ថ្លើមជាសរីរៈដ៏សំខាន់ ចំពោះរាងកាយមនុស្សយើង ហើយថ្លើមមានតួនាទីបញ្ចេញជាតិពុល ជួយរំលាយអាហារ បំបែកជាតិខ្លាញ់ និងមានតួនាទីសំខាន់ៗទៀតជាច្រើន។ អ្នកដែលមានបញ្ហាធាត់លើសទម្ងន់ និងអ្នកជំងឺទឹកនោមផ្អែម គឺមានហានិភ័យខ្ពស់ ក្នុងការកើតជំងឺខ្លាញ់រុំថ្លើម ដែលមិនមែនបណ្ដាលមកពីការផឹកគ្រឿងស្រវឹង (NAFLD) ។

យោងតាមគេហទំព័រ healthline.com លោកអ្នកអាចកាត់បន្ថយ ហានិភ័យនៃការកើតជំងឺខ្លាញ់រុំថ្លើម តាមរយៈរបបចំណីអាហារមួយចំនួនដូចខាងក្រោមនេះ៖

១. កាហ្វេ៖ កាហ្វេមានគុណប្រយោជន៍ ក្នុងការបន្ថយការកកើតឡើង អង់ស្ស៊ីមខុសប្រក្រតីរបស់ថ្លើម ដែលជាទម្រង់នៃជំងឺខ្លាញ់រុំថ្លើម( មិនបណ្ដាលមកពីការផឹកគ្រឿងស្រវឹង)។

២. បន្លែបៃតង៖ លទ្ធផលនៃការសិក្សាក្នុងឆ្នាំ២០១២១ បានរកឃើញថា បន្លែបៃតង មានផ្ទុកសារធាតុសំខាន់ដូចជា nitrate និង polyphenols ដែលមានសមត្ថភាពជួយ បន្ថយហានិភ័យ នៃការកើតជំងឺក្រិនថ្លើម និងខ្សោយថ្លើម។

៣. ពពួកសណ្ដែក៖ លទ្ធផលនៃការសិក្សាជាច្រើន បានរកឃើញថា សណ្ដែកមានផ្ទុកប្រូតេអីនខ្ពស់ ជួយដល់សុខភាពថ្លើម និងជួយបន្ថយជាតិខ្លាញ់(cholesterol) ទៀតផង ។

៤.​ ខ្លាញ់ត្រី៖ ខ្លាញ់ត្រីសម្បូរដោយ omega-3 អាចជួយបន្ថយជាតិខ្លាញ់ក្នុងថ្លើម បង្កើតជាតិខ្លាញ់ល្អ(HDL) ក្នុងសរសៃឈាម និងជួយបន្ថយជាតិខ្លាញ់ cholesterol ផងដែរ។

៥. អាហារសរសៃ៖ មានការសិក្សាជាច្រើន បានបញ្ជាក់ថា អាហារសម្បូរដោយជាតិសរសៃដូចជា បន្លែ និងផ្លែឈើ អាចជួយបន្ថយហានិភ័យ នៃការកើតជំងឺក្រិនថ្លើមបាន ។

៦. រមៀត៖ រមៀតមានផ្ទុកសារធាតុ curcumin ដែលជាសារធាតុដ៏សកម្ម ជួយទប់ស្កាត់ មិនឲ្យកកើតនៃអស់ស្ស៊ីមដែលខុសប្រក្រតី អាចបង្កឲ្យខូចកោសិការបស់ថ្លើម ។

៧. ខ្ទឹមស៖ មានសមត្ថភាពជួយសម្រកទម្ងន់រាងកាយ និងទប់ស្កាត់ការកើតជំងឺខ្លាញ់រុំថ្លើម ដែលអាចជាមូលហេតុ បង្កឲ្យកើតជំងឺក្រិនថ្លើម និងខ្សោយថ្លើម។

ប្រសិនលោកអ្នក កំពុងមានបញ្ហាធាត់លើសទម្ងន់ និងមានជំងឺទឹកនោមផ្អែម សូមយកចិត្តទុកដាក់ជាមួយរបបអាហារ ត្រូវចេះជ្រើសរើសរបបចំណីអាហារឲ្យបានសមស្រប ដើម្បីចៀសវាងពីជំងឺក្រិនថ្លើម ឬនិងជំងឺខ្សោយថ្លើម ៕

អត្ថបទដោយ៖ ហួ ភារ៉ា