នរណាខ្លះឧស្សាហ៍ឈឺចង្កេះ? នរណាគេខ្លះមិនទាន់ដឹងមូលហេតុ? ហើយនរណាខ្លះឈឺហើយក៏មិនព្រមព្យាបាលឱ្យបានទាន់ពេល ។ បញ្ហានេះបើសិនបងប្អូនមិនបានមកពិគ្រោះអាចជួបបញ្ហាដូចជាពិការជើង វិបត្តិបន្ទោរបង់ និងការឈឺចាប់ខ្លាំងរហូតមិនអាចធ្វើការបាន។

នេះបើយោងតាមរយៈការចែករំលែករបស់មន្ទីរពេទ្យកាល់ម៉ែត បានឱ្យដឹងថា អាការៈឈឺចង្កេះ គឺជារោគសញ្ញាមួយដែលកើតមានឡើងជាញឹកញាប់ និងទូទៅមិនមានសភាពធ្ងន់ធ្ងរទេ តែជាមូលហេតុចម្បងដែលធ្វើអោយអ្នកជំងឺភាគច្រើនធ្វើការងារមិនបាន ឫរំខានញឹកញាប់កិច្ចការប្រចាំថ្ងៃ។ ការឈឺចង្កេះអាចកើតលើមនុស្សគ្រប់វ័យ ហើយភាគច្រើននៅក្នុងអាយុចន្លោះពី ៤៥ ទៅ ៥០ ឆ្នាំ។ ប្រសិនបើយើងមិនបានធ្វើការព្យាបាលអោយបានត្រឹមត្រូវនោះទេ បញ្ហាឈឺចង្កេះនេះ នឹងអាចវិវត្តន៍ទៅជាជំងឺរ៉ាំរ៉ៃ ឬធ្ងន់ធ្ងរ។

មូលហេតុជាច្រើនដែលបណ្តាលអោយឈឺចង្កេះ ៖

- វិបត្តិសាច់ដុំ សរសៃពួរតឆ្អឹងត្រង់សន្លាក់

- ការសឹកសន្លាក់ឆ្អឹង ឬដោយសារការពុកឆ្អឹងចង្កេះ

- ការរលាកសន្លាក់ឆ្អឹង និងឆ្អឹងចង្កេះ

- ភាពចុះខ្សោយ និងការលូនមកក្រៅនៃទ្រនាប់ឆ្អឹង

- ការបាក់បែកឆ្អឹងចង្កេះដែលបណ្តាលមកពីគ្រោះថ្នាក់ ប៉ះទង្គិច ធ្លាក់ពីទីខ្ពស់ និងរអិលជាដើម

- ការគាប ឬសង្កត់ទៅលើសរសៃប្រព័ន្ធប្រសាទ

- ជំងឺមហារីក ។ល។

កត្តាប្រឈមមុខនឹងបញ្ហាឈឺចង្កេះមានដូចជា៖

- អ្នកធ្វើការងារដោយប្រើកំលាំងកាយខ្លាំងដូចជា លីសែងរបស់ធ្ងន់ៗ

- អ្នកធ្វើការងារដែលអង្គុយ ឬឈរដោយប្រើរយៈពេលយូរ

- ស្ត្រីមានផ្ទៃពោះ មនុស្សធាត់ មនុស្សចាស់ជរា

- អ្នកដែលពុំសូវបានហាត់ប្រាណជាប្រចាំ

- ស្ត្រីដែលចូលចិត្តពាក់ស្បែកជើងកែងខ្ពស់ៗ

ដូច្នេះហើយបើបងប្អូនមានបញ្ហាដូចបានរៀបរាប់ខាងល់គួរឆាប់មកពិនិត្យជាមួយក្រុមគ្រូពេទ្យឯកទេសនៃមន្ទីរពេទ្យកាល់ម៉ែត ដើម្បីពិគ្រោះជំងឺឱ្យបានលឿនកុំទុកឱ្យបញ្ហានេះរំខានបងប្អូន៕»