អាហារពេលព្រឹកសំខាន់ណាស់សម្រាប់រាងកាយ ប៉ុន្តែវាក៏អាចបំផ្លាញសុខភាពរបស់អ្នកបានប្រសិនបើអ្នករើសអាហារពេលព្រឹកខុស និងទទួលទានខុសរបៀប។ ផ្ទុយមកវិញ បើអ្នកជ្រើសរើសអាហារនិងរបៀបញ៉ាំបានត្រឹមត្រូវ វានឹងជួយផ្ដល់ថាមពលដ៏អស្ចារ្យពេញមួយថ្ងៃ មិនមានហានិភ័យមានជំងឺផ្សេងៗឡើយ។ យ៉ាងណាមិញ មានទម្លាប់ខុសមួយចំនួនដែលមនុស្សជាច្រើនបានអនុវត្តខុសជាមួយការញ៉ាំអាហារពេលព្រឹករបស់ពួកគេ។ ដរាបណា អ្នកនៅតែបន្តខុសបែបនេះជារឿយៗ អ្នកនឹងប្រឈមមុខជាមួយនឹងជំងឺជាច្រើននៅថ្ងៃមុខ ដូចជាការលើសកូលេស្តូរ៉ុលក្នុងឈាម ជំងឺបេះដូង និងទឹកនោមផ្អែមប្រភេទទី២ជាដើម។​ ផ្អែកតាមគេហទំព័រ Webmd បានឱ្យដឹងពីកំហុសទាំងអស់នោះរួមមាន៖

១ ញ៉ាំអាហារលឿនៗ៖ ពេលព្រឹកអ្នកអាចមានពេលខ្លី ប្រញាប់ទៅបំពេញការងារ ដែលជាហេតុម្នាក់ៗទម្លាប់ទទួលទានអាហារពេលព្រឹកបែបលឿនៗ ប្រញាប់ៗ។ តាមការសិក្សាគេរកឃើញថា ការញ៉ាំលឿនវាបានបង្កើនអត្រានៃការធាត់ គេកំពុងសិក្សាបន្ថែមផងដែរពីករណីនេះ។ ប្តូរទម្លាប់មកញ៉ាំតាមធម្មតា មួយៗ អ្នកនឹងអាចងាយស្រួលគ្រប់គ្រងការញ៉ាំ ងាយស្រួលដឹងថាអ្នកឃ្លានឬមិនឃ្លាន អាចទប់ការញ៉ាំអាហារច្រើនជ្រុល។

២ ញ៉ាំខុសកម្រិត៖ ប្រសិនបើពោះរបស់អ្នកនៅកូរបន្ទាប់ពីទទួលទានអាហារពេលព្រឹកហើយ អាចមកពីអ្នកទទួលទានច្រើនពេក ដែលវារំខានដល់ប្រព័ន្ធរំលាយអាហារ។ ហេតុនេះអាចធ្វើឱ្យអ្នកចង់ញ៉ាំបន្ថែមអាហារសម្រន់ច្រើនទៀត ដើម្បីបំបាត់ការកូរពោះ ជាហេតុងាយធ្វើឱ្យអ្នកលើសគីឡូផងដែរ។

៣ រំលងប្រូតេអ៊ីន៖ ទទួលប្រូតេអ៊ីននៅពេលព្រឹក វាអាចជួយសម្រួលដល់សាច់ដុំ ទប់ចំណង់អាហារផ្ដេសផ្ដាស។ ប្រភពនៃប្រូតេអ៊ីនមាននៅក្នុងពពួក គ្រាប់ធញ្ញជាតិ ផ្លែប៊ឺរី យ៉ាអ៊ួរប្រូបាយអូទិច ទឹកដោះគោជាដើម។ ពពួកផ្លែប៊ឺរី អាចថ្លៃបន្តិច លោកអ្នកក៏អាចយកផ្លែប៉ោម ចេក ផ្លែប័រ នំបុ័ងស្រូវសាឡី លាយជាមួយយ៉ាអ៊ួរឬទឹកដោះគោជំនួសបាន។ ផ្ទុយទៅវិញ អាហារពេលព្រឹកដែលគ្រប់គ្នាទទួលទានច្រើនរាល់ថ្ងៃ បែរជាអាហារសម្បូរដោយជាតិស្ករ ខ្លាញ់ កាបូនអ៊ីត្រាតខ្ពស់ ដូចជាបាយស្រូប សាច់ខ្លាញ់ៗ គុយទាវ មី ខគោ មីឆា លោតឆា បបរគ្រឿង បាយកក កាហ្វេផ្អែមៗទៅវិញ។ លោកអ្នកអាចទទួលទានអាហារទាំងនេះបាន តែក្នុងបរិមាណសមល្មមមួយ ហើយគួរទទួលទានប្រភេទអាហារមានប្រូតេអ៊ីនឱ្យបានច្រើនជាង។

៤ កាបូនអ៊ីត្រាតទាំងស្រុង៖ កាបូនអ៊ីត្រាតច្រើនពេកមិនល្អសម្រាប់សុខភាព ប៉ុន្តែកាបូនអ៊ីត្រាតក្នុងកម្រិតសមល្មមមួយក៏ជួយផ្ដល់ថាមពលដល់រាងកាយផងដែរ។ ហេតុនេះកុំកាត់កាបូនអ៊ីត្រាតចោលទាំងស្រុង អាចជ្រើសយកប្រភេទគ្រាប់ធញ្ញជាតិ oats ផ្លែឈើស្រស់ ជំនួសបាន។ ចៀសវាងការទទួលទាននំខេក នំផ្អែមៗ នំដែលធ្វើឡើងពីម្សៅស ម្សៅឡើងនៅពេលព្រឹក​ ដូចជានំប៉ាវជាដើម។

៥ យកកាហ្វេជាអាហារពេលព្រឹក៖ ទម្លាប់ខុសដែលមនុស្សជាច្រើនធ្វើរាល់ថ្ងៃគឺទទួលទានកាហ្វេជាអាហារពេលព្រឹក ហើយជាកាហ្វេដែលបន្ថែមជាតិផ្អែមខ្លាំងថែមទៀត។ កាហ្វេល្អសម្រាប់សុខភាព ប៉ុន្តែជាប្រភេទកាហ្វេដែលមិនបន្ថែមជាតិស្ករ ទឹកដោះគោខាប់ ឬគ្រីមនោះទេ។ តាមការចែករំលែករបស់អ្នកឧកញ៉ា វេជ្ជបណ្ឌិតគួច ម៉េងលី បានណែនាំកាហ្វេដែលល្អ មិនមានហានិភ័យច្រើនដល់សុខភាព ដូចជាកាហ្វេខ្មៅ កាហ្វេអ៊ិចស្ព្រេសូ កាពូឈីណូ ដែលដាក់ប្រើស្ករឬជាតិផ្អែមទាប។

៦ រំលងទឹក៖ ព្រឹកឡើងមនុស្សជាច្រើនមានទម្លាប់ទទួលទានភេសជ្ជៈផ្អែមៗដើម្បី គិតអាចអាចធ្វើឱ្យអារម្មណ៍ស្រស់ថ្លា ប៉ុន្តែវាជារឿងខុសចំពោះសុខភាព។ ទឹកគ្មានជាតិកាឡូរី ដែលអ្នកអាចជ្រើសរើសទទួលទានទឹកមកជំនួស ដើម្បីទប់ចំណង់មិនឱ្យអ្នកឃ្លានភេសជ្ជៈផ្អែមៗបាន៕

អត្ថបទដោយ៖ Senghong