វីរុសអុតស្វា កំពុងក្លាយជាក្តីបារម្ភរបស់ពិភពលោក ជាពិសេសប្រទេសកំពុងតែជួបនឹងការរាតត្បាតនៃវីរុសអុតស្វានេះ ខណៈវាអាចបង្កឱ្យមានហានិភ័យនៃការបាត់បង់ជីវិតប្រសិនបើព្យាបាលមិនបានទាន់ពេល។ ដូចនេះ ដើម្បីជាវិធីការពារខ្លួនពីការមានគ្រោះថ្នាក់ ឬ ហានិភ័យផ្សេងពីការឆ្លងវីរុសអុតស្វានេះ CDC ក៏បានបង្ហាញចេញនូវ៥ចំណុចដែលគ្រប់គ្នាអាចអនុវត្តដើម្បីការពារខ្លួនបានដូចខាងក្រោម៖

១. ប្រសិនបើមានអ្នកជំងឺឆ្លងវីរុសអុតស្វា ត្រូវញែកអ្នកជំងឺឆ្លងពីអ្នកដ៏ទៃ ដែលអាចប្រឈមនឹងការឆ្លង។

២. ត្រូវអនុវត្តអនាម័យដៃឱ្យបានល្អ បន្ទាប់ពីប៉ះពាល់ជាមួយសត្វ ឬមនុស្ស។ ឧទាហរណ៍ អាចលាងដៃជាមួយសាប៊ូ និង ទឹក ឬ ប្រើទឹកអាកុលលាងដៃជាដើម។

៣. ជៀសវាងការទាក់ទងជាមួយសត្វដែលអាចផ្ទុកមេរោគ (រួមទាំងសត្វដែលឈឺ ឬត្រូវបានគេរកឃើញថាបានស្លាប់នៅក្នុងតំបន់ដែលកើតជំងឺអុតស្វានេះ)។

៤. ជៀសវាងការប៉ះពាល់ផ្ទាល់ជាមួយសម្ភារៈណាមួយ ដូចជាពូក ឬ ខោអាវ ដែលមានទំនាក់ទំនងជាមួយសត្វឈឺឬអ្នកជំងឺ។ សូមបញ្ជាក់ផងដែរថា មេរោគ Monkeypox អាចត្រូវបានសម្លាប់បាន ដោយប្រើម៉ាស៊ីនបោកគក់ស្តង់ដារ ជាមួយនឹងទឹកក្តៅ និងសាប៊ូបោកខោអាវ។

៥. អាចប្រើឧបករណ៍ការពារផ្ទាល់ខ្លួនមួយដែលសមស្រប (PPE) នៅពេលថែទាំអ្នកជំងឺ ដែលរួមមានសម្លៀកបំពាក់ ស្រោមដៃ ឧបករណ៍ដកដង្ហើម និងការការពារភ្នែកជាដើម។

លើសពីនេះ ជៀសវាងការញ៉ាំសាច់សត្វឆៅ ប្រសិនបើញ៉ាំសាច់ត្រូវប្រាកដចិត្តថាសាច់ទាំងនោះត្រូវបានចម្អិន ឆ្អិនល្អ។ អនាម័យផ្ទាល់ខ្លួននៅតែជារឿងសំខាន់ និងវិ ធីដ៏មានប្រសិទ្ធភាពក្នុងការការពារវីរុសផ្សេងៗរួមទាំងវីរុសអុតស្វានេះផ្ទាល់ផងដែរ៕

រៀបរៀងអត្ថបទដោយ៖ កញ្ញា លីហួយ