិន១០០% កុំញ៉ាំស៊ុតឆៅ ឬស៊ុតស្ទើរឆ្អិន មិនល្អសម្រាប់សុខភាពកូន និងសុខភាពម្តាយនោះទេ៕