អាហារសាមញ្ញៗ អាហារធម្មតាៗ អាហារងាយៗ ដែលអ្នកគ្រប់គ្នាតែងទទួលទានជាប្រចាំសុទ្ធសឹងតែជាអាហារដែលមានជីវៈជាតិចំពោះសុខភាព ប៉ុន្តែគ្រប់អាហារទាំងអស់ក៏មានផលប៉ះពាល់របស់វាផងដែរ។ ដូចជាអាហារបំពង អាហារសាច់ក្រហម អាហារផ្អែមសុទ្ធសឹងតែជាអាហារបង្កឱ្យឡើងកម្រិតកូឡេស្ដេរ៉ុល។ បើយោងតាមប្រភព Health Shots។

កូឡេស្ដេរ៉ុលសំខាន់ៗ០២ប្រភេទគឺ HDL(Lipoprotein ដង់ស៊ីតេខ្ពស់) ដែលហៅថាកូឡេស្ដេរ៉ុលល្អ ហើយនឹងLDL(Lipoprotein ដង់ស៊ីតេទាប) ដែលហៅថាកូឡេស្ដេរ៉ុលអាក្រក់។ កម្រិតខ្ពស់នៃLDLឬកូឡេស្ដេរ៉ុលអាក្រក់អាចនាំឱ្យមានការកើនឡើងនៅលើជញ្ជាំងនៃសរសៃឈាមរបស់អ្នក ដែលបង្កើនហានិភ័យនៃការកើតជំងឺបេះដូង និងជំងឺដាច់សរសៃឈាមខួរក្បាល។ ខាងក្រោមនេះជាអាហារចំនួន០៥មុខដែលបង្កើនកូឡេស្ដេរ៉ុលអាក្រក់រួមមាន៖

១.សាច់ក្រហម៖

សាច់ក្រហមសំដៅទៅលើប្រភេទសាច់ដូចជា សាច់គោ សាច់ជ្រូក និងសាច់ផ្សេងៗ ហើយសាច់ទាំងអស់នេះសុទ្ធសឹងតែជាអាហារដែលអ្នកគ្រប់គ្នាញុំាជាប្រចាំថ្ងៃ ឬយកមកធ្វើជាម្ហូបជាប្រចាំថ្ងៃ។ បើយោងតាមប្រភព Harvard University បានឱ្យដឹងថា​ សាច់ក្រហម អាហារចៀន និងនំដុត មានការពេញនិយមក្នុងការញុំា ហើយការវាបង្កើនកម្រិតកូឡេស្ដេរ៉ុល Lipoprotein ដែលមានដង់ស៊ីតេទាប(LDL) ដែលជាប្រភេទកូឡេស្ដេរ៉ុលអាក្រក់ដែលបង្កើតនៅក្នុងជញ្ជាំងសរសៃឈាម។ នេះក៏ព្រោះតែវាសម្បូរទៅដោយជាតិខ្លាញ់ឆ្អែតខ្ពស់។​

២.ទឹកដោះគោមានជាតិខ្លាញ់៖

ប្រសិនបើអ្នកំពុងទម្លាប់ផឹកទឹកដោះគោ ឬទឹកដោះគោជូរមានជាតិខ្លាញ់ សូមអ្នកគិតឡើងវិញនូវទម្លាប់ញុំារបស់អ្នក។ ពីព្រោះថា ពួកវាសម្បូរទៅដោយកូឡេស្ដេរ៉ុលខ្ពស់។ អ៊ីចឹងអ្នកគួរតែប្ដូរទៅជាទឹកដោះគោជូរគ្មានជាតិខ្លាញ់ ឬមានជាតិខ្លាញ់ទាប។ ដើម្បីការពារការឡើងកម្រិតកូឡេស្តេរ៉ុលអាក្រក់។

៣.សាច់កែច្នៃ៖

សាច់កែច្នៃដូចជា សាច់Bacon(សាច់ជ្រូកបីជាន់ចំណិត) សាច់ក្រក ប្រហិត និងHot Dogs មានជាតិកូឡេស្ដេរ៉ុលអាក្រក់ ដែលបង្កើនឱកាសក្នុងការវិវត្តទៅជាជំងឺបេះដូង។ ដូច្នេះសូមអ្នកជៀសវាង ឬកំណត់ការទទួលទានឱ្យមានដែនកំណត់ច្បាស់លាស់។

៤.នំដុត ឬនំខេក៖

ប្រសិនបើអ្នកកំពុងទម្លាប់ញុំា នំខូឃី នំខេក នំដូណាត់ និងនំដុតដទៃៗទៀតជាអាហារសម្រន់របស់អ្នក អ្នកកំពុងប្រឈមគ្រោះថ្នាក់ឡើងកម្រិតកូឡេស្ដេរ៉ុលខ្ពស់ ដូច្នេះអ្នកគួរតែរៀបចំនូវអាហារសម្រន់របស់អ្នកឡើងវិញ ដើម្បីការពារការឡើងកម្រិតកូឡេស្ដេរ៉ុលក្នុងសរសៃឈាមរបស់អ្នក។

៥.អាហារបំពង៖

យើងរាប់ចាប់ពីដំឡូងបំពងរហូតដល់មាន់បំពង អ្នកគួរតែឈប់ទទួលទាននូវអាហារបំពងដែលមានជាតិខ្លាញ់ឆ្អែតនេះទៅ ពីព្រោះអាហារបំពងទាំងនេះសម្បូរទៅដោយកូឡេស្ដេរ៉ុលច្រើនបង្កឱ្យប៉ះពាល់សុខភាពបេះដូងរបស់អ្នក។  

គួរជម្រាបថា អាហារដែលបង្កឱ្យមានកម្រិតកូឡេស្ដេរ៉ុលអាក្រក់អាចនាំឱ្យមានការកើនឡើងនៅលើជញ្ជាំងនៃសរសៃឈាមរបស់អ្នក ដែលបង្កើនហានិភ័យនៃការកើតជំងឺបេះដូង និងជំងឺដាច់សរសៃឈាមខួរក្បាល។ ដូច្នេះអ្នកគួរតែចៀសវាង និងកាត់បន្ថយ។