នៅក្នុងគេហទំព័រសុខភាពអន្តរជាតិ Healthline គេបានឱ្យដឹងថា ហ្វាយប័រគឺជាតិសរសៃដែលមានសារៈសំខាន់ស្ទើរតែមិនគួរឱ្យជឿ។ សូម្បីតែបណ្ឌិត្យសភាអាហារូបត្ថម្ភ និងរបបអាហារ ក៏ណែនាំឱ្យទទួលទានជាតិសរសៃប្រហែល ១៤ក្រាមសម្រាប់រាល់១០០០កាឡូរីដែលអ្នកទទួលទានប្រចាំថ្ងៃដែរ។ ការញ៉ាំបានគ្រប់គ្រាន់បែបនេះ ហ្វាយប័រដែលជាជាតិសរសៃនឹងចូលទៅកាត់បន្ថយកូលេស្តេរ៉ុលអាក្រក់ចេញពីរាងកាយ។ វត្តមានហ្វាយប័រ នៅក្នុងបំពង់រំលាយអាហារ អាចជួយកាត់បន្ថយ ការស្រូបយកកូលេស្តេរ៉ុលក្នុងរាងកាយ។

បន្ថែមពីនេះទៀត សារធាតុហ្វាប័រនេះក៏អាចជួយគ្រប់គ្រងកម្រិតជាតិស្ករក្នុងឈាមឱ្យមានលំនឹងបានល្អផងដែរ។ នៅពេលដែលញ៉ាំអាហារដែលមានកម្រិតសារជាតិហ្វាយប័រខ្ពស់ រាងកាយអ្នកត្រូវការពេលយូរក្នុងការរំលាយអាហារ ហេតុនេះហើយកម្រិតជាតិស្ករក៏មិនចុះឡើងខ្ពស់នាំឱ្យមានបញ្ហាដល់ជំងឺទឹកនោមផ្អែមនោះដែរ។

អ្វីដែលកាន់តែគួរឱ្យសរសើរបំផុតពីគុណប្រយោជន៍នៃហា្វយប័រគឺកាត់បន្ថយហានិភ័យមហារីកពោះវៀនបានយ៉ាងល្អ។ ការទទួលទានជាតិសរសៃគ្រប់គ្រាន់អាចមានឥទ្ធិពលការពារប្រឆាំងនឹងប្រភេទមហារីកមួយចំនួន រួមទាំងមហារីកពោះវៀនធំផងដែរ។ មានហេតុផលជាច្រើនដែលធ្វើឱ្យអ្នកសិក្សាស្រាវជ្រាវរកឃើញបែបនេះនៅក្នុងប្រភេទនៃជាតិសរសៃមួយចំនួន។ ឧទាហរណ៍ជាក់ស្តែង សារជាតិpectinនៅក្នុងផ្លែប៉ោម អាចមានលក្ខណៈសម្បត្តិដូចជាសារធាតុប្រឆាំងអុកស៊ីតកម្ម ការពារជំងឺមហារីកផ្ទាល់ផងដែរ។

ដូចដែលអ្នកបានអានពីខាងលើមកដល់ក្រោមនេះ ឃើញហើយថាអត្ថប្រយោជន៍នៃហ្វាយប័រមានច្រើនដូចម្តេចខ្លះ។ ហេតុនេះការញ៉ាំហ្វាយប័រឱ្យបានគ្រប់គ្រាន់ ពិតជាសំខាន់ណាស់។ សារជាតុហ្វាយប័រនេះ អ្នកអាចរកបាននៅក្នុងអាហារជាច្រើនជាពិសេសពពួកបន្លែ ផ្លែឈើ គ្រប់ប្រភេទដូចជា ប៉ោម ប័រ ចេក ការ៉ុត គ្រាប់ធញ្ញជាតិគ្រប់ប្រភេទ គ្រាប់ជី ដំឡូងជ្វា និងសូកូឡាជាដើម៕

 អត្ថបទដោយ៖ កញ្ញា លីហួយ