អ្នកវិទ្យាសាស្ត្របាននិយាយយ៉ាងច្បាស់ៗថា ការដែលទទួលទានអាហារបានត្រឹមត្រូវ នឹងជួយឱ្យមនុស្សមានអាយុវែង រស់នៅយ៉ាងមានសុខភាពល្អ មិនមានជំងឺ។ បើយើងនិយាយពីអាហារ ពិតណាស់វាមានច្រើនប្រភេទ ហើយមនុស្សតែងពេញនិយមញ៉ាំតែអាហារណាដែលគិតត្រឹមរសជាតិឆ្ងាញ់ មានពណ៌ស្អាត រូបរាងទាក់ទាញប៉ុណ្ណោះ។ តាមពិតទៅ នេះមិនមែនជាការត្រឹមត្រូវនោះទេ ជ្រុលតែចំណាយលុយទិញអាហារច្រើនហើយ អ្នកគួរតែរើសយកអាហារណាដែលមានប្រយោជន៍ច្រើនដល់សុខភាពអ្នក ញ៉ាំឆ្អែត ឆ្ងាញ់ ហើយមិនបង្កហានិភ័យនៅថ្ងៃមុខឱ្យបានច្រើនជាងអាហារដែលគ្រាន់តែឆ្ងាញ់មាត់ ឆ្អែតពោះ។

ខាងក្រោមនេះ ជាក្រុមអាហារដែលអ្នកគួរទទួលទានឱ្យបានច្រើន បំប៉នសរីរាង្គធំៗក្នុងរាងកាយដូចជាខួរក្បាល បេះដូង និងឆ្អឹង ដែលអាចជួយឱ្យអ្នកមានអាយុវែង រស់យ៉ាងមានក្ដីសុខ មិនមែនរស់ចិញ្ចឹមតែជំងឺនោះទេ៖

អាហារជួយឱ្យបេះដូងខ្លាំង៖ អ្នកស្រី Cheryl Rock សាស្ត្រាចារផ្នែកវេជ្ជសាស្ត្រសាធារណៈនៅសាកលវិទ្យាល័យកាលីហ្វរញ៉ា និងវេជ្ជបណ្ឌិតជំនាញ Michele Bellantoni បានឱ្យដឹងពីដើម្បីឱ្យបេះដូងមានសុខភាពល្អបាន ចាំបាច់ក្នុងការគ្រប់គ្រងយ៉ាងណាកុំឱ្យលើសគីឡូ។ មនុស្សភាគច្រើនចូលវ័យកាន់តែចាស់ ពួកគេនឹងជួបបញ្ហាលើសគីឡូ ដែលជាកត្តាជំរុញមួយ ធ្វើឱ្យកើតជំងឺបេះដូង មហារីក ទឹកនោមផ្អែមជាដើម។ ហេតុនេះ អាហារដែលគួរញ៉ាំដើម្បីឱ្យបេះដូងខ្លាំង ប្រឆាំងជំងឺបានមានដូចជា ត្រី ព្រោះត្រីសម្បូរអូមេហ្គា៣ ទ្រួងមាន់(យកស្បែកចេញ) គ្រាប់ធញ្ញាជាតិមិនមែនចាំបាច់តែអាល់ម៉ុន ពពួកណាត់(Nuts) នោះទេ អាចញ៉ាំជាពពួកសណ្ដែកក្រហម សណ្តែកខៀវ សណ្ដែកខ្មៅ សណ្ដែកដីជាដើម។ ពពួកបន្លែបៃតង និងផ្លែឈើ អាហារទាំងនេះ សម្បូរកាកសរសៃមិនធ្វើឱ្យធាត់ឬលើសគីឡួ អាការបេះដូងបានល្អ។

អាហារជួយឱ្យខួរក្បាលខ្លាំង៖ ខួរក្បាលចុះខ្សោយ ខ្សោយការចងចាំ ត្រូវបានគេរកឃើញថាផ្សារភ្ជាប់គ្នានឹងកង្វះវីតាមីនB12 ហេតុនេះអ្នកគួរទទួលទានអាហារដែលសម្បូរវីតាមីនB12ឱ្យបានច្រើន។ អាហារដែលគួរញ៉ាំមានដូចជា ត្រី បន្លែ​ ផ្លែឈើ គ្រាប់ធញ្ញជាតិដដែល។ គ្រាន់តែគួរញ៉ាំគ្រាប់ធញ្ញពេលព្រឹកដើម្បីជំនួយខួរក្បាល ផ្លែឈើដែលគួរញ៉ាំច្រើន គឺពពួកផ្លែប៊ឺរី បន្លែដូចជាខាត់ណា ប៉េងប៉ោះ ស្ពៃណាច។ គួរទទួលទានទឹកដោះគោ(គ្មានស្ករ)ឱ្យបានទៀងទាត់  នឹងគួរកាត់បន្ថយអាហារពពួកន៉បុ័ង នំនេក ដែលធ្វើពីម្សៅស ម្សៅឡើងមានក្រេម និងជាតិស្ករច្រើន ភេសជ្ជៈផ្អែម អាហារបំពង និងសាច់ក្រហម។  

អាហារជួយឱ្យឆ្អឹងខ្លាំង៖ កាល់ស្យូមជាសារធាតុសំខាន់សម្រាប់ការលូតលាស់ និងជួយឱ្យឆ្អឹងរឹងមាំ។ អាហារដែលសម្បូរកាល់ស្យូមច្រើន មាននៅក្នុងអាហារនិងភេសជ្ជៈដែលធ្វើពីទឹកដោះគោ ហេតុនេះអ្នកគួរញ៉ាំយ៉ាអ៊ួរគ្មានជាតិស្ករ និងខ្លាញ់ច្រើន ឈីស សាច់គ្មានខ្លាញ់ អាហារសមុទ្រ និងសណ្ដែកផងដែរ នេះបើផ្អែកតាមប្រភព webmd។

ជាមួយគ្នានេះដែរ លោកតាទួន ទេស ដែលជាព្រឹទ្ធឹចារ្យខ្មែរមួយរូប ដែលមានវ័យ៩៦ឆ្នាំហើយ សុខភាពគាត់នៅតែមាំទាំ លោកតាមបានប្រាប់ថាទម្លាប់ក្នុងការរស់នៅរបស់គាត់គឹមិនទទួលទានគ្រឿងស្រវឹង មិនផឹកភេសជ្ជៈផ្អែមៗឬកំប៉ុង មិនជក់បារី មិនសូវទទួលទានអាហារដែលរឹងៗពិបាករំលាយ គាត់ទទួលទានបន្លែច្រើន ទទួលទានអាហារទៀងម៉ោង ហើយលោកតាតែងមានទម្លាប់ហាត់ប្រាណជាប្រចាំផងដែរ។ ជារួមមកចង់បានអាយុវែង អ្នកគួរតែព្យាយាមញ៉ាំអាហារល្អៗឱ្យបានច្រើនជាងអាហារដែលបំផ្លាញសុខភាព​ ធ្វើលំហាត់ប្រាណឱ្យបានទៀងទាត់ និងគេងបានឱ្យគ្រប់គ្រាន់ផងដែរ៕

អត្ថបទដោយ៖ Senghong