ការត្រៀមលក្ខណៈទុកមុន មុនពេលយកកូនគឺមានអត្ថប្រយោជន៍ច្រើនណាស់ដល់កូន គឺជួយឱ្យទារកមានសុខភាពល្អ រឹងមាំ ឈ្នះជំងឺ មានគ្រប់លក្ខណៈ។ ៣ចំណុចខាងក្រោយគូស្វាមីភរិយាដែលត្រៀមយកកូនគួរដឹង និងតមឱ្យបានបើស្រឡាញ់កូនពិត៖

១. តមស្រា៖ គូស្វាមីភរិយាដែលត្រៀមយកកូនគឺត្រូវតមស្រា គ្រឿងស្រវឹង ជាតិអាល់គុលរយៈពេល៦ខែទៅ១ឆ្នាំ។ បុរសជាស្វាមីត្រូវតមស្រារយៈពេល៦ខែមុនពេលរួមភេទ ស្រ្តីជាភរិយាត្រូវតមស្រារយៈពេល១ឆ្នាំមុនរួមភេទ។ អ្នកស្រាវជ្រាវបាននិយាយថា ជាតិអាល់កុល ផ្ទុកសារធាតុ teratogen ដែលបណ្តាលឱ្យខូចទ្រង់ទ្រាយនៃអំប្រ៊ីយ៉ុង ហើយត្រូវបានផ្សារភ្ជាប់ជាមួយនឹងជំងឺវិសាលគមអាល់កុលរបស់ទារក (FASD) ។ តាមរយៈការសិក្សាស្រាវជ្រាវបានរកឃើញថា ទារក១នាក់ក្នុងចំណោមទារក ៤នាក់ដែល មានផ្ទុកជំងឺ FASD (ខូចជំងឺបេះដូងពីកំណើត) ព្រោះឪពុកម្តាយបានពាក់ព័ន្ធជាមួយគ្រឿងស្រវឹងក្នុងអំឡុងពេលយកកូន(រួមភេទ)។

២. តមបារី៖ ការជក់បារីអំឡុងពេលមានផ្ទៃពោះ ត្រូវបានផ្សារភ្ជាប់ទៅនឹងបញ្ហាសុខភាពជាច្រើន រួមមាន៖ កូនកើតមិនគ្រប់ខែ ទម្ងន់កូនតិច ភាគរយច្រើនដែលទារកអាចស្លាប់ភ្លាមៗនៅក្នុងពោះ ការរលូតកូន។ មិនតែប៉ុណ្ណោះ អ្នកជំនាញមិនត្រឹមតែណែនាំឱ្យអ្នកតមបារីនោះទេ ថែមទាំងហាមមិនឱ្យស្រ្តីមានផ្ទៃពោះនៅក្បែរអ្នកជក់បារីថែមទៀតផង ព្រោះផ្សែងបារីធ្វើឱ្យមានផលប៉ះពាល់ដល់ទារកខ្លាំង។

៣. ទប់គីឡូកុំឱ្យឡើង៖ មុនពេលយកកូន និងអំឡុងពេលមានផ្ទៃពោះអ្នកត្រូវរក្សាទម្ងន់ ប្រសិនបើអ្នកលើសទម្ងន់ (មាន BMI លើសពី 25) ឬធាត់ (មាន BMI លើសពី 30) គឺបង្កើនហានិភ័យនៃបញ្ហាមានផ្ទៃពោះ ដូចជា សម្ពាធឈាមខ្ពស់ ស្ទះ សរសៃឈាមវ៉ែនជ្រៅ ការរលូតកូន និង ជំងឺទឹកនោមផ្អែមពេលមានគភ៌ ។

មុនពេលអ្នកមានផ្ទៃពោះ អ្នកអាចប្រើ ម៉ាស៊ីនគណនាទម្ងន់ BMI ដើម្បីស្វែងរក BMI របស់អ្នក។អ្នកអាចរក្សាទម្ងន់ដែលមានសុខភាពល្អដោយរបបអាហារមានតុល្យភាព និងធ្វើលំហាត់ប្រាណទៀងទាត់។

៣ចំណុចខាងលើគឺសំខាន់និងចាំបាច់បំផុតសម្រាប់គូស្វាមីភរិយាគ្រប់រូបត្រូវអនុវត្តឱ្យបាន ប្រសិនជាចង់ឱ្យកូនកើតមកមានសុខភាពល្អ មានគ្រប់លក្ខណៈមិនខ្វិនខ្វង់៕