ផ្លែឈើគឺពិតជាប្រយោជន៍ជួយសុខភាពរបស់ស្រ្តីមានផ្ទៃពោះ និងកូនក្នុងផ្ទៃក៏ពិតមែន ក៏ប៉ុន្ដែ ប្រភេទផ្លែឈើប៉ុន្មានមុខនេះ ស្រ្តីមានផ្ទៃពោះគួរតែហាមញុំាឬកាត់បន្ថយការញុំា ព្រោះមិនល្អ ដល់ការលូតលាស់និងសុខភាពរបស់ទារកក្នុងផ្ទៃពោះទេ អាចមានរោគសញ្ញាប៉ះពាល់កើតឡើងបាន។

ផ្សាភ្ជាប់ជាមួយខ្លឹមសារខាងលើនេះ ទឹកចិត្តជាឪពុកម្ដាយ កូនជាបេះដូង កូនជាអ្វីគ្រប់យ៉ាងរបស់ម៉ាក់ប៉ា ។ ដោយហេតុថាអំឡុងពេលពរពោះនេះ គឺប្រុងប្រយ័ត្នណាស់ ម្ហូបអាហារផ្សេងៗមិនចេះតែញុំាដូចខ្លួនមួយឡើយ ចង់ញុំាអ្វីគឺគិតគួរដល់កូនក្នុងផ្ទៃខ្លាំងបំផុត ព្រោះទារកកំពុងលូតលាស់ បើមិនប្រយ័ត្នក៏អាចនឹងបាត់បង់ទៅវិញនាំមានការស្ដាយក្រោយឡើងមក ។ ដូច្នេះ មានតែការពារទុកមុខ និងកុំចេះតែញុំាផ្ដេសផ្ដាស ។

ខាងក្រោមនេះគឺជាប្រភេទផ្លែឈើស្រ្តីមានផ្ទៃពោះមិនគួរញុំា ក្រៅពីផ្លែម្នាស់នេះបើយោងតាមរយៈប្រភព៖ apollocradle។

១. ផ្លែល្ហុង៖ គឺជាប្រភេទផ្លែឈើ១ដែលជាប់ចំណាត់ថ្នាក់ខ្ពស់មួយ ក្នុងការហាមមិនឱ្យស្រ្តីមានផ្ទៃពោះញុំា ព្រោះក្នុងផ្លែល្ហុងខ្ចី និងល្ហុងទុំសម្បូរដោយជាតិជ័រ ដែលបង្កជាការកន្រ្តាក់នៃស្បូនខ្លាំង​បង្កជាគ្រោះថ្នាក់ដល់កូនក្នុងផ្ទៃ។ តែទោះបីជាយ៉ាងនេះក្ដី ផ្លែល្ហុងសម្បូរដោយវីតាមីន ប្រូតេអ៊ីនជាច្រើនជំនួយសុខភាព ដូច្នេះស្រ្តីអាចញុំាបរិមាណតិចតួចប៉ុណ្ណោះ មួយវិញទៀត គួរតែហាមញុំាប្រភេទល្ហុងខ្ចីផងដែរ។

២.ផ្លែទំពាំងបាយជូរ៖ ផ្លែនេះ​ ត្រូវបានគេហាមមិនឱ្យស្រ្តីមានផ្ទៃពោះ ញុំាច្រើននោះទេនៅពេលមានផ្ទៃពោះ និងអំឡុងពេលត្រីមាសចុងក្រោយ ព្រោះ ញុំាច្រើន អាចបង្កើនកម្ដៅ ដល់កូនក្នុងផ្ទៃរួមទាំងម៉ាក់ៗជាដើម ដូច្នេះចៀសវាងមានបញ្ហា។

៣.ផ្លែអម្ពិល៖ នៅអំឡុងត្រីមាសទី១ស្រ្តីត្រូវតែប្រយ័ត្នញុំាផ្លែអម្ពិល ព្រោះផ្លែឈើនេះ សម្បូរដោយ​ វីតាមីន C បើកាលណាញុំាច្រើន អាចនាំឱ្យឡើងសីតុណ្ហភាពខ្ពស់ បង្កជាគ្រោះថ្នាក់ដល់សុខភាពរបស់កូនក្នុងផ្ទៃបាន ដូច្នេះម៉ាក់ៗត្រូវប្រយ័ត្នជាក្នុងការញុំា អាចញុំាតិចៗបានហើយ។

គូសបញ្ជាក់ឱ្យដឹងថា នៅពេលមានផ្ទៃពោះ មិនត្រឹមតែត្រូវប្រយ័ត្នជាមួយផ្លែឈើ៣ប្រភេទនេះ ទេ គឺនៅមានតមអាហារច្រើនប្រភេទទៀត មិនចេះតែញុំាដូចអ្នកគ្មានផ្ទៃពោះនោះទេ ជាពិសេសត្រូវស្ដាប់តាមការណែនាំរបស់គ្រូពេទ្យជំនាញត្រឹមត្រូវ ព្រោះពេលមានផ្ទៃពោះត្រូវគិតគួរនិងប្រយ័ត្នខ្លាំងណាស់ បើស្រួលមិនស្រួលអាចរលូតកូន នាំវិប្បសារីឡើងមកមិនខាន ៕

អត្ថបទដោយ៖ ប៉ែត ធីតា