យោងតាមប្រភពចេញផ្សាយ jpost.com បានចុះផ្សាយពីការសិក្សាថ្មីរបស់អ៊ីស្រាអែល នាថ្ងៃទី២០ ខែតុលា ឆ្នាំ២០២១ ស្តីពីកម្រិតដូសដែលបានចាក់ជូនក្រុមបុគ្គលិកវេជ្ជសាស្ត្រ ហើយអាចជួយបង្កើនអង្គបដិបក្ខខ្លាំងលើសលប់រហូតទៅដល់ ៥០ដង ឯណោះ។

របាយការណ៍ដែលបានបោះពុម្ភផ្សាយថ្មីៗនេះ នៅក្នុង Lancet Microbe ដោយវេជ្ជបណ្ឌិត Esther Saiag អនុប្រធានទទួលបន្ទុកព័ត៌មាន និងប្រតិបត្តិការនៅមជ្ឈមណ្ឌលវេជ្ជសាស្ត្រ Tel Aviv Sourasky បានពិនិត្យមើលលើប្រសិទ្ធភាពនៃការវ៉ាក់ស៊ាំង​ (Pfizer) ដូសជម្រុញ ទៅលើបុគ្គលិកមន្ទីរពេទ្យដែលមានសុខភាពល្អចំនួន ៣៤៦នាក់។ ក្នុងដំណើរការចាក់ដូសជម្រុញទៅលើបុគ្គលពេទ្យទាំង ៣៤៦នាក់នេះ គឺធ្វើឡើងតាំងពីខែសីហាមកម្ល៉េះ ដោយក្នុងនោះមានស្រី្តចំនួន ២១៥នាក់ (អាយុចន្លោះពី ៦៤ ទៅ ៧៣ ឆ្នាំ) ទទួលយកនូវថ្នាំបង្ការដូសទី៣នេះបន្ទាប់ពីចាក់ដូសទី២បានរយៈពេល៨ខែ។

ក្នុងការធ្វើតេស្តលទ្ធផលដំបូងបានរកឃើញថា នៅក្នុងខែសីហាកម្រិតមូលដ្ឋាននៃអង្គបដិប្រាណរបស់អ្នកដែលទទួលបានថ្នាំបង្ការដូសទី៣នេះ គឺមានត្រឹមតែ ៣.៦៧ ប៉ុណ្ណោះ ខណៈពេលបរិមាណនេះជា ចំនួនមួយមានកម្រិតទាបណាស់។ យ៉ាងណាមិញ ក្នុងរយៈពេលប្រមាណជា ១០ ថ្ងៃបន្ទាប់ពីចាក់ដូសទី ៣ គេក៏បានធ្វើតេស្តម្តងទៀត ដោយលទ្ធផលស្ទើរតែទាំងអស់ប្រមាណជា (៩៥.៧%) មានការកើនឡើងនៃអង្គបដិប្រាណជាង ១៥០។

តាមរយៈរបាយការណ៍ដដែលក៏បានពន្យល់បញ្ជាក់ឱ្យដឹងថា ការប្រមូលផ្តុំប្រូតេអ៊ីនប្រឆាំងនឹងការកើនឡើងត្រូវបានបង្កើតឡើងដោយការធ្វើតេស្ត ADVIA Centaur SARS-CoV-2 IgG ដែលផ្តល់នូវសន្ទស្សន៍តម្លៃរហូតដល់ ១៥០ ។ សន្ទស្សន៍ស្មើនឹងឬធំជាងមួយត្រូវបានចាត់ទុកថាមានប្រតិកម្ម។ ក្នុងនោះដែរវេជ្ជបណ្ឌិត Esther Saiag បានបន្តនិយាយថា“ យើងបានឃើញភ្លាមៗ បន្ទាប់ពីមានប្រជាជនទទួលបានវ៉ាក់ស៊ាំងដូសទីបីដែលធ្វើឱ្យសន្ទុះកូវីដរលកទី ៤ បានថយចុះ។ វេជ្ជបណ្ឌិត Esther Saiag បាននិយាយទៀតថា លទ្ធផលនេះអាចជួយរដ្ឋាភិបាលអ៊ីស្រាអែលធ្វើការសម្រេចចិត្តបន្តថា តើត្រូវការកម្រិតថ្នាំទី ៤ ដែរឬទេ? ខណៈដែលវ៉ាក់ស៊ាំងដូសទី៣ មានប្រសិទ្ធភាពបង្កើនអង្គបដិប្រាណខ្ពស់បែបនេះ៕