មនុស្សយើងមានសុខភាពល្អ និងជំងឺក៏មកពីអាហារដែលយើងប្រចាំថ្ងៃនេះដែរ។ ជាពិសេសមានអ្នកខ្លះ ឆាប់ចាស់ជាងវ័យក៏ព្រោះតែអាហារជាមួយផ្នែកធំដែរ។ បើអ្នករកអាហារល្អសម្រាប់ថែសម្រស់ និងស្បែកនោះ អាហារទាំង ៤នេះ អាចជួយការពារជាលិកាស្បែកអ្នកបានល្អបំផុត។

១. ពណ៌លឿង/ទឹកក្រូច៖ សារធាតុចិញ្ចឹម Carotenoids ដែលសម្បូរជាងនៅគេនៅក្នុងក្រុមបន្លែផ្លែឈើពណ៌លឿង និងទឹកក្រូច ដែលជាបណ្តុំនូវសារជាតិ (Beta-cryptoxanthin, beta-carotene និង alpha-carotene) ជួយរក្សានូវភ្នាសរំអិល រក្សាភ្នែក អារម្មណ៍រីករាយ និងបំប៉នសារធាតុចិញ្ចឹមនៅក្នុងស្បែកឱ្យមានសុខភាពល្អ។ មិនតែប៉ុណ្ណោះ ជាតិសរសៃ Folate ប៉ូតាស្យូម វីតាមីនA (បេតាការ៉ូទីន) វីតាមីន C ផ្តល់អត្ថប្រយោជន៍​ចំពោះ​សុខភាព ប្រឆាំងនឹងការរលាក អុកស៊ីតកម្ម ជំនួយសុខភាពបេះដូង កាត់បន្ថយហានិភ័យនៃជំងឺមហារីកជាដើម។ ពេលអ្នកស្បែកស្រស់ស្អាត អ្នកក៏មានអារម្មណ៍ល្អដែរ។

២. វីតាមីន A៖ តាមប្រភពសារព័ត៌មានសុខភាព Webmd បានចុះផ្សាយថា អាហារមានវីតាមីន A វាជួសជុលជាលិកាស្បែក កុំឱ្យអ្នកឆាប់ចាស់ជាងវ័យ និងមានសុខភាពផ្លូវចិត្តកាន់តែល្អថែមទៀត។ ការហូបអាហារមានវីតាមីនA មិនគ្រប់គ្រាន់ទេ អាចធ្វើឱ្យស្បែករបស់អ្នករាងស្ងួត និងបែកស្រកាទៀត។ អ្នកត្រូវបន្ថែមអត្ថប្រ​យោជន៍របស់វីតាមីន A តាមការណែនាំរបស់អ្នកជំនាញក្នុងការទទួលទានអាហារល្អៗ​ ដូចជា​ ដំឡូងជ្វា ការ៉ុត និងប្រភេទបន្លែបៃតង។ បើយោងតាមការសិក្សាស្រាវជ្រាវរបស់វិទ្យាស្ថាន​ជំងឺសើស្បែកអាមេរិក បញ្ជាក់ថា អាហារមានវីតាមីន A អាចជួយគ្រប់គ្រងការកើតមុន និងកាត់បន្ថយស្នាមជ្រីវជ្រួញ​បានល្អបំផុត។

៣.  ផ្លែឪឡឹក៖ ឪឡឹកសម្បូរទឹកច្រើនរហូតដល់ទៅ៩២% ឯណោះ និងបង្កើនថាមពលឱ្យអារម្មណ៍រីករាយខ្លាំងណាស់។ ព្រោះផ្លែឪឡឹកជួយអ្នកបំពេញជាតិទឹកផ្អែមៗ បែបធម្មជាតិ មានប្រយោជន៍ដល់រាងកាយ។ ក្រៅពីមានជាតិទឹកច្រើនហើយនោះ ថែមទាំងសម្បូរដោយវីតាមីនសម្រាប់ចិញ្ចឹមបណ្ដុះកោសិកា និងជួសជុលជម្រុះកោសិកាដែលងាប់បានយ៉ាងល្អ។ ម្យ៉ាងវិញទៀត ការញ៉ាំឪឡឹកនារដូវក្ដៅមិនត្រឹមតែជួយផ្ដល់ជាតិទឹកដល់សរីរាង្គកាយរបស់អ្នកមានជាតិទឹកគ្រប់គ្រាន់ប៉ុណ្ណោះទេ ថែមទាំងសម្បូរវីតាមីនច្រើនមុខដែលអាចជួយផ្គត់ផ្គង់ដល់កោសិកាស្បែក។

៤. ត្រីសាម៉ុង៖ ត្រីនេះមាន​សារ​ធាតុ​ខ្លាញ់​អូមេហ្គា៣​ល្អ​សម្រាប់​សុខភាពបេះដូង ​មកពីវាមានអាស៊ីត​ក្នុងសាច់នេះ និង​ជួយ​រក្សា​ស្បែក​​ឱ្យ​មាន​ស្បែកមានសំណើម កុំឱ្យឆាប់ចាស់ជាងវ័យ​ ហើយជួយ​កាត់​បន្ថយ​ការ​រលាក។​ តាមការស្រាវជ្រាវបានបង្ហាញថា អាស៊ីតខ្លាញ់អូមេហ្គា ៣ ក៏ជាប្រភពចំណីអាហារមួយក្នុងចំណោមវីតាមីន D ដែលជួយការពារអ្នកកុំឱ្យពុកឆ្អឹងផងដែរ៕ អត្ថបទដោយ៖ ទ្រ សុភាព