ជ្រុះសក់ខ្លាំងជាប្រចាំថ្ងៃ គឺជាបញ្ហាមិនល្អមួយបង្ហាញពីសុខភាពរាងកាយ ខណៈពេលដែលបញ្ហាសក់ជ្រុះខ្លាំងនេះ គឺអាចបណ្ដាលមកពីកត្តាគួបផ្សំផ្សេងៗដូចជា កង្វះវីតាមីន បម្រែបម្រួលវ័យ អរម៉ូន ហ្សែនពីកំណើត និងសូម្បីតែអ្នកលេបថ្នាំមួយចំនួនដូចជា ថ្នាំពន្យាកំណើតក៏អាចធ្វើឱ្យជ្រុះសក់បានដែរ។

ផ្អែកទៅតាមប្រភព webmd បានលើកយកនូវក្រុមអាហារផ្ទុកជាតិវីតាមីនចំនួន៥មុខ ដែលអ្នកមានបញ្ហាសក់គួរញុំាជាប្រចាំថ្ងៃប្រចាំពេល ដើម្បីជំនួយសក់ឱ្យដុះលូតលាស់បានល្អប្រសើរឡើងវិញ៖

១. ដំឡូងជ្វា៖ ដំឡូងជ្វា មានផ្ទុកទៅនូវសារធាតុ បេតាការ៉ូទីនដែលរាងកាយយើងនឹងអាចបំលែងទៅជាវីតាមីន A ជួយការពារសក់ស្ងួត សក់សំពោង។ សារជាតិមួយនេះ ​ក៏​ជួយ​ជំរុញ​ដល់​ក្រពេញ​ក្នុង​ស្បែកក្បាល​ឱ្យ​បង្កើត​ជាតិ​ប្រេង​ម្យ៉ាង​ហៅថា សេប៊ុម (Sebum) ការពារ​សក់​កុំឱ្យសក់​ស្ងួតគ្មានសំណើម បណ្ដាលឱ្យសក់ងាយផុយ ឬដុះលូតលាស់មិនមានលក្ខណៈល្អ។

២. ស៊ុត៖ ​វីតាមីន B ដែល​មាន​ឈ្មោះ​ថា Biotin មានក្នុងស៊ុត ​ជួយ​សក់ឱ្យ​ដុះលឿន និង​ពង្រឹង​ក្រចក​ដៃ​ដែល​ផុយ។ ការសិក្សាស្រាវជ្រាវមួយ បានពិសោធន៍ឃើញថា ​ក្នុងចំណោម​ស្ត្រី​មួយ​ក្រុម​ដែល​មាន​ការ​ជ្រុះ​សក់ ៣៦% ​ត្រូវ​បាន​គេ​កំណត់​ថា​ មាន​កង្វះ​សារធាតុ biotin។ ហេតុនេះការញ៉ាំស៊ុត នឹងអាចបំពេញសារធាតុ Biotin ដែលចាំបាច់សម្រាប់ផលិត keratin ដែលជាប្រភេទប្រូតេអ៊ីនសក់។

៣. Oats៖ កំហាប់ខ្ពស់នៃសារធាតុចិញ្ចឹមសំខាន់ៗដូចជា ជាតិដែក ស័ង្កសី និងអាស៊ីតខ្លាញ់អូមេហ្គា ៦ មាននៅក្នុង Oats មានសារៈសំខាន់ក្នុងការថែរក្សាស្បែកក៏ដូចជាសុខភាពសក់។ អ្នកអាចញ៉ាំ oats សម្រាប់អាហារពេលព្រឹករៀងរាល់ពីរបីដងក្នុងមួយសប្តាហ៍ ដើម្បីធានាថាសក់របស់អ្នកទទួលបានសារធាតុចិញ្ចឹមទាំងអស់ដែលវាត្រូវការ។

៤. អយស្ទ័រ៖ ជាតិស័ង្កសីមានក្នុងអយស្ទ័រ ត្រូវបានគេជឿថា​ មានសមត្ថភាពគ្រប់គ្រាន់ជួយដោះស្រាយបញ្ហាសក់ជ្រុះច្រើនជាប្រចាំ សូម្បីតែនៅក្នុងរោមភ្នែកក៏អាចការងារមិនឱ្យជ្រុះផងដែរ។ កោសិកាដែលបង្កើតសក់ គឺពឹងផ្អែកលើជាតិស័ង្កសីដែលមានក្នុងសរីរាង្គ ដើម្បីជួយសរសៃសក់ដែលត្រូវដុះឡើងនោះមានសភាពរឹងមាំ ជាមួយសុខភាពល្អ។ សារជាតិស័ង្កសីនេះដែរ មិនមែនមានតែនៅក្នុងអយស្ទ័រទេ វាក៏មាននៅក្នុងរបបអាហារផ្សេងៗទៀតដូចជា ក្តាម បង្កង និងធញ្ញជាតិដូចគ្នា។

៥. ស្ពៃខ្មៅ៖ បន្លែមួយប្រភេទនេះសម្បូរទៅដោយវីតាមីន និងសារធាតុចិញ្ចឹមដូចជា ហ្វូឡាត ជាតិដែក វីតាមីន A និងវីតាមីន C ដែលសុទ្ធតែមានសារៈប្រយោជន៍សម្រាប់ការលូតលាស់សក់ និងការពារសក់ជ្រុះ។

ក្រៅពីការញ៉ាំអាហារ អ្នកត្រូវបូកបន្ថែមជាមួយទម្លាប់៣ខាងក្រោមដើម្បីជួយឱ្យសរសៃសក់របស់អ្នកកាន់តែរឹងមាំ ព្យាបាលស្បែកក្បាល សក់ដុះលឿន៖

១. ឈប់សិតសក់៖ ស្តាប់មើលទៅដូចជាហូសចិត្តស្មានមិនដល់ ជាពិសេមនុស្សស្រីដែលចូកចិត្តសិតសក់ញឹកញាប់។ ជាការរពិតណាស់​ការសិតសក់ញឹកញាប់ពេកបណ្តាលឱ្យសក់ជ្រុះកាន់តែខ្លាំង ជាពិសេសចំពោះអ្នកដែលមានសរសៃសក់ខ្សោយស្រាប់ នៅពេលដែលយើងព្យាយាមសិតវាញឹកញាប់ទៀតគឺវាកាន់តែបន្ថែមឱ្យសក់ជ្រុះកាន់តែខ្លាំងថែមទៀត។

២. ហាមសិតសក់ពេលសក់នៅសើម៖ នៅពេលដែលសក់យើងទើបតែកក់រួច គល់សក់របស់យើងវាបើកធំ ហើយពេលនោះបើយើងព្យាយាមសក់វាទៀតនោះសក់នឹងជ្រុះមកដោយទៅតាមក្រាស់របស់អ្នកកាន់តែខ្លាំង។

៣. កុំកក់សក់ញឹកពេក៖ គួរកត់ទៅតាមកាលវិភាគ និងប្រភេទនៃសក់ដូចខាងក្រោម៖

·   សក់​មាន​ជាតិ​ប្រេង៖ ត្រូវកក់ជា​រៀង​រាល់​ថ្ងៃ ដើម្បី​ការពារ​ការ​កកើត​ជាតិ​កខ្វក់

·   សក់ស្ងួត ខូច៖ ត្រូវកក់រៀងរាល់ ៥-៧ ថ្ងៃម្តង ដើម្បីទុកប្រេងធម្មជាតិមួយចំនួននៅលើ ស្បែកក្បាល ។

·   សក់ស្តើង សរសៃតូចៗ ៖ ត្រូវកក់ជារៀងរាល់ថ្ងៃ ដើម្បីផ្តល់សំណើមដល់សក់របស់អ្នកឱ្យបានគ្រប់គ្រាន់

·   សក់រួញ អង្កាញ់៖ ត្រូវកក់រៀងរាល់ ៤-៥ ថ្ងៃម្តង អាស្រ័យលើដង់ស៊ីតេសក់របស់អ្នក។

·   សក់រួញ៖ ត្រូវកក់ម្តងក្នុងមួយសប្តាហ៍សម្រាប់ការលូតលាស់សក់ល្អបំផុត៕

អត្ថបទដោយ៖ មឿន គន្ធា