យោងតាមរយៈCDCកម្ពុជា បានបញ្ជាក់ឱ្យដឹងថា រហូតដល់ថ្ងៃទី២៤ ខែសីហា ឆ្នាំ២០២៤, នាយកដ្ឋាន មិនទាន់រកឃើញករណីជំងឺ អឹមផក (mpox) ប្រភេទថ្មី Clad 1b ដែលជាមេរោគឆ្លងខ្លាំងនៅឡើយយទេ ។ នាយកដ្ឋានកំពុងតាមដានយ៉ាងសកម្មតាមព្រំដែន ចេញ-ចូល ទាំងអស់ និងទូទាំងផ្ទៃប្រទេស ។
ជាការពិតណាស់ ទោះបីឥឡូវមិនទាន់មានការឆ្លងក៏ពិតមែន តែនាយកដ្ឋានប្រយុទ្ធនឹងជំងឺឆ្លងCDC កម្ពុជា បានប្រាប់ពីរោគសញ្ញា និងវិធីការពារជំងឺMpoxដើម្បីចៀសវាង ការឆ្លងជំងឺនេះឡើងមក។
-របៀបឆ្លង
- តាមការរួមភេទគ្រប់ទម្រង់ជាមួយអ្នកជំងឺអ៊ីមផក និង ការប៉ះពាល់ដោយផ្ទាល់នឹងកន្លែងមានដំបៅ ទឹកមាត់ តំណក់តូចៗតាមផ្លូវដង្ហើមរបស់អ្នកជំងឺអ៊ីមផក។
- ឆ្លងតាមរយៈការប្រើប្រាស់សម្ភារដែលប្រឡាក់ប្រឡូក ជាមួយនឹងវីរុសអុតស្វា រួមមាន សម្លៀកបំពាក់ ពួក កន្សែង ឬសម្ភារ ស្លាបព្រាចាន កែវទឹក។ល។
- វីរុសអុតស្វា ឆ្លងពីម្តាយទៅកូនតាមរយៈទងសុក ក្នុងអំឡុងពេលឬក្រោយពេលសម្រាល តាមរយៈ ការប៉ះពាល់ផ្ទាល់ បើស្ត្រីមានផ្ទៃពោះឬឪពុកម្តាយ មានជំងឺអ៊ីមផក។
-វិធានការបង្ការការចម្លងជំងឺអឹមផក (Mpox)
-ប្រើប្រាស់ស្រោមអនាម័យរាល់ពេលរួមភេទ និងចៀសវាងមានដៃគូរួមភេទច្រើន
-ចៀសវាងប៉ះពាល់ផ្ទាល់ ជាមួយអ្នកដែលមានចេញរោគសញ្ញាជំងឺអ៊ីមផក
-ចៀសវាងការប៉ះពាល់ជាមួយសម្លៀកបំពាក់ កម្រាលពួកខ្នើយ ឬកន្សែងពោះគោ ឬ មាន ស្លាបព្រា ឬពែង ឬផ្ទៃនៃទីតាំង ដែលអ្នកមានជំងឺអឹមផកប្រើប្រាស់
-ចៀសវាងការប៉ះពាល់ផ្ទាល់ ជាមួយតំណក់ទឹកចេញពីផ្លូវដង្ហើម ឬសារធាតុរាវ តាមមាត់របស់អ្នកជំងឺអឹមផក
-លាងសម្អាតដៃជាមួយទឹកនិងសាប៊ូ ដែលលាងដៃ ឬអាល់កុលលាងដៃ
-បុគ្គលដែលសង្ស័យ ឬបញ្ជាក់ថាមានជំងឺអ៊ីមផក ត្រូវតែដាក់ឱ្យនៅដាច់ដោយឡែករហូតដល់ក្រមរ ជ្រុះអស់ និងទទួលលទ្ធផលអវិជ្ជមានវីរុសអុតស្វា
-បុគ្គលដែលផ្តល់ការថែទាំអ្នកជំងឺអឹមផកត្រូវការពារខ្លួន ដោយពាក់ម៉ាស់ លាងដៃ ពេលប៉ះពាល់ជាមួយអ្នកជំងឺ
-រោគសញ្ញាជំងឺmpox
បុគ្គលដែលមានរោគសញ្ញាដូចជា កន្ទួលរមាស់ជាមួយពងទឹកនៅលើមុខ បាតដៃ ជើង ដងខ្លួន ភ្នែក មាត់ ឬប្រដាប់ភេទ គ្រុនក្តៅ ដើមកូនកណ្តុរ ឈឺក្បាល ឈឺសាច់ដុំ និងឈឺចង្កេះ អស់កម្លាំង សូមប្រញាប់ទៅមណ្ឌលសុខភាព ឬមន្ទីរពេទ្យដែលនៅជិតលោកអ្នកបំផុត ។
ព័ត៌មានបន្ថែមសូមទាក់ទងលេខទូរស័ព្ទ ១១៥ ដោយឥតគិតថ្លៃ
បញ្ជាក់ថា ចាប់ពីឆ្នាំ២០២៣ ដល់ឆ្នាំ២០២៤ នាយកដ្ឋានធ្លាប់បានរកឃើញជំងឺអឹមផកប្រភេទចាស់ (Clade 2) ចំនួន២០ករណី សុទ្ធតែភេទប្រុស និងបានព្យាបាលពីសំណាក់គ្រូពេទ្យជំនាញជាសះស្បើយទាំងអស់៕