ការព្យួរសេរ៉ូមជួយឱ្យសាច់ស្អាត ជាវិធីសាស្ត្រថ្មីមួយដែលជួយក្នុងការថែរក្សាសម្រស់ឱ្យនៅក្មេងជាង​វ័យនិង ជាពិសេសកំពុងមានការពេញនិយមយ៉ាងខ្លាំងពីសំណាកអតិថិជនដែលមិនចង់ចាស់តាមវ័យ។ ក៏ប៉ុន្តែមានអ្នកឆ្ងល់ថា តើសេរ៉ូមនេះអាចនឹងបង្កផលប៉ះពាល់ដល់សុខភាពដែលឬទេ ហើយមនុស្សប្រភេទណាដែលមិនគួរទទួលសេវាកម្មមួយនេះ?

នៅក្នុងបទសម្ភាសជាមួយនឹង លោកវេជ្ជបណ្ឌិត លី ហុកលាង ដែលជាអ្នកឯកទេសផ្នែកសោភ័ណ្ឌសាល្យសាស្ត្រនៃសកលវិទ្យាល័យវិទ្យាសុខាភិបាល និងបានបញ្ចប់ការសិក្សារផ្នែកវះកាត់ កែសម្ផស្សមកពីសកលវិទ្យាល័យPaul sabatier IIIមកពីប្រទេសបារាំង បានពន្យល់ឱ្យដឹងថា ការព្យួរសេរ៉ូម គឺជួយឱ្យស្បែកស្អាត មិនមែនជួយឱ្យស្បែកសដូចពាក្យគេនិយាយតៗគ្នានោះទេ។ សេរ៉ូមស្បែកស្អាតនេះ គឺវាបានដើរតួនាទីក្នុងការពារការ និងទប់ស្កាត់កោសិកាស្បែកកុំឱ្យផលិតជាតិមេឡានីនច្រើន ដូច្នេះហើយទើបវាធ្វើឱ្យស្បែកមើលទៅមានសភាពសស្អាត,ស្រស់ថ្លាភ្លឺរលោងមានសំណើម, ក្មេងជាងវ័យ ជាជាងពេលមិនទាន់ព្យួរសេរ៉ូម អ្វីដែលកាន់តែសំខាន់សម្រាប់សេរ៉ូមសាច់ស្អាតនេះ គឺវាសម្បូរដោយសារជាតិវីតាមីនសំខាន់ៗ ខូឡាជេន ដែលជួយទប់ស្កាត់ស្បែកពីភាពជ្រីវជ្រួញ បង្ការភាពចាស់នៃស្បែក។​ ដូច្នេះហើយ ទើបមនុស្សសម័យថ្មីនេះ ពេញនិយមមកទទួលសេវាកម្មមួយ​នេះ ដើម្បីធ្វើឱ្យសម្រស់កាន់តែស្រស់ស្អាត និងមើលទៅនៅតែក្មេងមួយកម្រិតទៀត។

តើមនុស្សប្រភេទណា អាចមកទទួលសេវាកម្មមួយនេះបាន?

យោងតាមប្រសាសន៍របស់លោកវេជ្ជបណ្ឌិតដដែរ បានបន្តថា ត្បិតតែសេរ៉ូមនេះវាជួយបានច្រើនក៏ពិតមែន ក៏ប៉ុន្តែមិនមែនគ្រប់គ្នាចេះតែអាចទទួលសេវាកម្មមួយនេះបាននោះទេ។ ចំពោះក្រុមមនុស្សដែលអាចទទួលសេវាកម្មនេះបាន គឺចាំបាច់ត្រូវតែមានសុខភាពល្អ វ័យក្មេងឬក៏ចាស់មិនបញ្ហានោះទេ ប៉ុន្តែសម្រាប់អ្នកមានបញ្ហាជំងឺថ្លើម ឬក៏ជំងឺក្រិនថ្លើម,និងជាពិសេសគឺ ខ្សោយតម្រងនោម គឺមិនអាចទទួលសេវាកម្មមួយនេះបានឡើយ។ ពីព្រោះតម្រងនោម គឺជាកន្លែងដែលច្រោះជាតិពុល ឬក៏សំណល់ចេញបពីរាងកាយ ប្រសិនបើតម្រងនោមដំណើរការមិនបានល្អ ប្រាកដណាស់វានឹងមានបញ្ហាប្រសិនបើមកទទួលសេវាកម្មមួយនេះ មួយវិញទៀតសម្រាប់អ្នកដែលមានបញ្ហាថ្លើមក៏មិនអាចមកទទួលសេវាកម្មនេះបាននោះដែរ។ ថ្លើមជាកន្លែងដែលបំបែកសារធាតុ ផ្សេងៗដែលមនុស្សយើងបានបញ្ចូលទៅក្នុងរាងកាយ ដូច្នេះប្រសិនបើថ្លើមមានបញ្ហា សារធាតុមួយចំនួនអាចនឹងស្ទះនៅនឹងថ្លើម នេះជាបញ្ហាធំដែលក្រុមអ្នកជំនាញ ឬក៏វេជ្ជបណ្ឌិតតែងតែធ្វើការពិគ្រោះយោបល់ទៅលើបញ្ហារបស់អ្នក​មកទទួលសេវាកម្ម មុននឹងអនុញ្ញាតឱ្យពួកគាត់ទទួលសេវាកម្មមួយនេះ។

ដូច្នេះ សម្រាប់លោកអ្នកដែលមានបំណងចង់ទទួលសេវាកម្មមួយនេះ គឺត្រូវធ្វើការពិភាក្សាជាមួយគ្រូពេទ្យឱ្យបានច្បាស់លាស់ អំពីបញ្ហាសុខភាពបស់ខ្លួនឯងជាមុនសិន មុននឹងឈានដល់ការទទួលសេវាកម្ម ដើម្បីចៀសវាងការជួបនឹងបញ្ហាដែលអាចប៉ះពាល់ដល់អាយុជីវិតនាថ្ងៃក្រោយ៕

អត្ថបទដោយ៖ កញ្ញាតឹក ស៊ីថា