យោងតាមមូលនិធិវិទ្យាសាស្ត្រ គេបានរកឃើញថាមនុស្សជាមធ្យមមានគំនិងប្រហែល ១២,០០០ទៅ៦០,០០០ក្នុង១ថ្ងៃ។ ក្នុងចំណោមគំនិតដែលពួកគេគិតទាំងនោះ ៨០%គឺជាគំនិតអវិជ្ជមានហើយ៩៥% គឺជាគំនិតគិតដដែលៗ នេះបើយើងតាមការឱ្យដឹងពីpowerofpositivity។ ដោយសារតែគំនិតអវិជ្ជមានជាច្រើនបានចាក់ចូលជ្រៅក្នុងខួរក្បាល ចិត្តគំនិតរបស់មនុស្សស្ទើរតែគ្រប់គ្នាបែបនេះហើយ ធ្វើឱ្យពីម្នាក់ៗឱ្យតែងទន្ទេញតែសម្ពាធ ការលំបាក មើលងាយ មិនពេញចិត្តនិងខ្លួនឯង វិលវល់ សោកសៅ គ្មានទិញដៅ ដូចជាពិភពលោកអ្នកគ្មានកន្លែងណាអាចតាំងលំនៅបាន។

ជាការពិតណាស់ យោងតាមការចុះផ្សាយនៅលើគេហទំព័រ cnet របបអាហារគឺពិតជាសំខាន់ខ្លាំងណាស់ សម្រាប់ខួរក្បាល។ ប្រសិនជាអ្នកញ៉ាំរបបអាហារប្រចាំថ្ងៃបានត្រឹមត្រូវនោះខួរក្បាលរបស់អ្នកនិងកើនថាមពល គិតរហ័ស ចងចាំល្អ។ ដូច្នេះអាហារដែលផ្តល់ថាមពលដល់ខួរក្បាលរបស់អ្នកប្រចាំថ្ងៃ ហើយគួរតែញ៉ាំដាច់ខាតឱ្យបាន១មុខឬ២មុខក្នុង១ថ្ងៃ មានដូចខាងក្រោម៖

១. គ្រាប់ Walnut៖ គ្រាប់ធញ្ញជាតិ Walnut ត្រូវបានគេរកឃើញថាជាប្រភពនៃប្រូតេអ៊ីន និងខ្លាញ់ល្អ ជាអាហារខួរក្បាលដ៏អស្ចារ្យ បង្កើនថាមពលផ្លូវចិត្ត ផ្ទុកទៅដោយអាស៊ីតខ្លាញ់អូមេហ្គា៣ សារធាតុប្រឆាំងអុកស៊ីតកម្ម ជំនួយទៅដល់មុខងាររបស់ខួរក្បាល។

តាមរយៈការសិក្សា ឆ្នាំ ២០២១ បានរកឃើញថាមនុស្សពេញវ័យដែលទទួលទានគ្រាប់ធញ្ញជាតិ Walnut ចាប់ពី ១៥ ទៅ ៣០ ក្រាមក្នុងមួយថ្ងៃគឺជួយធ្វើឱ្យខួរក្បាលមានការចងចាំល្អ កើនIQ។

២. ស៊ុត៖ ល្អបំផុតសម្រាប់អាហារ​ពេល​ព្រឹក ស៊ុតក៏សម្បូរទៅដោយ វីតាមីន B សំខាន់ៗមួយចំនួន រួមមាន B6, B12 និង B9 (អាស៊ីតហ្វូលិក)។ ការសិក្សាបង្ហាញថា វីតាមីនទាំងនេះអាចជួយ ការពារការរួមតូចនៃខួរក្បាល និងទប់ស្កាត់ការថយចុះនៃផ្លូវចិត្តចំពោះមនុស្សចាស់។ សម្រាប់មនុស្សពេញវ័យគួរញ៉ាំស៊ុតមួយគ្រាប់ក្នុងមួយថ្ងៃ ដើម្បីពង្រឹងមុខងារខួរក្បាល។

៣. ខាត់ណាខៀវ៖ ​នៅក្នុងបន្លែខាត់ណាសម្បូរដោយជាតិសរសៃខ្ពស់ ​កាឡូរីទាប វីតាមីនស៊ី សារធាតុflavonoidsជាសារធាតុអុកស៊ីតកម្មទៅបង្កើនសមត្ថភាពខួរក្បាល ជួយឱ្យខួរក្បាលមានសុខភាពល្អ​បន្លែខាត់ណាខៀវមានសមត្ថភាពជួយបំបាត់ភាពតានតឹងនៅក្នុងខ្លួន ការពារនិងកាត់បន្ថយហានិភ័យជំងឺសរសៃប្រសាទ។

៤. ផ្លែបឺរ៖ នៅក្នុងផ្លែបឺរមានផ្ទុកដោយអាស៊ីតmonounsaturatedអាស៊ីតនេះត្រូវបានគេរកឃើញថាមានសមត្ថភាពជួយដល់សុខភាពរបស់ខួរក្បាលឱ្យមានសុខភាពល្អ ជួយបន្ថយសម្ពាធឈាមឡើងខ្ពស់ព្រោះយើងដឹងហើយងាកាលណាសម្ពាធឈាមឡើងខ្ពស់ធ្វើឱ្យដំណើរការឈាមរត់បញ្ជូនទៅខួរក្បាលយឺតជាហេតុនាំឱ្យប្រព័ន្ធខួរក្បាលមានបញ្ហាជាច្រើន។

៥. សូកូឡា​ខ្មៅ៖ សូកូឡាខ្មៅនាំមកនូវអត្ថប្រយោជន៍ជាច្រើន វាសម្បូរទៅដោយសារធាតុប្រឆាំងអុកស៊ីតកម្ម សារជាតិ flavonoids និងជាតិកាហ្វេអ៊ីន ដែលធ្វើឱ្យវាក្លាយជាអាហារដែលផ្តល់សុខភាពខួរក្បាល។ មនុស្សពេញវ័យគេណែនាំឱ្យញ៉ាំសូកូឡាខ្មៅ ៣០ ទៅ ៦០ ក្រាម ២ទៅ៣ដងក្នុងមួយសប្តាហ៍ ដើម្បីប៉ូវខួរក្បាល បង្កើនការចងចាំល្អ។

គូសបញ្ជាក់ផងដែរថា ក្នុងចំណោមអាហារទាំង៤នេះយ៉ាងហោចណាស់គួរតែញ៉ាំឱ្យបាន១មុខឬ២មុខក្នុងមួយថ្ងៃ ដើម្បីជំនួយទៅដល់ខួរក្បាល បង្កើនមុខងារចងចាំ និងថាមពល៕

អត្ថបទដោយ៖ មឿន គន្ធា