កាលពីថ្ងៃទី១១ ខែឧសភា ឆ្នាំ២០២២ កន្លងទៅនេះក្រសួងបរិស្ថាន ក្រសួងសាធារណការ និងដឹកជញ្ជូន និងទីភ្នាក់ងារបារាំងបានចុះហត្ថលេខាលើអនុស្សរណៈស្តីពី«ការអនុវត្តគម្រោង លើកកម្ពស់ គុណភាពខ្យល់នៅកម្ពុជា»។

ការចុះអនុស្សរណៈរវាងក្រសួងទាំងពីរនិងទីភ្នាក់ងារបារាំង ក្នុងគោលបំណងសំខាន់ទប់ស្កាត់ និងកាត់បន្ថយ ការបំពុលខ្យល់សាធារណៈ និងផែនការខ្យល់ ស្អាត កម្ពុជា ដែលជាផែនការ យុទ្ធសាស្រ្តជាតិសម្រាប់កំណត់ សកម្មភាពកាត់បន្ថយ ការបញ្ចេញសារធាតុបំពុលខ្យល់នៅកម្ពុជា សំដៅធានាឱ្យបាន នូវស្រទាប់ បរិយាកាស ទ្រទ្រង់ជីវិតដ៏ល្អប្រសើរ។

ទន្ទឹមនឹងនេះផងដែរ ឯកឧត្តម តូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូន បានមានប្រសាសន៍ថា តាមរយៈការចុះហត្ថលេខាលើ MOU នេះក្រសួងទាំង២ នឹងពង្រីកកិច្ចសហប្រតិបត្តិការបន្ថែមទៀត លើការងារកាត់បន្ថយការបំភាយឧស្ម័នដោយយានយន្ត ដើម្បីលើកកម្ពស់ គុណភាពខ្យល់ និងឈានទៅរកការលើកកម្ពស់សុខមាលភាពរបស់ប្រជាពលរដ្ឋយើងផងដែរ។

លោក Yazid Bensaid នាយកទីភ្នាក់ងារបារាំងសម្រាប់អភិវឌ្ឍន៍ (AFD )ប្រចាំតំបន់អាស៊ីអាគ្នេយ៍ បានមានប្រសាសន៍ថាAFD បានគាំទ្រលើគម្រោងចំនួន ៣២ ពាក់ពទ្ធ័នឹងវិស័យ បច្ចេកវិទ្យាបរិស្ថាន សេដ្ឋកិច្ច និងដឹកជញ្ជូន។ ដោយបានធ្វើកិច្ចសហប្រតិបត្តិការជាមួយក្រសួងស្ថាប័នជាច្រើន និងគម្រោង ដើម្បីធ្វើអោយប្រសើរឡើងនូវគុណភាពខ្យល់។

ក្រសួងបរិស្ថានបាន បញ្ជាក់ទៀតថា ការចុះហត្ថលេខាលើអនុស្សរណៈនៃការយោគយល់ ស្តីពីការអនុវត្តកម្មវិធីលើកកម្ពស់គុណភាពខ្យល់នាថ្ងៃនេះ ទីភ្នាក់ងារអភិវឌ្ឍន៍បារាំង នឹងគាំទ្រ២ ចំនុចសំខាន់គឺ ១-ការបណ្តុះបណ្តាលដល់មន្រ្តីជំនាញ និងការរៀបចំបទប្បញ្ញតិ និងគោលនយោបាយពាក់ពន្ធ័ទៅនឹងការកម្រិតការបំភាយឧស្ម័នពីយានយន្ត ២-ការជួយអភិវឌ្ឍន៍គម្រោងនានាទាក់ទងនឹងការបំលាស់ទី ដោយថាមពលអគ្គិសនី។

គួរជម្រាបដែរថាបច្ចុប្បន្នគុណភាពខ្យល់ក្នុងប្រទេសកម្ពុជាយើងគឺមានគុណភាពល្អស្រាប់ហើយដែលជាអំណោយផលមួយជួយទ្រទ្រង់ដល់សុខភាពប្រជាជនយើងនៅទូទាំងប្រទេស។ជាក់ស្ដែងតាមការឱ្យដឹងរបស់ក្រសួងទេសចរណ៍ចុះផ្សាយនាថ្ងៃទី១២ខែឧសភាពបានឱ្យដឹងថាគុណភាពខ្យល់២៤រាជធានីខេត្តសុទ្ធតែមានកម្រិតល្អណាស់ និងខេត្តកំពុងស្ពឺគឺស្ថិតក្នុងកម្រិតល្អ។



ប្រភព៖ Ministry of Environment

អត្ថបទដោយ ណា ឃីម