ការប្រកួតគេងត្រូវបានប្រារព្ធឡើងនៅប្រទេសអេស្ប៉ាញ ដំបូងគេបង្អស់ក្នុងឆ្នាំ២០១០ ខណៈការប្រកួតនេះត្រូវបានធ្វើដើម្បីលើកកម្ពស់ការគេងដែលមានសុខភាពល្អ។ ប្រទេសនៅអ៊ឺរ៉ុបមួយនេះបានរៀបចំការប្រកួតគេង National Siesta Championship នៅទីក្រុង Madrid ដោយមានអ្នកចូលរួមយ៉ាងច្រើនកុះករដោយអ្នកឈ្នះនឹងទទួលបានប្រាក់រង្វាន់រហូតដល់៦ពាន់ដុល្លារ។ នេះបើយោងតាមការចុះផ្សាយរបស់សារព័ត៌មាន curlytales ។
ចំពោះលក្ខខណ្ឌនៃប្រកួតនោះអ្នកចូលរួមត្រូវតែគេងលក់ឲ្យលឿនតាមអ្វីដែលអាចធ្វើទៅបានយ៉ាងហោចណាស់ត្រឹម២០នាទី ដោយគណៈកម្មការនឹងវិនិច្ឆ័យឲ្យពិន្ទុលើឥរិយាបថនៃការគេង សមត្ថភាពស្រមុក និងល្បឿនដែលពួកគេដេក។ មួយវិញទៀតសោតការប្រកួតនឹងចាប់ផ្ដើមធ្វើឡើងនៅក្រោយបាយថ្ងៃត្រង់ ដែលទីតាំងប្រកួតគេធ្វើនៅក្នុងផ្សារទំនើបដ៏មមាញឹកមានមនុស្សដើរចុះឡើងកុះករ។
បេក្ខជន បេក្ខនារីតម្រូវឲ្យស្លៀកខោជើងវែងមកប្រកួត ពួកគេមានពេលត្រឹមតែ២០នាទីប៉ុណ្ណោះសម្រាប់គេងឲ្យបានលង់លក់ ក្នុងអំឡុងពេលពួកគេកំពុងគេត្រូវបានតាមដានដោយឧបករណ៍វាស់ជីពចរដើម្បីកំណត់ថាតើពួកគេចំណាយពេលប៉ុន្មានក្នុងការងងុយគេង ហើយអ្នកដែលគេងបានលឿងជាង២០ នាទីនឹងទទួលបាន២០ពិន្ទុ។ ចំពោះអ្នកដែលគេងមានទីតាំងល្អ សម្លៀកបំពាក់ត្រឹមត្រូវតាមក្បួន និងគេងស្រមុកឮខ្លាំងក៏ត្រូវទទួលបានពិន្ទុផងដែរ។ ការប្រកួតប្រជែងនេះតែងតែទទួលបានជោគជ័យ ហើយប្រទេសអេស្ប៉ាញបានប្រារព្ធធ្វើជារៀងរាល់ឆ្នាំដើម្បីលើកកម្ពស់ការគេងឱ្យបានល្អក្នុងចំណោមប្រជាជនរបស់ខ្លួន។
គួររំលឹកដែលថា បុរសជនជាតិអេក្វាឌ័រ អាយុ៦២ឆ្នាំ លោក Pedro Soria Lopez បានក្លាយជាជើងឯកដំបូងគេនៃពានរង្វាន់ National Siesta Championship ដោយលោកបានចំណាយពេលគេងឲ្យលង់លក់ត្រឹមតែ១៧នាទីប៉ុណ្ណោះ ៕
អត្ថបទដោយ៖ ស្រីណុច