បញ្ហាធ្មេញខូចខ្លាំងដោយសារកត្តាឆ្លងមេរោគ ឬពុកខូចទាំងស្រុង ដែលធ្វើឱ្យបាត់បង់ធ្មេញ វាអាចបង្កចេញជាផលរំខានដល់ជីវិតរស់នៅជាច្រើនរួមមានដូចជា បាត់បង់ឆ្អឺងថ្គាម បាត់បង់សោភ័ណភាពធ្មេញ បាត់បង់មុខងារទំពារ និងសាច់អញ្ចាញនៅតំបន់ធ្មេញបាត់, អាចស្រុតនៅពេលទំពារអាហារប៉ះពាល់យូរៗទៅ។ ល័ក្ខខ័ណ្ឌបាត់បង់ធ្មេញទាំងស្រុងនេះដែរ បើនិយាយចំពោះវិធីសាស្ត្រដោះស្រាយដែលល្អ និងទាន់សម័យបំផុត គឺមានតែការដាំបង្គោលធ្មេញក្នុងឆ្អឹងប៉ុណ្ណោះ(Dental Implant)។
ផ្អែកតាមការចែករំលែករបស់ទន្តបណ្ឌិត ហួត សុវណ្ណលាភ ឯកទេសខាងផ្នែកវះកាត់ និងដាំបង្គោលធ្មេញ បានលើកឡើងឱ្យដឹងថា ការដាំបង្គោលធ្មេញក្នុងឆ្អឹង គឺជាបច្ចេកទេសថ្មីចុងក្រោយមួយដែលជួយផ្សាំឬសធ្មេញសិប្បនិមិ្មតផលិតចេញពីTitanium ដើម្បីភ្ជាប់ជាមួយធ្មេញសិប្បនិម្មិតថ្មីដែលមានលក្ខណៈមាំស្រដៀងទៅនឹងធ្មេញធម្មជាតិអញ្ចឹងដែរ ប្រើប្រាស់បានយូរអង្វែងប្រកបដោយសុវត្ថិភាពខ្ពស់។
១. អត្ថប្រយោជន៍នៃការដាំបង្គោលធ្មេញ៖
- ស្តារមុខងារទំពារ
- ស្តារសោភ័ណភាពធ្មេញ
- ការពារការបាត់បង់ឆ្អឹងថ្គាមកាន់តែច្រើន
- រក្សាធ្មេញឱ្យមានស្ថេរភាព
- លើកកម្ពស់គុណភាពជីវិត។
២. ល័ក្ខខ័ណ្ឌដែលអាចដាំបង្គោលធ្មេញបាន៖
- ឆ្អឹងថ្គាមលូតលាស់យ៉ាងពេញលេញ
- មានឆ្អឹងគ្រប់គ្រាន់ ដើម្បីធានាអាចដាំបង្គលបានជាប់ និងរឹងមាំ
- មានជាលិកាមាត់ដែលមានសុខភាពល្អ
- ចង់កែលម្អការនិយាយ
- មានឆន្ទៈក្នុងការប្តេជ្ញាចិត្តចំណាយពេលជាច្រើនខែដើម្បីធ្វើការដាំបង្គោលធ្មេញ
- មិនមានស្ថានភាពសុខភាពដែលប៉ះពាល់ដល់សុខភាពឆ្អឹងទេ។