សម្រាប់ស្រ្តីមានផ្ទៃពោះការទទួលទាន បន្លែ ផ្លែឈើនិងអាហារដែលមានសុខភាពល្អ គឺជាផ្នែកមួយសំខាន់សម្រាប់សុខភាពទូទៅ រួមទាំងទារកមានការលូតលាស់បានល្អ។ ផ្លែត្របែកគឺជាផ្លែឈើមួយដែលមានជីវជាតិច្រើន ដូចជាវិតាមីនសេ អេ បេ២ និងអឺ សារជាតិរ៉ែ និងអាស៊ីតហ្វូលិក ដែលផ្តល់នូវអត្ថប្រយោជន៍ជាច្រើនសម្រាប់ស្រ្តីមានផ្ទៃពោះ។ ម្យ៉ាងវិញទៀតផ្លែត្របែកក៏ត្រូវបានគេដឹងថាមានផ្ទុកនូវវិតាមីន អេ និងវិតាមីនសេ ច្រើនជាងផ្លែក្រូចផងដែរ។ ចំពោះអាស៊ីតហ្វូលិកនៅក្នុងផ្លែត្របែកគឺមានសារៈសំខាន់ណាស់សម្រាប់ការលូតលាស់របស់ទារក ដែលជាជំនួនក្នុងការអភិវឌ្ឍប្រព័ន្ធសរសៃប្រសាទលើទារកផងដែរ។ ក្នុងអត្ថបទនេះនឹងរៀបរាប់ពីគុណសម្បត្តិមួយចំនួនរបស់ផ្លែត្របែកសម្រាប់ស្រ្តីមានផ្ទៃពោះ៖
គ្រប់គ្រងកំរិតសម្ពាធឈាម៖ គុណប្រយោជន៍មួយនៃការបរិភោគផ្លែត្របែកនេះ អាចគ្រប់គ្រងនូវ សម្ពាធឈាម និងការពារកំណកឈាម ហើយរក្សាបាននូវលំហូរឈាមក្នុងរាងកាយស្រ្តី និងអាចជួយ ការពារពីឱកាសនៃការរលូតកូន ឬការកើតមិនគ្រប់ខែ។
គ្រប់គ្រងកម្រិតកូឡេស្តេរ៉ុល៖ ប្រភពនៃសារជាតិសរសៃច្រើននៅក្នុងផ្លែត្របែកអាចជួយរក្សាកម្រិតកូឡេស្តេរ៉ុលក្នុងឈាមបានដែរ។ កូលេស្តេរ៉ុលខ្ពស់អាចនាំឱ្យមានផលវិបាកនៃសរសៃឈាមបេះដូងដែលអាចមានហានិភ័យខ្លាំង ជាពិសេសក្នុងកំឡុងពេលមានផ្ទៃពោះ។ ដូច្នេះបរិភោគផ្លែត្របែកនឹងអាចរក្សានូវកម្រិតកូលេស្តេរ៉ុល របស់អ្នកឱ្យនៅដដែល។
បន្ថយនូវហានិភ័យនៃភាពស្លកសាំង៖ ការកង្វះជាតិដែកគឺជាមូលហេតុទូទៅបំផុតនៃភាពស្លេកស្លាំង អំឡុងពេលមានផ្ទៃពោះ មិនអាចផ្ទុកនូវអុកស៊ីសែនបានគ្រប់គ្រាន់ដល់ជាលិការពាសពេញទៅដល់ រាងកាយ ហើយអាចប៉ះពាល់ដល់សុខភាពទាំងម្តាយនិងទារក។ ប៉ុន្តែឱកាសនៃភាពស្លេកស្លាំងអាចត្រូវបានថយចុះដោយការទទួលទានអាហារដែលសំបូរទៅដោយវីតាមីនសេដូចជាផ្លែត្របែកដែលជួយក្នុងការស្រូបយកសារជាតិដែក។
សម្រួលសាច់ដុំនិងសរសៃប្រសាទ៖ សារជាតិម៉ាញ៉េស្យូមនៅក្នុងផ្លែត្របែកអាចជួយធ្វើឱ្យសាច់ដុំ និងសរសៃប្រសាទមានសភាពធូរស្បើយក្នុងពេលមានផ្ទៃពោះ។
ការពារការឆ្លងមេរោគ៖ ផ្លែត្របែកគឺជាផ្លែឈើដែលប្រឆាំងអុកស៊ីតកម្មហើយសំបូរទៅដោយវីតាមីន អេ សេនិង អឺ។ វត្តមាននៃវីតាមីន និងសារធាតុប្រឆាំងអុកស៊ីតកម្មទាំងនេះជួយប្រឆាំង និងការពារការ ឆ្លងនូវពពួកបាក់តេរី និងបន្ថយហានិភ័យនៃជំងឺផ្សេងៗ។
ការពារជំងឺទឹកនោមផ្អែមពេលមានគភ៌៖ ផ្លែត្របែកមិនត្រឹមតែជួយក្នុងការបន្ថយកម្រិតជាតិស្ករ ក្នុងឈាមប៉ុណ្ណោះទេហើយជួយក្នុងការគ្រប់គ្រង និងអាចជួយការពារជំងឺទឹកនោមផ្អែមពេលមានគភ៌។
គ្រប់គ្រងការរំលាយអាហារ៖ ការបរិភោគផ្លែត្របែកអាចជួយរក្សាបញ្ហានៃការរំលាយអាហារបានល្អ និងធានាបាននូវដំណើរការល្អនៃប្រព័ន្ធរំលាយអាហារ។ វត្តមានរបស់ប៉ូតាស្យូមនៅក្នុងផ្លែត្របែក ក៏អាចជួយដោះស្រាយជាតិអាស៊ីត និងអាការៈក្រហាយក្រពះផងដែរ។
ជួយដល់ការលូតលាស់របស់ទារកប្រកបដោយសុខភាព៖ ប្រភពសំបូរអាស៊ីតហ្វូលិក កាល់ស្យូម និងវីតាមីនបេ៩ ក្នុងផ្លែត្របែកអាចជួយដល់ការលូតលាស់ខួរក្បាល និងឆ្អឹងរបស់ទារកប្រកបទៅ ដោយសុខភាពល្អ។
ការពារការទល់លាមក៖ ការទល់លាមក និងជំងឺឬសដូងបាតគឺជាបញ្ហាទូទៅមួយក្នុងពេលមាន ផ្ទៃពោះ។ ការផ្លាស់ប្តូរអរម៉ូនជាធម្មតានាំឱ្យមានបញ្ហានេះ ប៉ុន្តែការបរិភោគផ្លែត្របែកអាចដោះស្រាយ បញ្ហានៃការទល់លាមកនេះបាន។ ផ្លែត្របែកសម្បូរទៅដោយសារជាតិសរសៃ និងទឹកអាចព្យាបាល ការទល់លាមកបាន។ ការបរិភោគផ្លែត្របែកជាមួយគ្រាប់ក៏អាចការពារជំងឺឬសដូងបាតបានដែរ។
ម៉្យាងវិញទៀតក្រៅពីគុណប្រយោជន៍ដែលបានរៀបរាប់ខាងលើការបរិភោគផ្លែត្របែកក៏អាចជួយ ពង្រឹងប្រព័ន្ធភាពស៊ាំ បង្កើនកម្រិតថាមពល និងបន្ថយអរម៉ូនស្ត្រេសក្នុងរាងកាយស្រ្តី។ ផ្លែត្របែកគឺសំបូរទៅដោយវីតាមីនសេ លីកូប៉ែន (lycopene) និងសារធាតុប្រឆាំងអុកស៊ីតកម្ម ធ្វើអោយការទទួលទានផ្លែត្របែកមានលក្ខណៈអំណោយផលខ្ពស់សម្រាប់ស្បែក និងសក់ផងដែរ។
អត្ថបទដោយ៖ Sem Sotheary