មជ្ឈមណ្ឌលគ្រប់គ្រង និងការពារជំងឺ CDC សហរដ្ឋអាមេរិករាយការណ៍ ពីការស្លាប់របស់មនុស្ស៦នាក់បន្ថែម ទាក់ទងនឹងការឆ្លងមេរោគពីថ្នាំបន្តក់ភ្នែក១ប្រភេទបន្ទាប់ពីមនុស្សបានទិញយកទៅប្រើប្រាស់។ នេះបើយោងតាមការចុះផ្សាយនៅលើគេហទំព័រ cnn

កាលពីថ្ងៃសុក្រ CDC អាមេរិកបានប្រកាសថា មានមនុស្ស៦នាក់បានស្លាប់ និង៨នាក់បានងងឹតភ្នែកមើលលែងឃើញ បន្ទាប់ពីបានប្រើប្រាស់ថ្នាំបន្តក់ភ្នែកម៉ាក EzriCare ឬ Delsam Pharma ហើយក៏ឆ្លងមេរោគ Pseudomonas aeruginosa ពីថ្នាំបន្តក់ភ្នែកនោះ។

ជាមួយគ្នានេះដែរ CDC ក៏បានបញ្ជាក់ពីរោគសញ្ញាមេរោគ Pseudomonas aeruginosa ដែលបានទៅធ្វើការវាយលុកសុខភាពអ្នកដែលបានប្រើប្រាស់ថ្នាំបន្តក់ភ្នែក EzriCare រួមមាន៖ ភ្នែកឡើងពណ៌លឿង ឬបៃតង ចេញទឹករំអិលថ្លាចេញពីភ្នែក ឈឺភ្នែក ក្រហមភ្នែកឬត្របកភ្នែក; មានអារម្មណ៍ដូចជាអ្វីមួយនៅក្នុងភ្នែក; ប្រែប្រួលនៃពន្លឺ; ការមើលឃើញមិនច្បាស់។

គូសបញ្ជាក់ផងដែរថា ចំពោះអ្នកដែលមានបញ្ហាភ្នែក ត្រូវការប្រើប្រាស់ថ្នាំបន្តក់ភ្នែកជាប្រចាំ ត្រូវបង្កើនការប្រុងប្រយ័ត្ន មុននឹងប្រើប្រាស់ថ្នាំបន្តក់ភ្នែកណាមួយត្រូវពិគ្រោយោបល់ជាមួយគ្រូពេទ្យជំនាញឱ្យបានច្បាស់ ចៀសវាងមានផលប៉ះពាល់៕



អត្ថបទដោយ៖ មឿន គន្ធា