ហើយរោគសញ្ញារបស់វាមានច្រើនដូចជា ឈឺចុករោយចង្កេះ នោមមកមានក្លិន នោមមកមានពពុះច្រើន ទឹកនោមប្រែពណ៍ ជាដើម។ តែមានសញ្ញាមួយទៀតដែលបងប្អូនយើងភាគច្រើនមិនសូវជាចាប់អារម្មណ៍គឺរោគសញ្ញាដែលកើតឡើងនៅតំបន់ជើង និងបាតជើង វាក៏ជាសញ្ញានៃជំងឺខ្សោយតម្រងនោមដូចគ្នា តែវាតែងត្រូវបានគេមើលរំលងនិងយល់ថាជាបញ្ហាតូចតានដូចជា៖ 

១. ហើមជើង និងបាតជើង៖ ផ្អែកតាម The Health site នៅពេលតម្រងនោមដំណើរការមិនល្អ វាមិនអាចបញ្ចេញកាកសំណល់ និងសារធាតុរាវដែលលើសចេញពីរាងកាយរបស់យើងបានល្អទេ ហើយជាលទ្ធផលសារធាតុរាវទាំងនេះនឹងកកកុញនៅក្នុងជាលិកា ជាពិសេសនៅតំបន់ជើង និងបាតជើង។ ការហើមនេះអាចបណ្តាលឱ្យមានអារម្មណ៍ធ្ងន់ ជាប់តឹង ឈឺចាប់ ឬមិនស្រួលខ្លួន ខ្លះអាចសង្កត់ស្បែកហើយស្នាម។ អ្នកជំនាញបានពន្យល់ថា បញ្ហានេះកើតឡើងដោយសារតម្រងនោមមិនអាចគ្រប់គ្រងកម្រិតសូដ្យូម និងទឹកក្នុងរាងកាយបានត្រឹមត្រូវ។

២. ឈឺចាប់នៅជើង និងបាតជើង៖ អារម្មណ៍ឈឺ ឈឺចាប់ជ្រៅៗ ឬអស់កម្លាំងនៅជើង ជាពិសេសនៅពេលយប់ អាចបង្ហាញថាតម្រងនោមកំពុងខ្សោយ ឬមិនដំណើរការបានពេញលេញ។ មូលហេតុចម្បងគឺដោយសារការប្រមូលផ្តុំទឹក និងកាកសំណល់នៅក្នុងរាងកាយ ដែលធ្វើឱ្យសរសៃឈាម និងជាលិកាត្រូវបានសង្កត់ បណ្តាលឱ្យមានការឈឺចាប់ និងភាពមិនស្រួលជាបន្តបន្ទាប់។ បងប្អូនខ្លះអាចមានអារម្មណ៍ថាជើងឈឺ ឬតឹងខ្លាំងពេលគេង ឬពេលសម្រាកយូរ។

៣. អារម្មណ៍ស្ពឹក ញាក់ៗ ឬចុកចាប់នៅជើង និងបាតជើង៖ អារម្មណ៍នេះអាចកើតឡើងគ្រប់ពេល មិនថាពេលថ្ងៃ ឬពេលយប់ ហើយជាញឹកញាប់ចាប់ផ្តើមពីបាតជើងមុនគេ។ នៅពេលតម្រងនោមខ្សោយ ជាតិពុលអាចកកកុញនៅក្នុងឈាម ហើយជាតិពុលទាំងនេះអាចប៉ះពាល់ដល់សរសៃប្រសាទ បណ្តាលឱ្យកើតមានបញ្ហាសរសៃប្រសាទដែលទាក់ទងនឹងជំងឺតម្រងនោម។ ជាលទ្ធផល អ្នកជំងឺអាចមានអារម្មណ៍ដូចជាស្ពឹក ស្រាលស្រាវ ឬដូចជាមានអ្វីញាក់នៅក្រោមស្បែក ដែលធ្វើឱ្យការដើរ ឬការរស់នៅប្រចាំថ្ងៃកាន់តែពិបាក។

សរុបមក រោគសញ្ញាដែលបង្ហាញនៅលើជើង និងបាតជើង មិនមែនជារឿងតូចតាចដូចដែលមនុស្សជាច្រើនគិតនោះទេ។ វាអាចជាសញ្ញាព្រមានដំបូងៗនៃជំងឺខ្សោយតម្រងនោម ដែលត្រូវការការយកចិត្តទុកដាក់ និងការពិនិត្យពីវេជ្ជបណ្ឌិតឱ្យបានទាន់ពេលវេលា។ ការយល់ដឹង និងការសង្កេតរាងកាយខ្លួនឯងជាប្រចាំ អាចជាជំហានដ៏សំខាន់ក្នុងការការពារសុខភាព និងរក្សាជីវិតបានយូរអង្វែង៕

អត្ថបទដោយ៖ សារួ