តាមការឱ្យដឹងពីប្រភពព័ត៌មាន vnexpress នៅថ្ងៃទី២៤ ខែមិថុនា ឆ្នាំ២០២៣ បានឱ្យដឹងថា មានបុរសវ័យ៥៦ឆ្នាំ ដែលមិនត្រូវបានគេបង្ហាញមានអត្តសញ្ញាណម្នាក់ តែងតែមានទម្លាប់ទទួលទានត្រីឆៅ ហើយគាត់ចេញតែឈឺក្បាលជាប្រចាំ នៅពេលដែលទៅពេទ្យស្កែនឃើញដង្កូវប៉ារ៉ាស៊ីតក្នុងខួរក្បាល។

កាលពីថ្ងៃទី២៣ ខែមិថុនា លោកវេជ្ជបណ្ឌិតនៅមជ្ឈមណ្ឌលសុខភាព Tan Son បាននិយាយថាអ្នកជំងឺខាងលើគាត់បានឆ្លងប៉ារ៉ាស៊ីត ដោយសារតែមានទម្លាប់ទទួលទានអាហារឆៅ តែមិនច្បាស់ទេថាពពួកដង្កូវប៉ារ៉ាស៊ីត(neurocysticercosis) បានជ្រាបចូលពីពេលណា។ លោកបានបន្តថា ជំងឺនេះជាជំងឺមួយដែលមេរោគឆ្លងចូលតាមប្រព័ន្ធប្រសាទកណ្ដាល ហើយមានគ្រោះថ្នាក់ណាស់។

នៅពេលវាវត្តមាននៃជំងឺនេះដំបូង នឹងមានការបង្កឱ្យឈឹក្បាលជាប់ និងរាលដាលទៅតំបន់ផ្សេងៗទៀត។ កាន់តែធ្ងន់ធ្ងរជាងនេះ អ្នកជំងឺអាចនឹងមានការប្រកាច់ផងដែរ ស្ថានភាពអាចនឹងមានភាពខុសៗទៅតាមអ្នកជំងឺម្នាក់ៗ។ ក្នុងករណីអ្នកជំងឺខាងលើនេះ គាត់ប្រកាច់ដូចជាជំងឺឆ្កួតជ្រូក និងធ្វើឱ្យមុខងារម៉ូទ័រក្នុងខួរក្បាលចុះខ្សោយ ក្រុមគ្រូពេទ្យនឹងធ្វើការសង្គ្រោះដោយវះកាត់ជាមុន រួចព្យាយាលមេរោគប៉ារ៉ាស៊ីតតាមក្រោយ ដោយប្រើថ្នាំសម្លាប់វា។

ជាមួយគ្នានេះផងដែរ ក្រុមគ្រូពេទ្យបានចែករំលែកថាដើម្បីការពារជំងឺខាងលើនេះ គួរតែរស់នៅនិងបរិភោគអាហារឱ្យមានអនាម័យ ចៀសវាងការញ៉ាំពពួកត្រី និងសាច់ឆៅ មានឈាមៗ ដែលមិនបានចម្អិនបានល្អ។ ជាមួយគ្នានេះ មុននឹងចាប់កាន់អាហារគួរតែលាងសម្អាតដៃឱ្យបានស្អាតជាមុន៕