ថ្ងៃនេះក្រុមការងារHealthy Cambodia នឹងបង្ហាញពីអាហារពេលព្រឹកមួយចំនួនដែលងាយៗ តម្លៃធូរ ជំនួយដល់ខួរក្បាល សម្រស់ និងថាមពល ហើយសំខាន់ឆ្អែតបានយូរសម្រាប់អ្នកសម្រកគីឡូ ថែរាងទៀតផង។
បន្ទាប់ពីគេងសម្រាកពេញមួយយប់អស់រយៈពេល៦ទៅ៨ម៉ោងរួចមក, ការញ៉ាំអាហារពេលព្រឹក គឺជារឿងសំខាន់បំផុតក្នុងចំណោមអាហារទាំង៣ពេល។ ក្នុងនោះវេជ្ជបណ្ឌិត អ្នកជំនាញជាច្រើនរូបតែងតែសិក្សាស្រាវជ្រាវបង្ហាញពីគុណប្រយោជន៍នៃអាហារពេលព្រឹក និងផលប៉ះពាល់ប្រសិនបើមិនបានញ៉ាំ។ យ៉ាងណាមិញអាហារពេលព្រឹកមានច្រើនជម្រើស អ្នកត្រូវចេះពីរបៀបជ្រើសរើសទើបទទួលបានអាហារដែលល្អ ត្រូវពេលវេលា។ អ្នកជំនាញផ្នែកអាហាររូបត្ថម្ភ អ្នកស្រី Lisa Moskovitz បានណែនាំថា អាហារពេលព្រឹកដែលល្អគួរតែរើសពពួកជាតិកាកសរសៃខ្ពស់, ពពួកអាហារមានផ្ទុកសារធាតុប្រឆាំងអុកស៊ីកម្ម ដែលភាគច្រើនមាននៅក្នុង ផ្លែឈើ, គ្រាប់ធញ្ញជាតិ និងគ្រាប់ផ្លែឈើជាដើម។
លើសពីនេះនៅទៀត Healthline ប្រាប់ថា “ស៊ុតគឺជាជម្រើសទី១ និងជម្រើសល្អបំផុតនៅពេលដែលយើងគិតពីអាហារូត្ថម្ភ”។ ស៊ុតគឺជាប្រភពនៃប្រូតេអ៊ីន ជំនួយដល់សាច់ដុំ និងជួយឱ្យអ្នកឆ្អែតបានយូរ។ លើសពីនេះនៅក្នុងស៊ុតផ្នែកពណ៌លឿង មានសារជាតិ lutein និង zeaxanthin, ដែលជាសារធាតុប្រឆាំងអុកស៊ីតកម្ម ជួយការពារជំងឺភ្នែកដូចជាជំងឺភ្នែកឡើងបាយជាដើម។ មួយវិញទៀតសារធាតុ Choline នៅក្នុងស៊ុតក៏មានសមត្ថភាពជំនួយដល់ខួរក្បាល និងថ្លើមផងដែរ។ ហេតុផលទាំងនេះហើយ ដែលបង្ហាញថាស៊ុតគឺជាអាហារពេលព្រឹកដែលងាយស្រួល ហើយមានអាហារូត្ថម្ភល្អបំផុត, សម្រាប់ស៊ុតនេះផងដែរបងប្អូនគួរតែញ៉ាំជាលក្ខណៈស៊ុតស្ងោរល្អជាងស៊ុតចៀនដែលប្រើប្រេងឆាបន្ថែម, ស៊ុតស្ងោរទទេ, ស៊ុតស្ងោរ រួចច្របល់លាយជាមួយសាឡាត់, ស៊ុតជាមួយនិងផ្លែឈើ រឹតតែល្អសម្រាប់សុខភាព។
ញ៉ាំយ៉ាអ៊ួជាអាហារពេលព្រឹក ប្រសិនបើអ្នកមានពេលតិច ហើយមានបញ្ហាវិបត្តិប្រព័ន្ធរំលាយអាហារ។ យ៉ាអ៊ួសម្បូរទៅដោយកាល់ស្យូម, វីតាមីនB12, ស័ង្កសី, ប៉ូតាស្យូម និងផូស្វ័រ ដែលសុទ្ធតែជាសារធាតុដែលរាងកាយចាំបាច់ត្រូវការជាប្រចាំថ្ងៃ។ បន្ថែមពីជម្រើសនេះ ការញ៉ាំOatmilk ក៏ជាជម្រើសដែលអ្នកមិនគួររំលងដែរ។ អាហារពេលព្រឹកOatmilk សម្បូរទៅដោយជាតិកាកសសៃឈ្មោះថា បេតាគ្លូខេន ដែលល្អសម្រាប់សុខភាពក្រពះពោះវៀន។ វាក៏មាននូវសារធាតុចិញ្ចឹមជាច្រើនដែលជំនួយដល់រាងកាយយ៉ាងល្អផងដែរ។
សរុបមកវិញ អាហារពេលព្រឹកដែលល្អ ងាយៗស្រួលញ៉ាំមានដូចជា បន្លែផ្លែឈើគ្រប់ប្រភេទ, ស៊ុត, យ៉ាអ៊ួ, Oatmilk និងភេសជ្ជៈមួយចំនួនដូចជាទឹកដោះគោ និងកាហ្វេ៕
តោះ ញ៉ាំទាំងអស់គ្នា បើស្រឡាញ់សុខភាពខ្លួនឯង កុំរំលងអាហារពេលព្រឹកណា៎!
អត្ថបទដោយ៖ កញ្ញា លីហួយ