យោងទៅតាមការចុះផ្សាយរបស់គេហទំព័រ verywellhealth.com បង្ហាញថា ការទទួលទានកាហ្វេជាប្រចាំ អាចជួយបន្ធូរបន្ថយអត្រានៃការស្លាប់ ដោយសារគាំងបេះដូងបានប្រមាណជា ២២%។ ជាងនេះទៅទៀតសោត បើយោងតាមការប្រភព insider.com បានលើកពីអត្ថប្រយោជន៍របស់កាហ្វេឱ្យដឹងដែរថា ការផឹកកាហ្វេ ៤ ពែងក្នុងមួយថ្ងៃនឹងជួយដាស់អារម្មណ៍ឱ្យភ្ញាក់ពីគេង មិនមានអារម្មណ៍ថាល្វើយ និងមានការរំលាយអាហារជាតិខ្លាញ់ល្អប្រសើរ។ ផ្អែកលើការបកស្រាយបន្ថែមរបស់ក្រុមវេជ្ជបណ្ឌិតចេញផ្សាយដោយ javapresse.com បានស្តែងឱ្យដឹងពីពេលវេលាដែលល្អឥតខ្ចោះសម្រាប់ទទួលទានកាហ្វេ ដើម្បីទាញប្រយោជន៍បានយ៉ាងមានប្រសិទ្ធភាព៖

១. ពេលវេលាល្អសម្រាប់ទទួលទាន

កាហ្វេខ្មៅល្អបំផុតសម្រាប់ការសម្រកទម្ងន់ ព្រោះវាមិនមានផ្ទុកជាតិស្ករ ឬខ្លាញ់ដែលអាចរួមចំណែកដល់ការឡើងទម្ងន់ឡើយ។ ជាការណែនាំរបស់ក្រុមអ្នកជំនាញកាហ្វេគឺជាជម្រើសល្អសម្រាប់អាហារសម្រន់ នៅចន្លោះពេលព្រឹក រវាងពេលថ្ងៃត្រង់ និងចន្លោះពេលថ្ងៃត្រង់រវាងពេលល្ងាច ព្រោះសមត្ថភាពរបស់វាអាចទប់ស្កាត់ការឃ្លានបានរយៈពេលយូរ។ ខាងក្រោមនេះជាពេលវេលាដែលអ្នកគួរទទួលទានកាហ្វេអ៊ីន៖

ចន្លោះម៉ោង ៩ព្រឹកចុះក្រោម (មិនសូវល្អ)

ម៉ោង ៩កន្លះព្រឹក ដល់ ម៉ោង១១កន្លះ (ល្អ)

ម៉ោង ១២រសៀល ដល់ ម៉ោង០១រសៀល (មិនល្អ)

ម៉ោង ០១រសៀល ដល់ ០៥ល្ងាច (ល្អ)

ចាប់ពីម៉ោង ៥ល្ងាចទៅ(មិនល្អ)

២. ក្បួន Nappucinos

Nappucinos មកពីពាក្យ Coffee + Afternoon nap ដែលក្បួននេះត្រូវបានអ្នកជំនាញកំណត់ទៅលើ ការគេងថ្ងៃ ដោយគេជឿថា ការញ៉ាំកាហ្វេហើយគេងរយៈពេល២០នាទី នឹងជួយបង្កើនផលិតភាពការងារ ពង្រឹងការផ្តោតអារម្មណ៍ ធ្វើឱ្យអារម្មណ៍ស្រស់ស្រាយ បន្ទាប់ពីភ្ញាក់មកវិញ។ លោកវេជ្ជបណ្ឌិត Pink បានណែនាំ ថា ក្បួន Nappucinos គួរធ្វើនៅចន្លោះម៉ោង ២ និង ៤ រសៀល ជាពេលវេលាកម្រិត cortisol ធ្លាក់ចុះ និងត្រូវការឱ្យខួរក្បាលសម្រាក។