នៅពេលដែលអ្នកអាយុច្រើនបន្តិច សុខភាពឆ្អឹងនឹងចាប់ផ្តើមខ្សោយ ជាពិសេសនៅសន្លាក់ គន្លាក់ជង្គង់ ចង្កេះ ខ្នងនិងស្មារជាដើម។ ការឈឺសន្លាក់ក្នុងដំណាក់កាលដំបូងអាចស្ថិតក្នុងការទ្រាំបាន ប៉ុន្តែនៅពេលដែលឈឺរយៈពេលយូរ វាអាចបង្ករទៅជាបញ្ហារលាកសន្លាក់ រលាកឆ្អឹង សឹករិចរិលសន្លាក់ជង្គង់ រហូតដល់ឈានដល់ការពិការប្រសិនបើមិនបានទទួលការវះកាត់។ ហេតុនេះ វាគឺជារឿងល្អបំផុត នៅពេលដែលអ្នកចេះចាប់ផ្តើមយកចិត្តទុកដាក់មើលថែលើឆ្អឹងខ្លួនឯងពីក្មេងឱ្យហើយ ពេលមិនទាន់ឈឺ។

ជាការចែករំលែក វេជ្ជបណ្ឌិត Pornpavit Sripirom ដែលជាវេជ្ជបណ្ឌិតឯកទេសផ្នែកវះកាត់ឆ្អឹង ប្រចាំនៅមន្ទីរពេទ្យប៉ៅឡូដ៏ល្បីនៅប្រទេសថៃបានផ្តល់បទសម្ភាសមកកាន់ក្រុមការងារHealthy Cambodia ថា “ដើម្បីឱ្យឆ្អឹងរឹងមាំល្អ មិនងាយឈឺពេលចាស់ទៅ ឬចាស់ហើយក៏អាចថែរក្សាឆ្អឹងឱ្យបានល្អដែរ បើអ្នកទាំងអស់គ្នាមានទម្លាក់រស់នៅល្អ សកម្មភាព ទទួលទានចំណីរអាហារល្អ និងមានសកម្មភាពរាងកាយ”។

លោកវេជ្ជបណ្ឌិតបានពន្យល់ថា ឆ្អឹងត្រូវការឱ្យអ្នកមានលំហាត់ប្រាណជាប្រចាំ អាចជាការហែលទឹក ការដើរតិចៗ៣០នាទីរាល់ថ្ងៃ៥ថ្ងៃក្នុង១សប្តាហ៍ក៏បាន។ ចំណែកឯអាហារល្អៗជំនួយដល់ឆ្អឹងភាគច្រើនជាប្រភេទអាហារដែលសម្បូរសារធាតុវីតាមីនD កាល់ស្យូម និងប្រូតេអ៊ីន ដែលអ្នកទាំងអស់គ្នាអាចរកបាននៅក្នុង ទឹកដោះគោ ឈីស បន្លែស្លឹកបៃតង ប្រូខូលី ស្ពៃក្តោប អូក្រា សណ្តែកសៀង តៅហ៊ូ ភេសជ្ជៈរុក្ខជាតិ (ដូចជាភេសជ្ជៈសណ្តែកសៀង) គ្រាប់ធញ្ញជាតិ ត្រី​សមុទ្រ ​ត្រី​សា​ឌី​ន ប្រេងធម្មជាតិដូចជាប្រេងអូលីវ ស៊ុត ត្រីសាលម៉ុន ក្រូច ថ្លើមសត្វ សាច់សត្វគ្រប់ប្រភេទ សាច់មាន់ ស៊ុត គ្រាប់ធញ្ញជាតិ យ៉ាអ៊ួ និងត្រីជាដើម។

លើសពីនេះ លោកវេជ្ជបណ្ឌិត លើកទឹកចិត្តឱ្យនាំខ្លួនឯងធ្វើរស្មីសំយោគឱ្យបានគ្រប់គ្រាន់ជាមួយនឹងពន្លឺព្រះអាទិត្យនៅពេលព្រឹក ខ្ទង់ម៉ោង៦ដល់៧ជាងព្រឹកព្រលឹម ដើម្បីអាចអនុញ្ញាតទទួលបានវីតាមីនDពីពន្លឺព្រះអាទិត្យដែលផលិតនៅក្រោមស្បែករបស់យើង៕