បើអ្នកចង់បានអាយុវែង និងមានសុខភាពរឹងមាំ អ្នកត្រូវតែចេះថែសុខភាពរាងកាយនិងផ្លូវចិត្ត។ សូម្បីតែការហូបអាហារមានបន្លែ និងផ្លែឈើគឺល្អបំផុតសម្រាប់រាងកាយ។ តាមវេជ្ជបណ្ឌិតលោក Amir Khan បានបញ្ជាក់នៅលើទូរទស្សន៍ Lorraine គ្រាន់តែអ្នកធ្វើរឿងមួយនេះ ចំនួន១០នាទី វាជួយបញ្ចុះការស្លាប់របស់អ្នក ១០% គឺការធ្វើលំហាត់ប្រាណនេះឯង”។
នេះជាពេលវេលាដែលមនុស្សគ្រប់គ្នាអាចធ្វើបានទាំងអស់គ្នា គ្រាន់តែអ្នកចំណាយពេល១០នាទីប៉ុណ្ណោះក្នុងមួយថ្ងៃ។ អ្នកសួរថា លំហាត់ប្រាណបែបណាល្អចំពោះសុខភាព? លំហាត់ប្រាណមានច្រើនណាស់ សម្រាប់អ្នកទាំងអស់គ្នានិយមចូលចិត្តធ្វើវាមានដូចជា ការហែលទឹក ការដើរ និងការរត់ជាដើម។ តាមលោកវេជ្ជបណ្ឌិត Amir បានបញ្ជាក់ប្រាប់ថា “ការធ្វើលំហាត់ប្រាណចំនួន ១០នាទី ជួយកាត់បន្ថយកការស្លាប់របស់អ្នកបាន១០%។ ហើយការធ្វើលំហាត់ប្រាណនេះជួយពង្រឹងសុខភាពផ្នែកផ្សេងៗ នៃរាងកាយឱ្យរឹងមាំដើម្បីការពារជំងឺយ៉ាងល្អបំផុត”។
លោកវេជ្ជបណ្ឌិតបានបញ្ជាក់បន្ថែមថា ការធ្វើលំហាត់ប្រាណដូចជាការរាំ និងការថែសួន ក៏ជួយចង្វាក់បេះដូងនិងផ្លូវចិត្តរបស់អ្នកឱ្យល្អប្រសើរដែរ”។ មានការវាស់ស្ទង់ពីសុខភាពរាងកាយនៅកម្រិតមធ្យមទៅខ្លាំងដោយផ្អែកលើទិន្នន័យដែលប្រមូលបានពីអ្នកស្ម័គ្រចិត្ត ដែលពាក់ឧបករណ៍វាស់ល្បឿនរយៈពេលមួយសប្តាហ៍ និងយូរជាងនេះ។
មានករណីការប៉ាន់ប្រមាណរបស់អ្នកស្រាវជ្រាវបានរកឃើញថា ការបង្កើនសកម្មភាពរាងកាយ ១០នាទីក្នុងមួយថ្ងៃនឹងការពារការស្លាប់ចំនួនមនុស្ស ១១១.១៧៤នៅទូទាំងប្រជាជនអាមេរិកជារៀងរាល់ឆ្នាំ (៦.៩%) ។ ហើយមានអ្នកហាត់ប្រាណរយៈពេល ២០នាទី ជួយមនុស្សគេចពីការស្លាប់ចំនួន ២០៩.៤៥៩នាក់ក្នុងមួយឆ្នាំ(១៣%)។ សម្រាប់អ្នកហាត់ប្រាណ ៣០នាទី ជួយកាតបន្ថយមនុស្សស្លាប់ ២៧២.២៩៧នាក់(១៦.៩%) ក្នុងមួយឆ្នាំ។
ដូចនេះ ការធ្វើលំហាត់ប្រាណជួយឱ្យអ្នកមានអាយុវែងព្រោះតែរាងកាយនិងផ្លូវចិត្តរឹងមាំ។ ចូរធ្វើលំហាត់ប្រាណទាំងអស់គ្នា ដើម្បីសុខភាព និងការពារជំងឺឱ្យខ្មែរយើងរស់នៅបានយូរផងដែរ៕ អត្ថបទដោយ៖ ទ្រ សុភាព