គ្រាប់សណ្តែក អាម៉ុន វ៉ាល់ណាត់ គ្រាប់ស្វាយចន្ទី និងប្រភេទគ្រាប់ធញ្ញជាតិជាច្រើនទៀត ត្រូវបានអ្នកឯកទេសខាងផ្នែកសិក្សាស្រាវជ្រាវពីចំណីអាហាររកឃើញនូវ សារជាតិចិញ្ចឹមដ៏សម្បូរបែប ដែលមានប្រយោជន៍ក្នុងការជួយបំប៉នដល់សរីរាង្គកាយមនុស្សទាំងមូល។

តួយ៉ាង បើផ្អែកទៅតាមប្រភព Healthline បានលើកឡើងនូវប្រភេទគ្រាប់ធញ្ញជាតិចំនួន៥ប្រភេទ ដែលមានប្រយោជន៍ខ្ពស់ក្នុងការជួយថែស្បែក បំប៉នខួរក្បាល ពង្រឹងប្រព័ន្ធភាពសុំារាងកាយ ដោយគ្រាន់តែញុំាធ្វើជាអាហារសម្រន់ធម្មតា៖

១. គ្រាប់អាល់មុន៖ អាល់មុន មានផ្ទុកនូវសារធាតុវីតាមីន E ដែលជាសារធាតុរំលាយជាតិខ្លាញ់ មានមុខងារ ជាសារធាតុប្រឆាំងអុកស៊ីតកម្ម ដើម្បីការពារកោសិកា គាំទ្រមុខងារប្រព័ន្ធភាពស៊ាំ ប្រឆាំងនឹងការខូចខាតដោយអុកស៊ីតកម្ម។ គ្រាប់អាល់ម៉ុនមិនត្រឹមតែជាប្រភពដ៏ល្អនៃប្រូតេអ៊ីន ជាតិសរសៃ វីតាមីន និងសារធាតុរ៉ែ ដោយអាចកាត់បន្ថយកត្តាហានិភ័យនៃជំងឺបេះដូង ទប់ស្កាត់ការកើនឡើងកូលេស្តេរ៉ុល LDL និងបង្ការបញ្ហាខ្លាញ់ក្បាលពោះលើស និងគាំទ្រដល់ការលូតលាស់នៃបាក់តេរីល្អក្នុងពោះវៀន ដែលមានប្រយោជន៍ក្នុងការជួយរំលាយអាហារ។

២. គ្រាប់ជី៖ គ្រាប់ជីត្រាំរួចលាយជាមួយនឹងទឹកដោះគោស្រស់មួយកែវផឹកជារៀងរាល់ព្រឹក និងយប់ មានអត្ថប្រយោជន៍ខ្ពស់ក្នុងការជួយសម្រួលដល់សុខភាពក្រពះពោះវៀនឱ្យមានដំណើរការល្អ បាត់បន្ថយការឃ្លាន និងជួយសម្រួលដល់ការបន្ទោរបង់ឱ្យបានទៀតទាត់។ ទន្ទឹមនឹងនេះទៀតសោត ទឹកដោះគោជាមួយគ្រាប់ជី ក៏មានប្រយោជន៍ក្នុងការជួយជំរុញកោសិកាស្បែកឱ្យមានសុខភាពល្អ ពន្យាភាពចាស់ កាត់បន្ថយស្នាមជ្រីញជ្រួញផងដែរ។

៣. គ្រាប់វ៉ាល់ណាត់៖ វ៉ាល់ណាត់ សម្បូរទៅដោយសារធាតិទង់ដែង ដែលជាសារធាតុរ៉ែរាងកាយត្រូវការ ដើម្បីផលិតអង់ស៊ីមពាក់ព័ន្ធនឹងការផលិតថាមពល និងការសំយោគសារធាតុបញ្ជូនសរសៃប្រសាទ។ ទង់ដែង​ ក៏​ជួយ​ដល់​មុខងារ​នៃ​ប្រព័ន្ធ​ភាព​ស៊ាំ ការ​អភិវឌ្ឍ​សរសៃឈាម ធ្វើឱ្យមុខងារខួរក្បាលប្រសើរឡើង កាត់បន្ថយកត្តាហានិភ័យនៃជំងឺវង្វេង និងជំងឺទឹកនោមផ្អែមប្រភេទទី ២។

៤. គ្រាប់សណ្តែក៖ សណ្តែក មានផ្ទុកទៅដោយវីតាមីន ជាតិរ៉ែដូចជាម៉ាញ៉េស្យូម ស័ង្កសី ប៉ូតាស្យូម និងជាតិដែក ដែលអាចចូលទៅបំពេញមុខងារផ្សេងៗ និងជួសជុលកោសិកាដែលខូចខាតបំពេញចន្លោះដែលខ្វះសារធាតុចិញ្ចឹមឱ្យបានទទួលបានភាពពេញលេញមកវិញក្នុងសរីរាង្គទាំងមូល។ ជាមួយគ្នានេះ វីតាមីនK មាននៅក្នុងសណ្តែក ក៏អាចជំនួយមុខងារខួរក្បាល ដូចជា ការគិត ការចងចាំ និងកាត់បន្ថយភាពស្ត្រេស ដោយកម្រិតជាតិគ្លុយកូសមានការរក្សាថេរ។

៥. គ្រាប់ស្វាយចន្ទី៖ ប្រូតេអ៊ីន វីតាមីន K ម៉ាញ៉េស្យូម និងម៉ង់ហ្គាណែស ដែលមាននៅក្នុងគ្រាប់ស្វាយចន្ទី អាចធ្វើឱ្យប្រសើរឡើងនូវរោគសញ្ញានៃជម្ងឺមេតាបូលីកដែលជាចង្កោមនៃរោគសញ្ញា ដូចជាការកើនឡើងសម្ពាធឈាម កម្រិតជាតិខ្លាញ់ក្នុងឈាម ជាតិស្ករក្នុងឈាម និងខ្លាញ់ក្បាលពោះ ដែលបង្កើនហានិភ័យនៃជំងឺបេះដូង និងជំងឺទឹកនោមផ្អែម។

គួរបញ្ជាក់បន្ថែមឱ្យដឹងផងដែរ នៅក្នុងការញុំារបបអាហារនីមួយៗ ប្រសិនណាបើញុំាលើសកម្រិតពេកវាអាចបង្កជាទុក្ខទោសដល់សរីរាង្គកាយយើងវិញជាក់ជាមិនខានដោយសារតែលើសកម្រិតសារជាតិរាងកាយត្រូវ។ ដូច្នេះ ជាការណែនាំក្នុងទិសដៅសមស្រម សូមស្របសូមបងប្អូនគួរតែទទួលទានអាហារដែលមានកម្រិតបរិមាណសមស្របទៅនឹងសរីរាង្គកាយត្រូវ មិនច្រើនពេក ក៏មិនតិចពេកដែរ៕

អត្ថបទដោយ៖ ប៉ាវ ភក្តី