ក្រោយស្ងប់ស្ងាត់ករណីឆ្លងវីរុសកូវីដ១៩អស់រយៈពេល៥២ថ្ងៃជាប់ៗគ្នា រហូតមកដល់ថ្ងៃទី២៨ ខែមិថុនា ឆ្នាំ២០២២នេះ កូវីដ១៩នៅកម្ពុជាក៏បានកើនឡើងវិញ។ គិតចាប់ពីថ្ងៃទី២៨ ដល់ថ្ងៃទី១២ កក្កដានេះ តួលេខអ្នកឆ្លងសរុបកើនដល់ជាង១០០នាក់ហើយ រួមមានទាំងការឆ្លងរាលដាលក្នុងសហគមន៍ផងដែរ។
មុននេះបន្តិច នៅថ្ងៃទី១២ ខែកក្កដា ឆ្នាំ២០២២នេះ ក្រសួងសុខាភិបាលនៃព្រះរាជាណាចក្រកម្ពុជា បានរកឃើញអ្នកឆ្លងកូវីដ១៩ថ្មីចំនួន១២នាក់ ក្នុងនោះ៧នាក់ជាបុគ្គលដែលបានស្នើសុំវិញ្ញាបនបត្រចេញទៅក្រៅប្រទេស ២នាក់ជាករណីនាំចូលពីក្រៅប្រទេស។ នៅថ្ងៃដដែលនេះ ក៏មានករណីជាសះស្បើយចំនួន២៣នាក់ផងដែរ។
សរុបចាប់តាំងពីថ្ងៃដែលកម្ពុជារកឃើញករណីឆ្លងវីរុសកូវីដ១៩ក្នុងប្រទេសឡើងវិញនៅថ្ងៃទី២៨ មិថុនា ដល់ថ្ងៃទី១២ កក្កដានេះ មានចំនួន១១២នាក់ដែលបានឆ្លង។ អាស្រ័យហេតុនេះ សូមបងប្អូនមេត្តារក្សាការប្រុងប្រយ័ត្ន អនាម័យសុខភាពនិងការរស់នៅប្រចាំថ្ងៃព្រមទាំងចាក់វ៉ាក់សាំងឱ្យបានគ្រប់ៗគ្នាតាមទីតាំងនិងចំនួសដូសដែលក្រសួងបានកំណត់។
សូមរម្លឹកផងដែរថា យោងតាមកិច្ចសម្ភាសដែលបានផ្សាយក្នុងគណនីយូធូបផ្លូវការណ៍របស់ លោកជំទាវ ឱ វណ្ណឌីន នៅថ្ងៃទី១១ ខែកក្កដា ឆ្នាំ២០២២ ក្រសួងសុខាភិបាលបានឱ្យដឹងថា បានរកឃើញ នូវវត្តមានវីរុសអូមីក្រុងបំប្លែងខ្លួនថ្មី ប្រភេទ BA4 និងBA5 មានលទ្ធភាពឆ្លងលឿនជាងគេ និងអាចជ្រាបចូលប្រព័ន្ធភាពស៊ាំរបស់មនុស្ស។ លោកជំទាវ ឱ វណ្ណឌីន បានបញ្ជាក់ដែរថាប្រភេទវីរុស BA4 និងBA5នេះ វាមានលទ្ធភាពបញ្រ្ជាបចូលទៅប្រព័ន្ធការពាររបស់មនុស្ស ដែលធ្វើឱ្យប្រព័ន្ធភាពស៊ាំធ្លាក់ខ្សោយ៕
