អាហារពេលព្រឹក គឺជាអាហារដែលសំខាន់បំផុតសម្រាប់ជួយផ្ដល់ថាមពលដល់រាងកាយ។ ក៏ប៉ុន្តែប្រសិនបើអ្នកញ៉ាំអាហារដែលសម្បូរជាតិខ្លាញ់ ជាតិស្ករច្រើន ឬអាហារដែលផ្ទុកកាឡូរីច្រើននៅពេលព្រឹក ដូចជាបាយស គុយទាវ មី មីសួ គឺមិនល្អចំពោះសុខភាពនោះឡើយ ថែមទាំងធ្វើឱ្យអ្នកងាយនឹងងងុយគេង ខួរក្បាលមិនរហ័សរហួនថែមទៀតផង។
ជាក់ស្តែង តាមការសិក្សានៅសាកលវិទ្យាល័យLowa លើមនុស្សពេញវ័យចំនួន៦៥៥០នាក់អស់រយៈពេល១២ឆ្នាំ បានឱ្យដឹងជាលទ្ធផលថា ក្រុមមនុស្សដែលមិនញ៉ាំអាហារពេលព្រឹកមានហានិភ័យក្នុងការស្លាប់លឿនជាងមនុស្សដែលញ៉ាំអាហារពេលព្រឹកដល់ទៅ៨៧%ដោយសារតែជួយជំងឺបេះដូង ឬជំងឺដាច់សរសៃរឈាមខួរក្បាល។ លើសពីនេះទៅទៀត អ្នកដែលកាត់ផ្តាច់អាហារពេលព្រឹកចោលងាយក៏អាចប្រឈមនឹងការកើនឡើងហានិភ័យនៃជំងឺធាត់និងជំងឺទឹកនោមផ្អែមប្រភេទទី២ដែលជាជំងឺពិបាកក្នុងការព្យាបាលមួយផងដែរ។
ដោយឡែកចំពោះបុគ្គលដែលមានទម្លាប់ញ៉ាំអាហារពេលព្រឹកជាប្រចាំ ប៉ុន្តែញ៉ាំអាហារខុសក្បួន គឺងាយធ្វើឱ្យបាត់បង់សមត្ថភាពខួរក្បាល រាងកាយក៏មិនរឹងមាំដែរ។ ដូច្នេះអ្វីដែលមនុស្សគ្រប់គ្នាចាំបាច់ត្រូវធ្វើញ៉ាំអាហារពេលព្រឹកឱ្យទៀងទាត់រាល់ថ្ងៃ ហើយជ្រើសអាហារញ៉ាំឱ្យត្រូវប្រភេទ។
ជាការពិតណាស់ យោងតាមការចុះផ្សាយលើគេហទំព័រ healthline បានឱ្យដឹងថា អាហារទាំង៥ប្រភេទខាងក្រោម គឺជាអាហារល្អបំផុតសម្រាប់ញ៉ាំពេលព្រឹក ដែលវាមាននាទីក្នុងការជំនួយទៅដល់មុខងារខួរក្បាល ឆ្អែតបានយូរ មិនធ្វើឱ្យឡើងគីឡូ៖
១.ផ្លែប័រ( Avocado)៖ លោក Jaramillo អ្នកជំនាញផ្នែកចំណីអាហារបាននិយាយថា ការញ៉ាំផ្លែប័រ ពេលព្រឹកគឺល្អខ្លាំងណាស់។ ផ្លែប័រមានផ្ទុកដោយសារធាតុខ្លាញ់ អូមេហ្កា៣ ដែលជួយផ្ដល់សំណើមដល់ស្បែក ជួយឱ្យកោសិកាស្បែកលូតលាស់បានល្អ។ ពិសេសជាងនេះ ផ្លែឈើមួយប្រភេទនេះ គឺជួយឱ្យអ្នកឆាប់ឆ្អែត ដូចនេះវាក៏អាចជួយទប់ស្កាត់ការឡើងគីឡូរបស់អ្នកផងដែរ។
២. គ្រាប់អាល់ម៉ុន៖ អាល់ម៉ុន គឺជាប្រភព ម៉ង់ហ្គាណែស វីតាមីនE ប្រូតេអ៊ីន ជាតិសរសៃ អូមេហ្គា៣ និងអាស៊ីតខ្លាញ់អូមេហ្គា៦។ ការទទួលទានអាល់ម៉ុនលាយជាមួយនឹងទឹកដោះគោស្រស់ នឹងផ្តល់ឱ្យនូវសារជាតិចិញ្ចឹមខ្ពស់ បំប៉នក្រពះពោះវៀន សម្រួលអង្គចងចាំ ថែមទាំងធ្វើឱ្យមានអារម្មណ៍ថាឆ្អែតបានយូរ។
៣.ដំឡូងជ្វា( Sweet potato)៖ លោក Christensen ដែលជាអ្នកឯកទេសខាងចំណីអាហារបានឱ្យដឹងថា ដំឡូងជ្វាគឺ មានផ្ទុកសារធាតុ ខារ៉ូទីនច្រើនបំផុតដែលអាចជួយទប់ស្កាត់ និងប្រឆាំងភាពចាស់នៃស្បែករបស់អ្នកដោយសារតែ វាផ្ទុកវីតាមីនអា វីតាមីនសេ ដែលបានដើរតួនាទីយ៉ាងសំខាន់ក្នុងការការពារស្បែកកុំឱ្យចាស់។ លើសពីនេះ ដំឡូងជ្វាមានកាឡូរីទាបជាងបាយស ដូចនេះការបរិភោគដំឡូងជ្វានៅពេលព្រឹក គឺផ្ដល់គុណប្រយោជន៍ច្រើនចំពោះសុខភាព។
៤. ស៊ុត២គ្រាប់៖ ស៊ុតជាអាហារដែលផ្ទុកការឡូរីទាប និងជាអាហារជំនួយសុខភាព សាកសមបំផុតសម្រាប់ធ្វើជាអាហារពេលព្រឹក។
៥.នំប៉័ងស្រូវសាឡី៖ នំប៉័ងស្រូវសាឡី គឺជាអាហារដែលមានប្រូតេអ៊ីន និងជាប្រភពជាតិកាកសរសៃច្រើនជាងស្រូវធម្មតា ដែលវាបានដើរតួនាទីជំរុញប្រព័ន្ធកិនរំលាយអាហារបានល្អ។ បន្ថែមពីនេះ វាមានកាឡូរីទាបជាងបាយស ប៉ុន្តែវាអាចធ្វើឱ្យអ្នកឆ្អែតបានយូរ និងមិនសូវឃ្លានអ្វីផ្សេងនោះទេ។ លើសពីនេះ វាក៏សម្បូរទៅដោយជាតិដែក ប៉ូតាស្យូម ម៉ាញេស្យូម កាល់ស្យូម វីតាមីន និងសារធាតុរ៉ែសំខាន់ៗជាច្រើនទៀត។
អ្នកជំនាញនិយាយថា អ្នកគួរតែញ៉ាំអាហារពេលព្រឹកបន្ទាប់ពីរក្រោកពីគេង២ម៉ោង។ ពេលវេលាល្អបំផុតដើម្បីទទួលទានអាហារពេលព្រឹកគឺនៅចន្លោះម៉ោង ៧ ព្រឹកដល់ម៉ោង ៨ ព្រឹក។
អ្នកមិនគួរពន្យាពេលអាហារពេលព្រឹករបស់អ្នកទៅដល់ម៉ោង១០នោះទេ ពីព្រោះប្រសិនជាអ្នកញ៉ាំអាហារពេលព្រឹកឈានដល់ម៉ោង១០ គឺវាធ្វើឱ្យម៉ោងអាហារពេលព្រឹក និងអាហារពេលថ្ងៃកិតគ្នាពេក ជាហេតុនាំឱ្យប្រព័ន្ធរំលាយអាហារពិបាកក្នុងការរំលាយ អាចនាំឱ្យកើនជាតិស្ករក្នុងឈាម ងាយប្រឈមនឹងហានិភ័យនៃជំងឺទឹកនោមផ្អែម ធាត់ និងលើសសម្ពាធឈាម៕
អត្ថបទដោយ៖ មឿន គន្ធា