អំឡុងពេលមករដូវ ស្ត្រីគ្រប់រូបតែងតែយល់ពាក្យមួយថា ត្រូវថ្នមខ្លួន ក៏ប៉ុន្តែវិធីថ្នមខ្លួននោះ អាចនឹងមានបងប្អូនស្ត្រីមួយចំនួនយល់ច្រលំ ដើម្បីមានខ្លះបង្ខំខ្លួនឯងនៅគេងនៅនឹង១កន្លែង មិនមានសកម្មភាពអ្វីទាល់តែសោះ។ ក៏ប៉ុន្តែការធ្វើបែបនេះ មិនមែនជាដំណោះស្រាយល្អទេ ជួយរាងកាយស្ត្រីនាពេលមករដូវ ហើយការធ្វើបែបនេះ ក៏មិនស្ថិតនៅក្នុងល័ក្ខខ័ណ្ឌដែលគេនិយាយថា ថ្នមខ្លួនដែរ។
ខាងក្រោមនេះ ជាចំណុចសំខាន់ៗចំនួន៥ដែលស្ត្រីត្រូវតែធ្វើឱ្យបានជាប្រចាំអំឡុងពេលមករដូវ ហើយទម្លាប់ទាំង៥នេះក៏មានន័យត្រូវទៅនឹងពាក្យថ្នមខ្លួនដែរ៖
១-រក្សាជាតិទឹក៖ រាងកាយរបស់មនុស្សនាអំឡុងពេលមករដូវ ត្រូវការជាតិជាចាំបាច់ខ្លាំង ដើម្បីជួយជំរុញដំណើរការលំហូរឈាមរដូវ កាត់បន្ថយអាការចុកឆ្អល់ ឬហើមពោះ។
២. របបអាហារមានតុល្យភាព៖ ទទួលទានអាហារដែលមានជីវជាតិ រួមទាំងផ្លែឈើ បន្លែ គ្រាប់ធញ្ញជាតិ និងប្រូតេអ៊ីនគ្មានខ្លាញ់ មានប្រយោជន៍ក្នុងការជួយបំពេញសារជាតិចិញ្ចឹមទៅជំនួយដល់រាងកាយស្ត្រីនាអំឡុងពេលមករដូវ បន្ថយអារម្មណ៍ស្ត្រេសតានតឹង ធុញថប់មួម៉ៅផងដែរ។
៣. លំហាត់ប្រាណទៀងទាត់៖ ធ្វើលំហាត់ប្រាណពីកម្រិតស្រាលទៅមធ្យមដូចជាការដើរ ឬហាត់យូហ្គា ដើម្បីជួយកាត់បន្ថយការរមួលក្រពើ បញ្ហាចុកពោះ និងបង្កើនអារម្មណ៍ស្រស់ស្រាយ។
៤. សម្រាកឱ្យបានគ្រប់គ្រាន់៖ ការគេងជាពេលវេលាសំខាន់បំផុតដែលអាចជួយឱ្យរាងកាយស្ត្រីនាអំឡុងពេលមករដូវចៀសឆ្ងាយពីបញ្ហាធ្លាក់ខ្សោយប្រព័ន្ធភាពសុំាំរាងកាយ ពង្រឹងមុខងារចរន្តឈាមរត់ និងល្អបំផុតសម្រួលដំណើរការហូរឈាមរដូវ។
៥. កត្តាអនាម័យជាចាំបាច់ ៖ ការអនាម័យខ្លួនប្រាណ និងឧស្សាហ៍ផ្លាស់ប្តូរសំឡីអនាម័យឱ្យបានយ៉ាងហោចណាស់ ៤ម៉ោងម្តង អាចជួយឱ្យស្ត្រីមិនមានបញ្ហាស្អុះស្អាប់ក្នុងរាងកាយ បន្ថយបញ្ហារលាកនៅនឹងតំបន់ពិសេស ការពារមិនឱ្យមានការបង្ករោគនាអំឡុងពេលមករដូវ៕