ស៊ុតជាអាហារដែលពេញនិយមសម្រាប់មនុស្សគ្រប់វ័យ តម្លៃសមរម្យ ងាយស្រួលរក ងាយស្រួលចំអិនចំណេញពេលវេលា ថែមទាំងមានគុណប្រយោជន៍ជាច្រើនដល់សុខភាពផងដែរ។ តើស៊ុតជំនួយអ្វីខ្លះដល់សុខភាព? តើគួរទទួលទានស៊ុតបែបណា ក្នុងបរិមាណប៉ុន្មានទើបអាចទាញយកអត្ថប្រយោជន៍ពីស៊ុតជំនួយសុខភាពនិងសម្រស់បាន?

ផ្អែកតាម ការលើកឡើងរបស់ អ្នកជំនាញអាហារូបត្ថម្ភ អ្នកស្រី Dr Rohini Patil និងជាស្ថាបនិករបស់ក្រុមហ៊ុន Nutracy Lifestyle បានឱ្យដឹងពីអត្ថប្រយោជន៍សំខាន់ៗទាំង៥របស់ស៊ុតដូចជា៖

ជួយថែរក្សាសុខភាពភ្នែក៖ ស៊ុតមានផ្ទុកនូវសារជាតិ lutein ដ៏ច្រើន និងសារធាតុប្រឆាំងអុកស៊ីតកម្មដ៏មានប្រយោជន៍ ជួយកាត់បន្ថយហានិភ័យនៃជំងឺភ្នែកឡើងបាយ ព្រមទាំងជាប្រភពវីតាមីនA ជំនួយដល់សុខភាពភ្នែកផងដែរ។

បង្កើនកូឡេស្ត្រេរ៉ុលល្អ ៖ ទទួលទានស៊ុតជួយបង្កើនកូឡេស្ត្រេរ៉ុលល្អជាហេតុធ្វើឱ្យកាត់បន្ថយហានិភ័យនៃជំងឺបេះដូងផងដែរ និងកម្ចាត់កូឡេស្ត្រេរ៉ុលមិនល្អចេញផងដែរ។

អាចគ្រប់គ្រងការឃ្លាន៖ ទទួលទានស៊ុតសម្បូរដោយវីតាមីន ធ្វើឱ្យឆ្អែតបានយូរ ទប់ស្កាត់ចំណង់ទទួលទានអាហារផ្តេសផ្ដាស ហេតុនេះស៊ុតស័ក្តសមបំផុតសម្រាប់អ្នកកំពុងថែរាងនិងសម្រកគីឡូ។

ជំនួយខួរក្បាល៖ ក្នុងស៊ុតមានសារធាតុកូលីន ដែលជួយបង្កើតភ្នាសកោសិកា ជំនួយដល់សុខភាពខួរក្បាល។

ផ្ដល់អូមេហ្គា3 ដល់រាងកាយ៖ Omega-3s គឺជាអាស៊ីតខ្លាញ់ polyunsaturated fatty acids និងមានខ្លាញ់សំខាន់ៗ ដែលដើរតួនាទីយ៉ាងសំខាន់ក្នុងរបៀបដែលភ្នាសកោសិការបស់អ្នកដំណើរការ។ អូមេហ្គា3 ល្អសម្រាប់ការកាត់បន្ថយជំងឺវង្វេង និងរក្សាសុខភាពផ្លូវចិត្តផងដែរ។

ជាមួយគ្នានោះ គេណែនាំឱ្យទទួលទានស៊ុតធ្វើជាអាហារពេលព្រឹក វានឹងផ្តល់ថាមពលដល់រាងកាយ ធ្វើឱ្យឆ្អែតពេញមួយថ្ងៃ។ សម្រួលប្រព័ន្ធរំលាយអាហារបានល្អនៅពេលព្រឹក ដូច្នេះវានឹងងាយស្រួលក្នុងការបំបែកប្រូតេអ៊ីន និងសារធាតុចិញ្ចឹមជាច្រើនទៀតដែលមាននៅក្នុងស៊ុត ផ្គត់ផ្គង់ទៅរាងកាយ។ គួរទទួលទានស៊ុត លាយជាមួយបន្លែដែលសម្បូរជាតិកាកសរសៃ នោះវានឹងកាន់តែល្អសម្រាប់សុខភាព។ តាមការសិក្សាឱ្យដឹងថា ទទួលទានស៊ុតបរិមាណ១ឬ២គ្រាប់ ក្នុងមួយថ្ងៃ មិនធ្វើឱ្យឡើងកូឡេស្ត្រេរ៉ុលហួសកម្រិតនោះទេ ថែមទាំងកាត់បន្ថយហានិភ័យជំងឺបេះដូងផងដែរ។ សម្រាប់អ្នកដែលចង់ទទួលទានដើម្បីសម្រកគីឡូ អាចទទួលទានស៊ុតពណ៌ស ២គ្រាប់ ក្នុង១ថ្ងៃបាន។ មិនតែប៉ុណ្ណោះទទួលទានស៊ុតពណ៌សរាល់ថ្ងៃជួយផ្ដល់ខូឡាជេនដល់រាងកាយ ធ្វើឱ្យក្មេងបានយូរ សក់ ក្រចកដោះលឿនផងដែរ៕

អត្ថបទដោយ៖ Senghong