ព្រឹត្តិការណ៍ស៊ីហ្គេមខិតជិតដល់ពេលបញ្ចប់ ងាកត្រឡប់មកក្រោយវិញបន្តិច ក្នុងឈុតពិសេសនៃការបើកព្រឹត្តការណ៍គឺឈុតព្រះថោងតោងស្បៃ នៅតែជាឈុតពិសេស ទាក់ការចាប់អារម្មណ៍របស់មហាជន ទាំងក្នុងនិងក្រៅប្រទេស។ ក្រៅពីការសម្តែងដ៏ល្អឥតខ្ចោះ អ្វីដែលបានឆក់យកបេះដូងអ្នកទស្សនា គឺសម្រស់ដ៏ល្អឯករបស់តួសម្តែងព្រះថោង នាងនាគ។

មិនមែនជានរណាឆ្ងាយឡើយ ស្រីស្អាតដែលបានសម្ដែងតួជាព្រះថោងគឺជាកូនខ្មែរពិតៗ ដែលមានទាំងសម្រស់ និងសមត្ថភាពពេញខ្លួន។ ឈ្មោះពិតក្រៅឆាកសម្ដែងរបស់តួព្រះថោង គាត់មានឈ្មោះថា សុគា គឹមលាង ហៅក្រៅថាកូនស្រមោច។ គាត់គឺជាអ្នករាំរបាំង ជាតារាបង្ហាញម៉ូត ដ៏ល្បីម្នាក់ផងដែរនៅប្រទេសកម្ពុជា។

បង្ហើបប្រាប់ក្រុមការងារចាបបៃតង កូនស្រមោច បានឱ្យដឹងថាមូលហេតុដែលគាត់បានមានឱកសចូលសម្តែងក្នុងមហាព្រឹត្តិការណ៍ស៊ីហ្គេមលើកទី៣២ ដែលកម្ពុជាជាម្ចាស់ផ្ទះ បង្ហាញឈុតរបាំដ៏មានអត្តន័យរបស់កម្ពុជាទៅកាន់ពិភពលោក ក៏ព្រោះតែរូបគាត់ផ្ទាល់មានអាទិភាពមានកម្ពស់ខ្ពស់ មួយវិញទៀតការរាំរបាំរបស់កញ្ញាគឺស័ក្តសមនឹងតួនារោទិ៍ ទើបថ្នាក់ដឹងនាំសម្រេចយកកញ្ញាជាសម្តែងក្នុងឈុតព្រះថោងនេះ។

និយាយយ៉ាងរំជួលចិត្ត កូនស្រមោច បានលើកឡើងថា " សម្រាប់អារម្មណ៍ខ្ញុំផ្ទាល់គ្រាន់តែដឹងថាខ្លួនឯងមានឱកាសបានសម្តែងជាព្រះថោង ក្នុងឈុតកកើតទឹកដី សប្បាយចិត្តនិងមោទនភាពបំផុត ដោយសារជាកម្មវិធីប្រវត្តិសាស្ត្រដែលខ្មែរយើងរងចាំអស់រយៈពេលជាង៦០ឆ្នាំមកហើយ។ ម្យ៉ាងវិញទៀត ចាប់តាំងពីការសម្តែងក្នុងព្រឹត្តិការណ៍នេះបានបញ្ចប់ សង្កេតឃើញថារបាំខ្មែរ សិល្បៈករខ្មែរ កាន់តែមានអ្នកស្គាល់ ចាប់អារម្មណ៍ច្រើន ជូយផ្សព្វផ្សាយបន្តគ្នាទាំងក្នុងស្រុក និងបរទេសជាដើម"។

សិល្បៈកររូបនេះ ពិតជាស័ក្តសមនឹងត្រូវបានជ្រើសរើសសម្តែងក្នុងព្រឹត្តិការណ៍ធំពិតមែន ទាំងរូបសម្រស់ អត្តចរិត ទាំងចំណេះដឹង ជំនាញផងដែរ។ មិនត្រូវតែមានសម្រស់ដ៏ស្រស់ស្អាតស្រទន់ពីធម្មជាតិប៉ុណ្ណោះទេ នារីខ្មែររូបនេះមានដុងរាំរបាំងតាំងពីក្មេង អាយុ៩ឆ្នាំមកម្ល៉េះ មុនចូលរៀននៅសាលាទៅទៀត។ នៅពេលកំពុងសិក្សាក្នុងថ្នាក់ទី៩នៅឡើយ ដោយក្ដីស្រឡាញ់របាំបុរាណខ្មែរ ចេះតែហ្វឹកហាត់រហូតមានឱកាសចូលសម្តែងក្នុងកម្មវិធីនានារបស់ស្ថាបន្យ ក្រសួងផ្សេងៗរហូតមក។ ក្នុងឆ្នាំ២០១៦ កញ្ញាក៏បាន បញ្ចប់ការសិក្សាផ្នែករបាំបុរាណខ្មែរនៅសាលាមធ្យមវិចិត្រសិល្បៈផងដែរ។ ដោយសមត្ថភាព អមជាមួយរូបសម្រស់អំណោយផលពីធម្មជាតិ កញ្ញាក៏ចាប់ឱកាសក្លាយជាតារាដើរម៉ូដ សម្តែងរឿងអប់រំបែបព្រះពុទ្ធសាសនា និងធ្វើឱ្យម៉ូឌែលសម្អាងការនានា រហូតមកដល់បច្ចុប្បន្ននេះ៕

អត្ថបទដោយ៖ Senghong